1Eu än Tafit iotek. Ai Samol mi Lapalap, kopwe aüselingaei o pälüeniei, pun ngang eman aramas mi wöüngau o osupwang.
2Kopwe amwöchü manauei, pun ngang üa föri letipom. Kopwe amanauaei, ngang noum chon angang mi apilükülükuk, pun en ai Kot.
3Ai Samol, kopwe ümöümöch ngeniei, pun ngang üa siö ngonuk iteiten rän.
4Kopwe apwapwai leluken noum ei chon angang, ai Samol, pun üa suki ngonuk lelukei.
5Pun en, ai Samol, ka kirikiröch o amusala tipis, om tong ellet a somwosom ngeni meinisin mi iotek ngonuk.
6Ai Samol mi Lapalap kopwe aü selingom ngeni ai iotek, kopwe aüseling ngeni ai tüngor.
7Lon ränin ai riaföü üpwe kökköruk, pun en kopwe pälüeniei.
8Esap fokun wor eman me lein ekewe kot usun en, ai Samol, esap pwal wor och föför mi wewe ngeni om kewe föför.
9Chon ekewe mwü meinisin ka föriir repwe feito o fel ngonuk, ai Samol mi Lapalap, repwe pwal alinga itom.
10Pun en ka tekia, ka föri mettoch mi amwarar, en echök Kot.
11Ai Samol mi Lapalap, kopwe aiti ngeniei mine ka mochen pwe üpwe föri. Iwe, üpwe aleasochis ngonuk fän allükülük. Kopwe fang ngeniei eu leluk esap tipekinikin, pwe üpwe niuokusiti itom.
12Ai Samol me ai Kot, üpwe kilisou ngonuk ren unusen lelukei, üpwe alinga itom tori feilfeilachök.
13Pun om we tong ellet a fokun lapalap ngeniei, ka amanauaei seni epin lenien sotup.
14Ai Kot, aramas mi lamalamtekia ra ü ngeniei, eu mwichen mwänewüs ra mochen nieila, ir chokewe resap ekieki en.
15Nge en, ai Samol, eman Kot mi ümöümöch o kirikiröch, ka songomang o wöün tong ellet me allükülük.
16Kopwe sap ngeniei o tongeei, kopwe ngeni noum ei chon angang pöchökül o amanaua nöün noum we chon angang fefin mwän.
17Kopwe pwäri ngeniei eu asisil pwe ka kirikiröch ngeniei, pwe chokewe mi oputaei repwe säw, lupwen repwe küna pwe en ai Samol mi Lapalap ka alisiei o achipaei.
