1Eu än Tafit iotek. Ai Samol mi Lapalap, kopwe aüselinga ai tüngor mi pwüng o afäli ai siö. Kopwe aü selingom ngeni ai iotek mi wenechar.
2Alelletin ai pwüng epwe feito senuk. Pun en ka silei mine a pwüng.
3En ka atittina lelukei, ka äämwaei lepwin, ka sotuniei, nge kosap küna och ekiek mi ngau rei. Üsap apasa och mi ngau.
4Pokiten än ekewe aramas föför, üa afäliei seni föförün ekewe chon mwäneson ren ai aleasochisi alom.
5Üa chök fetal lon om kewe al, nge üsap rik seni.
6Ai Kot, üa kökköruk, pun en kopwe pälüeniei, kopwe aü selingom ngeniei o rongorong ai kapas.
7Kopwe pwärala om tong ellet mi amwarar. Ren om manaman ka amanaua chokewe mi feito reöm pwe kopwe tümwünüür seni chon ü ngeniir.
8Kopwe tümwünüei usun chök fituken lon mesom, kopwe aopaei fän nürün poum,
9seni ekewe aramasangau mi fiu ngeniei, seni ekewe chon oputaei mi pwelifeiliei o mochen nieila.
10Ra pineela leluker pwe resap eäni tong, ra eäni kapasen tunesikesik.
11Ra eipwa ipwei, iei ra pwelifeiliei, ra chök änenaei pwe repwe aturueitiu lepwül.
12Ra wewe ngeni eman laion mi achocho le kütta liapan, ika wewe ngeni eman nienifön laion mi öüröürela lon an lenien op.
13Ai Samol mi Lapalap, kopwe feito. Kopwe ü ngeni chon oputaei o akufuur. Kopwe angasaei seni ekewe aramasangau ren noum ketilas.
14Ai Samol mi Lapalap, kopwe angasaei seni ekewe aramas mi chök angei ar feiöch me lon ei fanüfan. Kopwe apwüngüür ren ekewe riaföü ka amolätä fän iter, amwo epwe naf ngeni nöür me nöün nöür.
15Nge me rei, ngang üpwe nenengeni mesom, pun üsap föri och mi mwäl. Lupwen üpwe nenela, üpwe fokun pwapwa ren ai nenengonuk.
