1Mewö jiiga Aisaknöŋ Jeikob köl öröi kaiga kötuetköba kewö jim kutum waŋgiyök: “Nahöni, gi Keinan yeŋgö nenböratŋini yeŋgöreŋök kun anömgi kude meman.
2Mewö qahöpmö, mönö wahöta Mesopotemia (Padan Aram) gölmenöŋ anda namgahö iwiŋi Betuel yaŋgö mire aŋgota ehongi Labangö böraturupŋi yeŋgöreŋök kun anömga meman.
3Anömgi menöŋga Anutu, kukösum pakpakö Toŋan mönö gi kötuetköba ahum sehip gihiiga gwölönarökurupki yeŋgö qötöŋinan sehiiga könagesö kambu gwötpuk mieŋgö iwi bömönŋina akŋan.
4Anutunöŋ mönö gi aka gwölönarökurupki iŋini Abrahamgö kötumötuetŋi mi toroqeba eŋgima. Mewöyök gölme asagi Abraham waŋgiiga göŋön miaŋgöreŋ kian aka maljani, mi buŋa qem aŋgume.”
5Mewö jiba Jeikob melaiiga mosöta Mesopotemia (Padan Aram) gölmenöŋ Labangöreŋ anmamgöra anök. Laban mi Aram azi Betuelgö nahönŋa aka Jeikob aka Iso yetkö namŋiri Rebeka yaŋgö nenŋa malök. Mewö.
6Aisaknöŋ Jeikob kötuetköba anömŋi memamgöra Mesopotemia gölmenöŋ melaiyöhi, mi Isonöŋ mörök. Kötuetköm waŋgiba kewö jim kutum waŋgiyök: “Gi Keinan yeŋgö nenböratŋini yeŋgöreŋök kun anömgi kude meman.”
7Mewö jim kutuiga iwinamŋi yetkö keu jit tem köla mosöta Mesopotemia (Padan Aram) gölmenöŋ anöhi, Isonöŋ mi mewöyök mörök.
8Mi möta iwiŋi Aisaknöŋ Keinan ambi tököba möt bölim aŋguba malöhi, Isonöŋ mi eka möt kutuyök.
9Mi möt kutuba iwiŋaŋgö jeŋe dop kölmapköra asaŋi Abrahamgö nahönŋi Ismaelnöŋ kömuiga yaŋgö mire anda böratŋi Malahat, Nebaiotkö nenŋi mi meiga anömurupŋi karöbut aket. Mewö.
10Jeikobnöŋ mewö Berseba miri mosöta Haran mire anmamgö anök.
11Anda mala gölme kunöŋ aŋgota wehön jeŋi geyöhaŋgöra aka miaŋgöreŋ köt tatkeri, mieŋgöreŋök kun memba nöröp qömböŋi qeba suŋgem gaun ahöyök.
12Gaun ahöba miaŋgöreŋ imut kun kewö ehök: Döp kungö kitipŋi gölmenöŋ algetka qak kitipŋi mi Suepnöŋ öŋgöba kuŋguba kiniga Anutugö garataurupŋi yeŋön miaŋgöreŋ tiba öŋgöm et aket.
13Mewö aketka Kembunöŋ yaŋgö kösutŋe kinda keu kewö jii mörök: “Nöŋön Kembu, asagi Abrahamgö Anutuŋi aka iwigi Aisakö Anutuŋi akzal. Gölme ki ahözani, nöŋön mi gi aka göhö gwölönarökurupki eŋgö buŋaya qem eŋgimam.
14Göhö gwölönarökurupki yeŋön ahumsehip aketka jaŋgöŋinan gölmegö sömsöm ewö akŋa. Mewö aiga jula deŋda gölme wehön kotkotŋe aka gegeŋe, Saut likep aka Not likep, eu aka emu miaŋgöreŋ göröken dop köla anda malme. Göhöra aka göhö gwölönarökurupki yeŋgöreŋök kungöra aka nöŋgö kötumötuetnan mönö gölmegö könagesö kambuŋi pakpak yeŋgö qakŋine öŋgöiga oayeŋkoyaeŋ akŋe.
15Mötnöŋ, nöŋön göbuk mala denike denike anda kaba malmani, miaŋgö dop mönö sel jöhöm gihiba mal öŋgöba goaŋgitpiga gölme kiaŋgöreŋ kunbuk liliŋgöba kaman. Nöŋön gi qahö gömosöta keu jim jöhöm gihiali, miaŋgö dop akiga ölŋi asuhum teköma.”
16Mewö jiiga Jeikobnöŋ gaun uruŋeyök imbiŋi möta wahöta kewö jiyök: “Kembunöŋ mönö ölŋa gölme kiaŋgöreŋ maljapmö, nöŋön mi mutuk qahö mötzal.”
17Mewö jiiga jönömŋi unduiga keu kewö jiyök: “Gölme ki mönö kömbukŋi aka keŋgötmötmötŋambuk akza. Kiaŋön mönö ölŋa Anutugöreŋ tatat dundumŋi aka Suepkö naŋguŋi akza.”
18Mewö jiba miri giaŋiiga söŋanök wahöta köt qömböŋi qeba ahöyöhi, mi memba wahöta jabö mötök ewö kuŋguba qakŋe kelök o mokoba miriyök.
19Miriba gölme miaŋgö qetŋi Betel (Anutugö miriŋi) qerök. Mutuk taon miaŋgö qetŋi mi Luz qeta malget.
20Jeikobnöŋ gölme miaŋgö qetŋi dölökŋi Betel qeta keu kewö jim jöhöba jöjöpaŋ keunöŋ jim köhöiyök: “O Anutu, göŋön nömbuk mala köna ki anda malmami, miaŋgöreŋ nek galöm ak niŋgiba numbu neneŋamni aka silenaŋgö esuŋi miwikŋaim niŋginöŋga
21ölöp luai qakŋe iwinaŋgö mire kunbuk liliŋgöba kamam ewö, nöŋön mönö göhö jitsihitki tem köla malbiga göŋön nöŋgö Kembu Anutuni aka malman.
22Köt ki memba wahöta jabö ewö mötök kuŋguzali, miaŋön mönö göhö tatat dundumgi ahöiga yuai pakpak tököm niŋgiba malmani, nöŋön mi ölŋa mendeŋbiga kambu 10 aketka mieŋgöreŋök mohok mohok memba kalema gihiba malmam. “Mewö.
