1Jose preso b̶asid̶e Egiptod̶ebema boro itea umé traja panasid̶aa. Ab̶a uva b̶a jue diabada boro basía. Dewarabemada paʌ̃ obada boro basía. Maʌ̃ umébemaba Egiptod̶ebema borora bio quĩrũbisid̶aa.
3Maʌ̃ carea dji boroba ãdjira idji wagabadarã boro ded̶e preso b̶ʌbisia. Josera maʌ̃ preso b̶ʌbada ded̶e b̶asia.
4Dji preso b̶ʌbada boroba Josera b̶ʌsia maʌ̃ umébemara acʌ b̶amãrẽã. Mama ãdjira dãrã preso panesid̶aa.
5Ewari ab̶a Egiptod̶ebema boroa uva b̶a jue diabari bad̶ara, paʌ̃ obari bad̶a sid̶a ab̶ari diamasi cãĩmocarasid̶aa. Cãĩmocaraza ne jara awara b̶easia.
6Diaped̶ed̶a Jose ãdjimaa wãbʌrʌd̶e unusia ãdjira sopua panʌda.
7Maʌ̃ carea Joseba ãdjía iwid̶isia: –¿Cãrẽ cãrẽã bãrãra sopua panʌ?–
8Ãdjia panusid̶aa: –Daiba id̶i cãĩmocaraped̶ad̶ara caiba cawa jaraida neẽ́ bẽrã jãwã sopua panʌa.– Maʌ̃ne Joseba jarasia: –Ab̶a Ãcõrẽbʌrʌ cãĩmocarara poya cawa jarabiya. Bãrãba cãĩmocaraped̶ad̶ara mʌ̃́a nẽbʌrʌd̶adua.–
9Ara maʌ̃da uva b̶a jue diabada boro bad̶aba idji cãĩmocarara Josea nẽbʌrʌsia. Nãwã jarasia: –Mʌ̃a cãĩmocarad̶e unusia uva jʌ̃carada mʌ̃ caita nũmʌda.
10Maʌ̃ uva jʌ̃carara jʌwate ũbea b̶asia. Maʌ̃ jʌ̃carara tucuped̶a, põnõped̶a, bio zau nũmesia.
11Maʌ̃ne nama dai druad̶ebema boro tazada mʌ̃ jʌwad̶e erob̶asia. Maʌ̃ tazad̶e mʌ̃a uvada b̶arrajuped̶a dai boroa diasia.–
12Maʌ̃ jarad̶acarea Joseba nãwã jarasia: –Bʌ cãĩmocaraba naʌ̃da jara b̶ʌa: uva jʌwate ũbea bʌa ununaba jara b̶ʌa ewari ũbea.
13Ewari ũbead̶e Egiptod̶ebema boroba bʌra idji quĩrãpita trʌ̃ya bʌa naãrã o b̶ad̶a quĩrãca wayacusa o b̶amãrẽã. Mãwã bʌa waya idjía uva b̶ara jue dia b̶aya bʌa naẽna o b̶ad̶a quĩrãca.
14Bʌ bia b̶ebʌrʌd̶e mʌ̃ djuburia mʌ̃ra quĩrãdoarãdua. Bʌ boroa mʌ̃nebemada jaradua naʌ̃ ded̶ebemada ẽdrʌ b̶ʌmãrẽã.
15Mʌ̃ra hebreorã druad̶ebemada jida enesid̶aa idjab̶a mʌ̃a ni cãrẽ sid̶a oẽ́ b̶ʌda nama preso eropanʌa.–
16Paʌ̃ obada boro bad̶aba ũrĩ b̶asia Joseba maʌ̃ cãĩmocarara cawa jara b̶ʌda. Joseba cawa jarad̶ara bia b̶ad̶a bẽrã idjia jarasia: –Mʌ̃ sid̶a cãĩmocarasia. Mʌ̃a unusia mʌ̃ boro ʌ̃rʌ̃ jamara paʌ̃ bara b̶eada ũbea eronĩda.
17Dji ʌ̃rʌ̃bemane paʌ̃ cũãda quĩrãtanoa erob̶asia nama dai druad̶ebema boro itea. Baribʌrʌ cawaẽ́ne maʌ̃ paʌ̃ cũãra ĩbanaba co duanesid̶aa.–
18Mãwã jarad̶acarea Joseba idjía jarasia: –Bʌ cãĩmocaraba naʌ̃da jara b̶ʌa: maʌ̃ jamara ũbea bʌa ununaba jara b̶ʌa ewari ũbea.
19Ewari ũbead̶e Egiptod̶ebema boroba bʌra idji quĩrãpita trʌ̃ya. Baribʌrʌ bʌra ob̶ʌá tubiped̶a bacuru cũmiane ʌ̃tʌ su jira b̶ʌbiya. Maʌ̃be ãgosoba bʌ djarara cod̶ia.–
20Ewari ũbea bad̶acarea Egiptod̶ebema boroba idji tod̶a ewari b̶ʌsrid̶ada osia. Dji dromarã itea djicoda waib̶ʌa obisia. Maʌ̃ne uva b̶a jue diabada boro bad̶ara, paʌ̃ obada boro bad̶a sid̶a idji quĩrãpita enebisia.
21Maʌ̃be uva b̶a jue diabada boro bad̶ara b̶ʌsia wayacusa idjia naãrã o b̶ad̶a quĩrãca o b̶amãrẽã. Mãwã idjia wayacusa uva b̶ara Egiptod̶ebema boroa jue dia b̶esia Joseba jarad̶a quĩrãca.
22Baribʌrʌ paʌ̃ obada boro bad̶ara bacuru cũmiane ʌ̃tʌ su jira b̶ʌbisia Joseba jarad̶a quĩrãca.
23Uva b̶a jue diabada borora bia b̶ed̶amĩna Josera ab̶ed̶a quĩrãdoasia.
