Solomon Laa 1

1

2

3

4

5

6

7

8

¹Laa rhoek khuikah Laa he Solomon kah ni.

²Namah hlo tah misurtui lakah then tih a ka dongkah moknah neh kai m'mok lah sue.

³Namah tah situi bo neh na then pai tih situi loh na ming a puem pai. Te dongah ni hula rhoek long nang n'lungnah.

⁴Namah hnukah kai m'mawt lamtah yong mai sih. Kai he manghai loh amah imhman la n'khuen coeng. Namah ah ka omngaih uh tih ka kohoe uh. Nang kah hlo rhoek tah misurtui lakah ka poek uh tih vanat la nang n'lungnah uh.

⁵Ka muem cakhaw Jerusalem nu rhoek tah Kedar dap banglam khaw, Solomon himbaiyan banglam khaw rhoeprhui mai.

⁶Khomik loh kai n'hmuh tih ka muem dongah nim kai nan hmuh pawh? Ka manu ca rhoek te kai taengah sai tih misurdum aka hung la kai n'khueh uh. Kamah taengkah ka misurdum ka hung pawt ah.

⁷Ka hinglu kah a lungnah te kamah taengah thui lah. Melam na luem sak? Khothun ah melam na kol sak? Te boel tah balae tih na hui rhoek kah tuping taengah aka kulup bangla ka om?

⁸Huta rhoek khuiah sakthen te na ming pawt atah boiva kholaeh ah namah cet. Na maae-ca te aka dawn rhoek kah dungtlungim ah luem sak.

⁹Ka cangyaeh namah tah Pharaoh leng dongkah ka marhang manu kam puet sak.

¹⁰Na kam te aitlaeng neh, na rhawn khaw oidik neh damyal mai.

¹¹Nang hamla sui aitlaeng neh cak hnathawn khaw n'saii bitni.

¹²Kamah kah rhai-ul tah manghai amah loh a caboei dongah a hmuehmuei la a khueh.

¹³Kamah hlo kah murrah cun tah kamah ham ka rhangsuk laklo ah rhaeh coeng.

¹⁴Kamah taengkah kamah hlo tah Engedi misurdum kah tlansum thaihsu ni.

¹⁵Ka cangyaeh tah na tah na rhoep ne, vahui na mik khaw na sakthen ne.

¹⁶Ka hlo nang tah na sakthen ne, mah kah soengca hingsuep khaw naepnoi bal.

¹⁷Lamphai tah mah im kah tungpum saeh lamtah hmaical mah kah paekhop saeh.