Annabi Amosi 1

1

2

3

4

5

6

7

8

9

¹Annabi Amosi, Tekowaka xuruse kanyi, naxa laamatunyi to Isirayila xa fe ra Yudaya mangɛ Yusiya nun Isirayila mangɛ Yerobowami, Yowasi xa di xa waxati, ɲɛ firin beenun bɔxi xa sɛrɛn. Annabi Amosi xa masenyi nan ya:

²«Alatala a xaaɲɛ xui raminima Siyoni ma alɔ yɛtɛ, a a xui itexi raminima keli Darisalamu. Sɛxɛ mu na fiilie ma xurusee naxan donma, Karemele geya fan bara xara.»

³Alatala naxa a masen, «Damasi xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara Galadi kana a ɲaaxi ra, alɔ bɔxi buxama ki naxɛ.

⁴N tɛ dinma Xasayeli xa banxi ra na nan ma. Na tɛ nan fama Ben Hadada xa yire makantaxie gande.

⁵N Damasi xa naadɛ balan se girama nɛ. N Awenikae halakima nɛ gulunba kui, a nun mangɛ naxan na Beti Eden. Siriya ɲama xaninma nɛ Kiriya konyiya kui.» Alatala xa masenyi nan na ki.

⁶Alatala naxa a masen, «Gasa xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara taa ndee xa ɲama birin xanin Edon konyiya kui.

⁷N tɛ dinma Gasa tɛtɛ ra na nan ma. Na fama nɛ a yire makantaxie gande.

⁸N Asidodikae halakima nɛ, a nun mangɛ naxan na Asikalɔn. N Ekiron ɲaxankatama nɛ, Filisitakae birin faxama nɛ.» Marigi Alatala xa masenyi nan na ki.

⁹Alatala naxa a masen, «Tire xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara taa ndee xa ɲama birin xanin Edon konyiya kui, e saatɛ kana e naxan tongo e nun e ngaxakerenyi Isirayilakae tagi.

¹⁰N tɛ dinma Tire tɛtɛ ra na nan ma. Na tɛ fama nɛ a yire makantaxie gande.»

¹¹Alatala naxa a masen, «Edon xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara e ngaxakerenyie gere santidɛgɛma ra. E mu kinikini e ma, e xa xɔnɛ xun nan tun masama.

¹²N tɛ dinma nɛ Teman na. Na tɛ nan fama Bosara yire makantaxie gande.»

¹³Alatala naxa a masen, «Amonikae xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara Galadi ginɛ furuxie furie rabɔɔ santidɛgɛma ra, alako e xa bɔxi xun xa masa.

¹⁴N tɛ radɛxɛma Raaba tɛtɛ ra na nan ma. Na tɛ nan fama a yire makantaxie gande.

¹⁵E xa mangɛ nun a xa kuntigie fama nɛ xaninde konyiya kui, gere sɔnxɔɛ rate gere so lɔxɔɛ, turunnaadɛ foye mini xui lɔxɔɛ.» Ala xa masenyi nan na ki.