Annabi Amosi 4

1

2

3

4

5

6

7

8

9

¹Wo wo tuli mati yi masenyi ra, wo tan ginɛ naxee luxi alɔ ningee, ninge tofanyie naxee na Basan bɔxi ma. Wo tan naxee sabatixi Samari geya fari, wo tan naxee misikiinɛ tɔɔrɔma, wo tan naxee tima setaree fari. Wo nu fa a falama wo xa mɔrie bɛ, «Wo fa beere ra, won naxan minma.»

²Marigi Alatala bara a kali a xa sɛniyɛnyi ra, «Kiiti lɔxɔɛ na fafe. E fama nɛ wo suxude wure kɔnkɔrɔnxie ra, e wo nun wo xa die xanin.

³Wo minima nɛ wo xa tɛtɛ kanaxi kui, kankan tixi a boore xanbi ra. E wo xaninma nɛ yire makantaxi.» Alatala xa wɔyɛnyi nan na ki.

⁴«Wo siga Beteli, alako wo xa yunubi raba naa. Wo siga Giligali, alako wo man xa yunubi sɔtɔ. Wo xa sɛrɛxɛ ba gɛɛsɛgɛ birin, wo man xa farilɛ ba ɲɛ saxan yo ɲɛ saxan.

⁵Wo lɛbini taami ba tantui sɛrɛxɛ ra. Wo wo xa ɲanige sɛrɛxɛ masen birin bɛ, barima na fe mɔɔlie rafan wo ma, wo tan Isirayilakae.» Alatala xa masenyi nan na ki.

⁶«N nu bara kaamɛ raso wo xa taae kui. Taami yo mu lu wo xɔnyi. Kɔnɔ hali n to na birin naba, wo mu tuubi n bɛ.» Alatala xa wɔyɛnyi nan na ki.

⁷«Kike saxan to nu luxi xɛ xa xaba, n tondi nɛ tunɛ ragorode wo ma. N bara a niya taa ndee xa tunɛ sɔtɔ, taa ndee naxa a sɔtɔ. N bara a ragiri ndee xa tunɛ sɔtɔ, xɛ ndee naxa tunɛ sɔtɔ.

⁸Mixie bara keli taa ndee, e siga ye fende taa gbɛtɛ kui, kɔnɔ ye xɔli mu ba e ma. Hali n to na birin naba, wo mu tuubi n bɛ.» Alatala xa masenyi nan na ki.

⁹«N bara fure ragoro wo xa sansie ma, n bara e xara foye ra. Katoee bara wo xa laakɔɛ kana, a nun wo xa wɛni sansie, wo xa xɔrɛ sansie, nun wo xa oliwi sansie. Hali n to na birin naba, wo mu tuubi n bɛ.» Alatala xa masenyi nan na ki.

¹⁰«N bara fure ɲaaxie ragoro wo ma, alɔ n a rabaxi Misira bɔxi ma ki naxɛ. N bara wo xa sɛgɛtalae faxa santidɛgɛma ra, e bɔrɔ xiri naxa te wo ra. Wo yaxuie bara e xa soee tongo. Hali n to na birin naba, wo mu tuubi n bɛ.» Alatala xa masenyi nan na ki.

¹¹«N bara wo ɲaxankata, alɔ n Sodoma nun Gomora ɲaxankataxi ki naxɛ. Wo luxi nɛ alɔ wuri naxan naminixi tɛ. Hali n to na birin naba, wo mu tuubi n bɛ.» Alatala xa masenyi nan na ki.

¹²«N fama i tan Isirayila ɲaxankatade na nan ma. N na yi raba i ra, i fama nɛ i Marigi Ala kolonde.»

¹³Naxan geyae nun foye daaxi, naxan adama xa maɲɔxunyi birin kolon, naxan subaxɛ findima kɔɛ ra, naxan ɲɛrɛma yire itexi fari, a xili Mangɛ Alatala.