Annabi Amosi 2

1

2

3

4

5

6

7

8

9

¹Alatala naxa a masen, «Mowaba xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara Edon mangɛ xɔrie gan han e bara findi xube ra.

²N tɛ dinma Mowaba ra na nan ma. Na tɛ fama nɛ Keriyoti yire makantaxie gande. Mowaba xa fe ɲɔnma gere sɔnxɔɛ nan kui, gere feri fe xui kui.

³N e xa kiitisa xungbe halakima nɛ nun a xa kuntigie ra.» Alatala xa masenyi nan na ki.

⁴Alatala naxa a masen, «Yudaya xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E bara n ma sɛriyɛ matandi, e mu n ma yaamarie suxu, barima e bara e yɛtɛ ralɔɛ lafe ra ala wule daaxie ra, e babae la naxee ra.

⁵N tɛ dinma Yudaya ra na nan ma. Na tɛ nan fama Darisalamu yire makantaxie gande.»

⁶Alatala naxa a masen, «Isirayila xa yunubi rabaxi saxanyi, xa na mu a ra naani xa fe ra, n mu gbilenma n ma natɛ fɔxɔ ra. E tinxintɔɛ matima kɔbiri ra, e misikiinɛ matima sankiri sare xa fe ra.

⁷E tɔɔrɔmixie xa fe mayo, e tondi setare xa kiiti sade. Babɛ nun a xa di, ginɛdimɛdi keren masama. Na kui e bara n xili sɛniyɛnxi rasɔtɔ.

⁸E dugi italama e naxan nasuxuxi sɛɛkɛ ra, e e sa na ma sɛrɛxɛbade fɛ ma. E wɛni sɔtɔma tinxintareya ra, e na min e xa alae xa banxie kui.»

⁹«E na finsiriwaliya birin nabama n ya i, n tan naxan Amorikae halaki e bɛ, Amorikae naxee xungbo e sɛnbɛ gbo alɔ konde bili. N naxa Amorikae fɔxi birin ba naa, alako e naxa nɔ sɛnbɛ sɔtɔde sɔnɔn.

¹⁰N man naxa wo ramini Misira bɔxi ra, n fa wo raɲɛrɛ ɲɛ tongo naani bun ma gbengberenyi ma, alako wo xa Amori bɔxi sɔtɔ.

¹¹N naxa namiɲɔnmɛe rakeli wo ya ma, a nun Nasari sɛgɛtalae naxee bara fi n ma. Isirayilakae, a mu na na ki xɛ?» Alatala xa wɔyɛnyi nan na ki.

¹²«Kɔnɔ wo tan bara beere so Nasari mixie yi ra. Wo bara tɔnyi dɔxɔ namiɲɔnmɛe ra a e naxa Ala xa masenyi masen.»

¹³«N fama wo butuxunde na nan ma, alɔ kote binye a maxanin se butuxunma ki naxɛ.

¹⁴Mixi xulunxi mu nɔma a gide. Sɛnbɛma sɛnbɛ bama nɛ a yi ra. Geresoe faxama nɛ gere kui.

¹⁵Tanbɛ woli mu tima. Naxan xulun a gide na sanyi mu a bama e i. Soe ragi mu kisima.

¹⁶Na lɔxɔɛ geresoe suusaxi a gima a mageli nan na.» Alatala xa masenyi nan na ki.