1Kei Zaione, mu vaṉunu, mu vaṉunu, mu pokopoko nia sa ṉiniraṉira. Va sagei sari poko leleadi, agoi Zerusalema, sa vasileana hopena. Sari tie huporodi meke bonidi si lopu kaqu nuquru pule koa goi.
2Tavusu pani sari kavuru; kei Zerusalema, tekulu sage, mamu habotu koasa habohabotuana baṉara. Vata rupaha pule nigo koasa seni pa ruamu, agoi Zaione ta raovomu.
3Ura hiera gua si zama nia e Zihova: “Agoi si ta holuholu palae moka mo, meke loke poata si kote tabaria Rau pana ta vagi pule si agoi.”
4Ura hiera gua si zama nia e Zihova sa Baṉara: “Totoso kekenu si gore la koa pa Izipi sari Qua tinoni; hola soku vuaheni si ari pa Asiria si mae raovo vagi dia tie.
5Meke kamahire si nasa si hire? Ura sari Qua tie si ta vagi taloa meke lopu ta holu, meke sarini pu baṉara ni si va sisire ni rini. Meke doduruna sa rane si ta zama va kaleana sa Pozaqu Arau,” zama vura gua se Zihova.
6Zama pule si Asa, “Gua asa ke kote tumae nia ri na Qua tinoni sa Pozaqu; ke koasa rane asa si kote tumae nia rini sapu Arau tozi va kenue nia sa tinarupaha. Uve, na Arau tugo tozia.”
7Nake tolavaedi koari na toqetoqere sari nenedi ri na tie pu palekia sa inavoso leana, pu zama vura nia sa binule, pu paleke mae nia sa inavoso leanana pu zama vura nia sa hinarupu, pu zama koe Zaione, “Sa mia Tamasa si na Baṉara!”
8Va avoso! Sari mua tie kopu si velavela; korapa kukili qetuqetu varigara hiroi. Totoso pule la pa Zaione se Zihova, si kote dogoro soti nia matadia rini.
9Mi keke gua poraka vura pa kinera qetuqetu, gamu na vetu ta huaradi pa Zerusalema, ura ele va manoti e Zihova sari Nana tie, na ele vata rupahia Sa sa popoa Zerusalema.
10E Zihova kote tavetavete nia sa Limana hopena pa kenu dia ri doduru butubutu, meke doduru hukihukirina sa popoa pepeso kote dogoria sa hinarupu tanisa nada Tamasa.
11Mi rizu vura, rizu vura, vura taloa vasina! Lopu tiqua keke tiṉitoṉa bonina! Vura vasina mamu koa via, gamu pu paleki sari likakalae hopedi te Zihova.
12Ba lopu kote bebeno vura si gamu babe govete tome; ura se Zihova si kote ene pa kenu mia, sa Tamasa pa Izireli si kote kopu pa mudi mia.
13Doṉo la, sa Qua nabulu si kote tavete va gilae; kote ta ovulu sage si Asa meke ululu sage tu meke nomana la tu sa vinahesina Sa,
14gua ba soku si doṉo la meke hodahodaka, na ta huara meke doṉo hikare sa isumatana na tinina Sa, hola nia sapu boka ta tavete la pa tie meke sa kinehana Sa si ta ṉovala hola nia sa kineha tana tie.
15Ke kote va via i Sa sari soku butubutu, meke sari baṉara si kote tukui ṉuzudia pa laena Sa. Ura sapu lopu ta tozi nia rini, si kote dogoria rini, meke sapu lopu ele avoso nia rini, si kote gilania rini.
