1Noravano Kotiva Mosira tiva amiro tiharo,
2Are Midiani vatanaaka ni Isareri qoraiqama nimitorara irihara vika nái qoraiqama nimitaane. Are vika qoraiqama nimitera viraqaahaira ho are qutu vinarave.
3Kotiva minti tuvaro Mosiva Isareri tiva nimiro tiharo, Ne timanta niqihai iqoka vaiinti hini kiaka auvihehavaa vare oru Midiani hampata raqiha vika Nora Kotira qoraiqama amitorara irihama vika náivata qoraiqama nimitaate.
4Ne Isareri 12 anku vohaiqa vohaiqaqihai 1,000 iqoka vaiinti kaamate vara kaimanta vika raqireka vuate, tiro.
5Mosiva minti tumanta Isareri vika nái anku vohaiqa vohaiqaqihai 1,000 iqoka vaiinti kaamaqi vivi, 12,000 iqoka vaiinti ntita vatovaro
6Mosiva vika iqoka raquate tiro nititora. Viva Kotira kaiqa vara amite vau vaiintira Eleasaara maaqu Finiaasira viravata atitovaro Finiaasiva vireva iharo Kotira Naavuqiraa haika vonavu varero, aanumaara/noma vonavuvata, iqoka vaiintiara mini vuate maini aniate tiro vuaqe vau aanumaarara, vinavuvata varero vura.
7Ho Noravano Kotiva Mosira tiva amuntemake, vika oru Midiani hampata raqiha Midiani vaiinti ekaa aru taiqa kora.
8Vika raqiha Midiani avuhainaa vaiinti kauqurunavu Evirave, Rekemirave, Surirave, Hururave, Rebaarave, aruke, Beora maaqu Balaamiravata aru kora.
9Aru taiqake Isareri Midiani vika nahentive, vaintive, ekaa purumakauve, sipisipive, vika ekaa koqe airaira vatorave,
10vi haikara vi haikara ekaa vare, viraqaahai Midiani vika naavu maaqavata vatukavata iha quara kora.
11Mintiake vika nahentive, vaintive, purumakauve, sipisipive, ekaa vi haikara vi haikara vare
12Mosika, Eleasaaka, Isareri hampata vaunaini vuru kora. Vi entara vika uqita kanta vauvaro Ieriko vatukavano Iotani Namari hini mantara vuruni vaura.
13Mosivavata Eleasaavavata ekaa Isareri nora vaiintinavuvata vatuka mini ke, oru nái iqoka vaiinti ntita kareka vumanta
141,000 iqoka vaiintiqaave, 100 iqoka vaiintiqaave, raqiku opisaaka raqunaihai orurante anuvaro Mosiva vika nitura.
15Viva vika nitiro tiharo, Ne nantihae nahenti kia arukaraiti, qaqi vika ntita vare aniavo?
16Ne kankomake iri tavaarave. Nahenti vikama Balaamira uva avate vaura kaara tinavu vaiinti nahenti Peoraini vau entara Nora Kotira qaqirake una variqa quahama amitovaro vira kaara qora rovaravano Kotira vaiinti nahentiqi qovarama vurave.
17Virara irihama ne ekaa qorainti vaintivata, ekaa nahenti qorainti hampata vaitekavata, aru taiqa kaate.
18Mintiake aruke, ekaa nahenti kia qorainti hampata nika, vikama nenta varataate.
19Ne vaiinti arukekave, qutu vuaka utu varekave, ne kia vatukaini viraiti, 7 entanavu aaqainima variate. Mini vaiha, taaramo entaqaavata, 7 entaqaavata, ne avu aato muntuka hiqe okarara iriha nentavata, ne iqokaqihai ntite ani nahentikavata, vi okarara avateha variate. Ne mintimake, ne Kotira avuqaa homa vaivarave. (19:11)
20Ne vi okarara avataivaro ne vate haikavavata Kotira avuqaa ho variarire. Ekaa ni utavaaqave, purumakau pahiqohai autu taarave, memeraa kaahiqohai autu taarave, katariqohai autu taarave, vi haikara vi haikara mintima keha hiqaate, tiro.
21Mosiva minti tuvaro Kotira Naavuqi kaiqa varo vaiintiva Eleasaava raquanaihai anu vaiintikara tiharo, Noravano Kotiva Mosirara tivato uvara ne avataqi vuate. Mintimama vaivo:
22Ihavano kia ho ita kaainara, kori orive, silvaa orive, aini orive, baraasi orive, vo orive, vi orira vi orira ihaqi vataivaro ihavano qumina haika ori vataakero vainara ita kairaro orivanoqai variarire. Ekaa voki haikara ihavano ita kaantorave ti, namariqi quntama kaivaro hiqama vuarire.
24Ne mintiaqi viha 7 entaqaa nenta utavaaqa hiqamake, ne Kotira avuqaa ho hiqamavi vaika vaiha ho vatukaqi oriqetevarave, tiro.
25Eleasaava minti tuvaro qaiqaa Noravano Kotiva Mosira tiva amiro tiharo,
26Arevata, Eleasaavavata, vo anku vo anku qiata vaiintivata, nenavu vaiha iqokaqihai ntite aniaka, nahentive, vaintive, quara vairive, ekaa vika kaara ntuate.
27Nenavu ekaa vi haikara rairake taaraqantaqaa vate, voqaahainaara iqoka vaiinti raqireka vuaka nimi, voqaahainaara maaqaini variaka nimiate.
28Nenavu iqoka vaiinti nimiraqihai ti Nora Kotikara irihama takisi varaate. Nenavu 500 vainti nahenti rumpavare aniakaqihai vohaiqa ti timi, purumakaue, sipisipie, memeraae, donkie, 500 qihai vohaiqa vohaiqa varake, ti timitaate.
29Ho ne vi takisira Eleasaara amivaro viva ti Kotikara iriharo tuataarire.
30Nenavu vaiinti nahenti maaqaini variaka nimireka iraqihaivata takisi varaate. Nenavu ekaa 50 vainti nahenti rumpa vare aniakaqihai vohaiqa vare, purumakaue, sipisipie, memeraae, donkie, 50 qihai vohaiqa vohaiqa varake, vira Rivaira anku ti seri naavuqaa raqikiaka nimiate, tiro.
31Noravano Kotiva minti tumanta Mosika Eleasaaka viva Mosira tiva amuntemake, vi haikara rairakora.
32Iqoka vaiinti nai navutaaka hampata raquraqihai vare anu haikava vaireva, maantimama vairo: Sipisipi 675,000
33purumakau 72,000
34donki 61,000
35varaata kia vaiinti hampata vaitoka 32,000.
36Vi haikara avutaqaa rairake, hini iqoka vaiinti iqoka raqireka vuka nimura: 337,500 sipisipi.
37(675 sipisipi Nora Kotira takisi amitora.)
3836,000 purumakau. (72 purumakau Nora Kotira takisi amitora.)
3930,500 donki. (61 donki Nora Kotira takisi amitora.)
4016,000 varaata. (32 varaatanavu Nora Kotira takisi amitora.)
41Mosiva vi haikara takisi amitora varakero Eleasaara Noravano tuntema kero amura.
42Mosiva iqoka vaiinti raira nimuntema kero, vaiinti nahentivata raira nimura. Vaiinti nahenti vika 337,500 sipisipi vare, 36,000 purumakau vare, 30,500 donki vare, 16,000 varaatanavu varora.
47Mosiva vi haikara mintima kero rairakero ekaa 50 vainti nahenti rumpa vare anukaqihairo voqa vita varero, purumakau vo, sipisipi vo, donki vo, memeraa vo varero, Noravano Kotiva tunte iro, Rivaira anku Kotira seri naavuqaa raqiki vauka nimura.
48Mintiakero nimumanta opisaa vaiinti 1,000 iqoka vaiintiqaave, 100 iqoka vaiintiqaa raqikukavata, Mosiva unaini orunte
49vira tiva ami tiha, Nora vaiintio, tenavu tentanavu iqoka vaiinti ekaa kaara ntuvake tavauramanta iqoka raqunaraqihairo kia voqavanovata qutu vivo.
50Mintiverama tenavu kori oriqohai aututaa haikara, irarave kaatavave aatoqi vahehema/vaataiqama taarave auntaqi ruvutaarave, tenavu ekaa vi haikara vare anunara vira Kotira amitarerave. Noravano Kotiva kia navutaaka qaqi kaimanta tinavu qoraiqama timitaarara iriha, tenavu vi haikara vira amirerave, ti.
51Opisaa vaiintinavu minti tumanta Mosika Eleasaaka kori oriqohai aututo haikara nimura varora.
52Kori oriqohai aututo haikara vira maaravano vaireva, aumaqaa 200 kilo vaura.
53Qaqi iqoka vaiinti vika iqoka raqiha vi haikara vi haikara varora kia Mosika Eleasaaka nimiraiti, qaqi nái tuatora.
54Noravano Kotiva Isareriara iriharo vika kahaqiarire ti, Mosika Eleasaaka opisaa vaiintinavu nimu kori orira vare, Kotira Seri Naavuqi vuru vatora.
