1 ፂሞቲዮሳ 3

1

2

3

4

5

6

¹ኦኒካ፥ «ዎሳ ኬꬂ ካሌꬂያ ኣሲ ጊዳናው ኮይኮ ሎዖባ ኣሞቴስ» ጊያ ኦዳይ ቱማ።

²ዎሳ ኬꬃ ካሌꬂያ ኣሲ ቦሬቶናይሳ፥ ኢሲ ማቺ ፃላሊ ዴዔይሳ፥ ማራን ዴዔይሳ፥ ባና ሃሬይሳ፥ ቤሴይሳዳ ኦꬄይሳ፥ ኢማꬄ ሞኬይሳ፥ ታማርሳናው ዳንዳዔይሳ፥

³ማꬆቶናይሳ፥ ኦዬቶናይሳ፥ ፓላሞናይሳ፥ ሚሼ ሲቆናይሳ፥

⁴ኢያ ናይቲ ኢያው ኪቴቴይሳኔ ቦንቼይሳ፥ ባ ኬꬃ ኣይሳናው ዳንዳዔይሳ ጊዳናው ቤሴስ።

⁵ኢሲ ኣሲ ባ ኬꬃ ኣይሳናው ዳንዳዖና ኢፂኮ፥ ፆሳ ዎሳ ኬꬂ ዋቲ ኣይሳናው ዳንዳዒ?

⁶ኦቶሮን ሱጌቲዲ፥ ፃላሄይ ፆሳ ፒርዳን ኩንዲዳይሳዳ ኩንዶና ሜላ፥ ኦራꬂ ኣማኒዳ ኣሲ ጊዳናው ቤሴና።

⁷ቦሬኒኔ ፃላሄ ፂሄን ጌሎና ሜላ ሄ ኡራይ ኣማኖና ኣሳ ማታን ናሼቴይሳ ጊዳናው ቤሴስ።

⁸ሄሳዳ ቃሲ ዎሳ ኬꬃ ዳቆኔቲ ቦንቼቲዳይሳታ፥ ናምዑ ዶና ኦዴቶናይሳታ፥ ዳሮ ዎይኔ ኡሻ ኡዮናይሳታ፥ ሚሼ ያሬቶናይሳታ፥

⁹ኣማኑዋ ፁራ ጌሻ ካሃን ናጌይሳታ ጊዳናው ቤሴስ።

¹⁰ኤንቲ ኮይሮቲዲ ፓጬታናው ኮሼስ፤ ኤንታ ቦላ ቦሬይ ባይና ኢፂኮ፥ ዎሳ ኬꬃ ዳቆኔ ጊዲዲ ኦꬆ።

¹¹ሄሳዳካ፥ ኤንታ ማጫሳቲ ቦንቼቲዳይሳታ፥ ዚጊሮናይሳታ፥ ማራን ዴዔይሳታ፥ ኡባባን ኣማኔቴይሳታ ጊዳናው ቤሴስ።

¹²ዎሳ ኬꬃ ዳቆኔቲ ኢሲ ማቺ ፃላሊ ዴዔይሳ ጊዶ። ባ ናይታኔ ባ ኬꬃ ሎይꬂ ኣይሴይሳ ጊዳናው ቤሴስ።

¹³ዎሳ ኬꬃ ዳቆኔ ጊዲዲ፥ ሎዖ ኦሶ ኦꬄይሳቲ፥ ኤንታው ጊታ ቦንቾ ቃሲ ኪሪስቶስ ዬሱሳን ባንታው ዴዒያ ኣማኑዋባ ኦዳናው ዳሮ ሚኖቴꬂ ዴማና።

¹⁴ታኒ ሃ ኪታ ኔው ፃፋሼ፥ ኤሌሳዳ ኔኮ ባና ጋዳ ኡፋይሲ ዎꬃይስ።

¹⁵ሺን ታኒ ቦና ጋምዒኮ፥ ፆሳ ኬꬃን ኣሳይ ዋኒዲ ዳናው ቤሲያኮ ኤራና ሜላ ሃይሳ ኔው ፃፋይስ። ዴዖ ፆሳ ኬꬃይ ቱማቴꬃስ ቱሲኔ ባሶ።

¹⁶ኑ ኣማኑዋ ፁራይ ሲꬌይ ባይና ጊታ። ኪሪስቶሲ ኣሾ ማዒዲ ቆንጪስ፤ ኢያ ቱማቴꬃ ጌሻ ኣያናይ ማርካቲስ። ኪታንቾታስ ቤንቲስ፤ ኢ ካዎቴꬃ ኡባስ ሳባኬቲስ። ኣላሜን ዴዒያ ኣሳን ኣማኔቲስ፤ ቦንቾን ሳሎ ኤኬቲስ።