1 ፂሞቲዮሳ 2

1

2

3

4

5

6

¹ኡባፌ ሲንꬃታዳ፥ ኣሳ ኡባስ ፆሳ ኦይቻናው፥ ዎሳናው፥ ጋናታናዉኔ ጋላታናው ቤሴይሳ ታኒ ኔና ኣኬኪሳይስ።

²ኑኒ ቱማ ኣያና ዴዖኒኔ ጌሻቴꬃን ፆሳ ጎይኒሼ ሳሮቴꬃኒኔ ዎፑ ጊዳ ዴዖን ዳና ሜላ ካዎታሲኔ ሹማታ ኡባስ ዎሲቴ።

³ሄሳ ሜላ ዎሳይ ኑና ኣሺያ ፆሳ ሲንꬃን ሎዖኔ ኡፋይሲያባ።

⁴ፆሳይ ኣሲ ኡባይ ኣታናዳኔ ቱማ ኤራናዳ ኮዬስ።

⁵ኢሲ ፆሲ ዴዔስ። ፆሳፌኔ ኣሳፔ ጊዶን ጊዲዲ ሲጌꬂያ ኢሶይ ዴዔስ፤ ኢካ ኣሴ ጊዲዳ ኪሪስቶስ ዬሱሳ።

⁶ኢ ኣሳ ኡባ ዎዛናው ባና ኣꬂ ኢሚስ። ፆሳይ ባ ዎዲያን ኣሳ ኡባ ዎዛናው ኮዬይሳ ቤሲያ ማርካይ ሃይሳ።

⁷ፆሳይ ታና ዎንጌላስ ኣስታማሬኔ ሃዋሬ ኦꬂዲ ዶሪዳይ ሄሳሳ። ታኒ ቱማ ኦዳይስ፤ ዎርዶቲኬ፤ ኣማኖኔ ቱማ ኣይሁዴ ጊዶና ኣሳስ ማርካታና ሜላ ፆሳይ ታና ሹሚስ።

⁸ሄሳ ጊሾ፥ ኡባ ቤሳን ዴዒያ ኣዴቲ፥ ባንታና ፆሳስ ዱማዪዲ፥ ሃንቆኔ ፓላማ ዲጊዲ፥ ባንታ ኩሺያ ፑዴ ዴንꬂዲ ፆሳ ዎሳና ሜላ ኮያይስ።

⁹ሄሳዳ ማጫሳይ ባንታና ሃሪዳይሳ ቆንጪሲያ፥ ቦንቾይኔ ማሪ ዴዒያ ማዑዋ ማዓናው ቤሴስ። ኤንቲ ማሪ ባይና ሁዔ ዳꬃን፥ ዎርቃን ዎይኮ ኢንቆን፥ ዎይኮ ኣልዖ ኣፊላን ባንታና ኣሌቂሶፖ።

¹⁰ሺን ፆሳስ ጎይናይስ ጊያ ማጫሳይ ባንታው ቤሴይሳዳ ሎዖባ ኦꬆና።

¹¹ማጫሲ ኪቴቴꬃን ሲዒ ጊዲ ታማሮ።

¹²ታኒ ማጫሳይ ታማርሳና ሜላ ዎይኮ ኣዴ ቦላ ኣዋታና ሜላ ጊዶናሺን ሲዒ ጊዲ ዳና ሜላ ኮያይስ።

¹³ኣዳሜይ ኮይሮ ሜꬌቲስ፤ ጉዬፔ ሄዋና ሜꬌታሱ።

¹⁴ቃሲ ጪሜታዳ ፆሳ ሂጊያ ሜንꬂዳይ ማጫሲፔ ኣቲን ኣዳሜ ጊዴና።

¹⁵ሺን ማጫሲ ኣማኖን፥ ሲቆኒኔ ጌሻቴꬃን ባንታና ሃሪዲ ዴዒኮ ናይታ ዬሎን ኣታና።