Timɔtee I 3

1

2

3

4

5

6

¹Ide ilu nɑɑnɛ wee. Bii inɛ ɡɔ í bi nŋu ku jɛ inɛ nɡbo si iɡbɛi inɛi Jesu ŋɑ, icɛ jiidɑi í bi.

²Í sĩɑ lɑfɛ̃ɛ ku mɑɑ̀ nɛ tɑɑle ɡɔ nɔ ku nɛ ɑbo ɑkɑ̃ leɡe leɡe, si ɑnyiɛ nɔ ku jɛ inɛ ɡɔ iyi í yɑ sɑku nɔ ku mɑ̀ ɑrɑɛ, ku mɑɑ̀ jɛ ɑmɑnɛ yɑkɑ yɑkɑ, ɑmmɑ ku jɛ inɛ ɡɔ iyi í yɑ yɑɑɛ inɛ njoo ŋɑ nɔ ku jɛ inɛ ɡɔ iyi ɑ́ yɔkɔ ku kɔ inɛ ŋɑ si cio.

³Nɔ ku mɑɑ̀ jɛ woo mɔ ɑtɛ̃ wɑlɑkɔ woo bi ijɑ, ɑmmɑ ku jɛ ilu suuru iyi wɑ dɛ lɑɑkɑi ku sũ, nɔ ku mɑɑ̀ jɛ woo bi fiɑ yɑɑmɔ.

⁴Nɔ ku jɛ inɛ ɡɔ iyi í nɔ kpɑsɛ̃ɛ mɑm mɑm, nɔ ɑmɑɛ ŋɑ ɑ̀ yɑ jirimɑɛ nɔ ɑ̀ mɑ̀ bɛɛrɛi inɛ ŋɑ.

⁵Ntɔ ntɔ, bii inɛ kù mɑ̀ bɛi ɑ́ ce ku mu kpɑsɛ̃i nŋu tɑkɑɛ, bɛirei lɑfɛ̃ɛ ɑ́ ce ku mu inɛi iɡbɛi Ilɑɑɔ̃ ŋɑ.

⁶Nɔ kù sĩɑ ku jɛ inɛ iyi í dɑsi Jesu nɑɑnɛ titɔ̃ titɔ̃, domi ɑ́ yɔkɔ ku nɑ ku nɛ fɑɑu nɔ Ilɑɑɔ̃ ɑ́ yɛ tɑɑleɛ bɛi í yɛ tɑɑlei Seetɑm.

⁷Si ɑnyii nŋu, í sĩɑ hɑi dɑsi Jesu nɑɑnɛ ŋɑ ɑ mɑ́ɑ jɛ sɛɛdɑ jiidɑɛ ku bɑ ɑ mɑɑ̀ dondɑɛ, nɔ ku mɑɑ̀ nɑ ku dɑsi cɛkũm dii Seetɑm.

⁸Bɛɛbɛ mɔi woo ce icɛi iɡbɛi inɛi Jesu ŋɑ ɑ́ sĩɑ ɑ jɛ inɛ ŋɑ iyi ɑ̀ nɛ bɛɛrɛ, ɑ mɑɑ̀ ti ɑ jɛ ilu ɡɛlɛ minji ŋɑ, wɑlɑkɔ woo mɔ ɑtɛ̃ yɑɑmɔ, wɑlɑkɔ woo dɛ fiɑ do bisi lɑɑlɔ.

⁹Ammɑ í sĩɑ ɑ leekĩ dim dim si nɑɑnɛ ku dɑsi do idɔ iyi í mɑ́.

¹⁰Nɔ í sĩɑ ɑ cɔ lɑɑkɑi nŋɑ titɑ̃. Bii ɑ̀ yɛ ɑ kù nɛ tɑɑle ɡɔ ɑ bɛi ɑ lɔsi icɛ nŋɑ ku ce.

¹¹Bɛɛbɛ mɔi í sĩɑ ɑbo nŋɑ ŋɑ ɑ jɛ inɛ ŋɑ iyi ɑ̀ nɛ bɛɛrɛ, nɔ ɑ mɑɑ̀ jɛ woo sɔ irii inɛ, ɑmmɑ ɑ jɛ woo ɡɑyɑ ŋɑ iyi ɑ̀ nɛ nɑɑnɛ si mii fei.

¹²Í sĩɑ woo ce icɛi iɡbɛ ŋɑu ɑ jɛ ilu ɑbo ɑkɑ̃ leɡe leɡe nɔ ɑ jɛ inɛ ŋɑ iyi ɑ̀ nɔ ɑmɑ nŋɑ ŋɑ do inɛi kpɑsɛ̃ nŋɑ ŋɑ mɑm mɑm.

¹³Woo ce icɛ ŋɑu, bii ɑ̀ wɑɑ ce icɛ nŋɑ do inɔ ɑkɑ̃ ɑɑ nɛ bɛɛrɛ si kuwɛɛ nŋɑ, nɔ ɑɑ nɛ idɔ ku bubɑ ntɔ ntɔ si nɑɑnɛ ku dɑsi iyi Jesu Kirisi wɑ mu nwɑ.

¹⁴Ǹ dɑsi idɔ n nɑɑ n yɛɛ, ɑmmɑ ǹ kɔɛ tiɑu ihɛ̃ wɑi

¹⁵ku bɑ bɑɑ bii í nɑ wɑ kpɛi, i mɑ̀ bɛi í jɔ inɛi nyɑɑnzei Ilɑɑɔ̃ ŋɑ ɑ mɑɑ nɛò ɑrɑ nŋɑ, wɑɑtɔ inɛi iɡbɛɛ ŋɑ, nŋu iyi í jɛ icui kuwɛɛ. Iɡbɛui í yɛ bɛi sɔbei ntɔu do ɡbuɡbɑ̃ɛ.

¹⁶Do ntɔ, inɛ ɡɔ kù wɛɛ iyi ɑ́ yɔkɔ ku jɑ̃ kulɑi ɑsiii kpɑ̃ɑi Ilɑɑɔ̃ ku tɔɔ nwɑ. Kirisi í bɑɑ í jɛ ɑmɑnɛ nɔ ɑ̀ yɔɔ, Nɔ Hundei Ilɑɑɔ̃ í jɔ̀ ɑ̀ mɑ̀ iyi inɛ dee deei. Amɑlekɑ ŋɑ mɔ ɑ̀ yɔɔ. À wɑɑzo ideɛ si dimi bɑɑ yoomɑ fei. Nɔ ɑ̀ dɑsi ideɛ nɑɑnɛ si ɑndunyɑ. Nɔ ɑ̀ soo lele í nyi si ɑmboeɛ.