1Ma heh zingchuipaw bia a cang. Ahohmai a lungchung tah hotu raihre dunah a hnui caco, raichaw hre a du tahnah a cang.
2Hotu rai a hrepaw cawh reipachianah a ung lypaw, canu pakheh pasae a cangpaw, a lung a sypaw, a hraipaking khypaw, zawchuipaw, hluihlang a thaipaw, cawngpah a thaipaw,
3zu rui ahmang lypaw, a thing a paching lypaw le a ningnaipaw, a hrychae ahmang lypaw, tangka cho tlechainah a hnui lypaw a cang a.
4Ama a ingchungkho khah achaw teitah mingkai tei, a sawtei leh zong tah a bia aa ngepaw le aa cizawpaw a cang a.
5Canghrasala, ama a ingchungkho hmai a mingkai khy lypaw tah zekhatamaw Khazing khrisawbu cawh a mingkai khy a?
6Ama cawh zingtu thapaw cang a be, ma tah ly co a palai a patui tah ung ka, Setan biacenah hratah a ing sua a.
7Ama cawh alailang teipaw cawngsaw zong tah aa reithaipaw mehnung a cang ruapaw a cang, ma tah ly co reipachianah letah tlah tlamy ka, Setan sahrui letah a awh pang a.
8Khrisaw hruitu sahlo zong, ma thly thly hraco, zawchuipaw mehnung, zing a chuipaw, zu a raang lypaw, ahmang lypaw a mia sangnah a hui lypaw a cang he a.
9Canghrasala chiachaw thluidangnah lungthing a pathaipaw khatah zingnah biahmuisui khah a tlepaw a cang a.
10A hmetaw letah pase taw cang he seh la, ma khy taico aa cung letah suisenah zehmai a ung ly caco khrisaw hruitu rai cawh hre he seh.
11Ma hraco aa nupui sahlo zong cawh cizaw tlang a tlahpaw, bia a du lypaw, zezongpui letah zingchuipaw le a sungnah a hnui khypaw cang he seh.
12Khrisaw hruitu cawh nupui pakheh sui a hnuipaw cang a ka, a ingchungkho le a sawtei leh zong achaw teitah a uh khypaw a cang a.
13Rai achaw teitah a hrepaw sahlo taco ming chahnah hmuh a he ka, Khri Zisu zingnah letah raechahnah khah aa hnui a.
14Nama kha a vong pating pawtah ka hnabei a sui ky thlang naná teitah ma biataipaw heh nama khatah ka va ciapaw cang ka,
15ma pawco ka va haa sua pawtei a cang caco, biahmuisui thahrang le asuh tung a cangpaw Khazing hring khrisawbu, Khazing ingchungkho lekhei ming vytei tah zehratamaw khua aa sah a tahpaw khah na hni khy a.
16Zekhatahmai ei khy a cang lypaw Khazing kaa behnah letei a lemari biaparuh a cangpaw cawh a rungnaw, Ama cawh pungsaw tah a lang ka, Thlawpaw tah mehding a cang tahpaw a palang. Vaiming sahlo tah aa hmuh, phingting hrong letah a kong rei a cang, khazaw cawngsaw mehnung tah aa zing, rungnaw pawtah avai lang lahchy a cang.
