1Orek igii i tekentu kanaka, ma keren unune lo: Male tikas i ier isi tapiek nenge famfamu na lotu, nenge rokap na foim tom ae i tim pes ta u.
2Ke le tikas i ier isi tapiek nenge famfamu na lotu, i rokap le sinangu in tara aragii: Biil rin tiu u ini ti tier, in tikii sau e antu, wolwol kia in malal, in tikale foron wolwol laulau kia tom, i e matngan kaltu ae fanu ri bulat la lo, in tom somangat pes fanu una matanfel kia, ke i fasih in fausum fanu.
3Ke biil in tom umin dan rakrakai. Biil in tom ngalngaliaf, in kaltu una siaroh, ke biil in kaltu una fapue, ke biil in lala ier la isi pitkalang.
4I rokap male in nagogon fakasi matanfel kia, ke in fausum berberat kia la isi rin wong la sing i ke rik bulat la lo.
5Male nenge kaltu biil i usum na nagogon fakasi matanfel kia, ke biil i fasih in parpar kale foron tom unune, na lotu ke God.
6Male i am sokiliis liu kia sau, ke biil in tapiek nenge famfamu, tarama ka falaumet u tom ma ka luut, ke ka tih na nagogon arae Satan.
7I rokap male nenge famfamu na lotu, in matngan kaltu ae fanu biil ri lotu la, rin bulat lo. Male biil, tarama ri ka orek laulau ulo, ke ka fiu na kuun ke Satan.
8Ifasih sabin usuf foron tom falupes na lotu, i rokap male rin matngan fanu ae i fasih fanu rin bulat lo ri, biil rin kaltu ae iwu la e kerme ri, biil rin fanu una lala umin dan rakrakai, ke biil rin fanu una akalemok.
9Rin posefat na tekentu na unune, ke rin usum tom le wolwol kiri i tortores.
10Gamen tof famu ta ri bii, male biil ti tier i tikale ri, ke aimang, gamek somangat ufu ri isi kep foim arae foron tom falupes na lotu.
11Ifasih sabin usuf foron antu ri, rin matngan kelefin ae i fasih fanu rin bulat lo ri, biil rin orek kumkum la. I rokap le in malal e wolwol kiri, ke rin tekentu na foron foim tikii.
12Ke nenge tom falupes na lotu, in tikii sau e antu, ke in nagogon fakasi berberat kia turan fanu tikii ae na fel kia.
13Fanseh ae ri foim rokap arae foron tom falupes na lotu, fanu rin bulat lo ri. Ke unune kiri lo Karisito Iesu in rakrakai lalala.
14Ia ier isi la sape usuf o, isau le ia wol le, in rokap male ian sisiit famu usuf o.
15Male ti tier i tikale iau ma biil ia tapiek sape, o ka usum tah na foron sinang ae fanu ke God rin tel u na fatpoto ri tom. Wara le fanu ke God ae i liu, ri arae nenge rakrakai na tuh na fel, ae i farakrakai orek tekentu.
16Tekentu, kere usum tom le, fafausum ae kere unune lo i tier laumet. Pakanini, i kiis mumun tah, isau le igii ka tapiek malal mang. I lame kerer isi unune lo God. Waran fafausum ae i aragii: Karisito i tapiek aragii kaltu, ke Tanwa Kalkaluu ka famalal u le, Karisito i tortores na mata God. Foron angelo ri par ta u, ma fafas lo ka sararah usuf foron mat tikii, ke fanu fuun na piklinbat ri ka unune lo. Ke God ka kep fatatkau u, ma ka fakiis u na memeh kia.
