1 Timoti 3

1

2

3

4

5

6

¹Kale numi weng baga-bom-nulup, “Tinum iyo, Kristen unang tinum imi tiin molin tinum kelan o agela umdii, boyo tambaliim o,” agan-nuubup boyo ki atin aafentap kale,

²kabo, tinum maak ulaa duli te tam Kristen imi tiin molin tinum kelak o agelap umdii, kanupmin kuguup waafulin tinum ita maak ulaa dulal o ageta kale, beyo atin fengmin binim tambaliim kup bom-balata, kek kek iyo imi fenga-be uyo kulbu kalaa age utam an-togonin binim ke-bom-nala e, unang imdal tagamin binim ke-bom-nala e minte, imi tiinemin tonamin uyo tele utama-bom-nala e, aget fugunin tambal uta kup fugun-bom-nala e, bet bubul uta kup kwego-bom-nala e, ipkumal migik tilip iyo imdep no am ilep kupka-e-bom-nala e, ipkumal kek kek iyo tambaliim kup kafale-bom-nala e,

³ok mafak uyo unan-bii ilum ilum kemin binim minte, yuut kup olsak tebe-bom ipkumal yemin binim bilili age-bom bet weng uta kup baga-e-bom-nala e, wengaal digin-kalin binim ke-bom-nala e, bonang aget min, tuumon aget uyo ugel kalagamin binim tinum e minte,

⁴imi kalel man iyo atin tambaliim kup tiin mo-bom kafale-bala man iyo aalap iyo aget tambal kobe-nilip imi weng uta kup tinangka-bom no kemin tinum ita maak ulaa dulal o ageta ko.

⁵Kale mungkup tinum ilami kalel man imi tele tiin momin umi kuguup uyo utamsaala binim beyo dogonubeta bagang-kale te tam God imi unang tinum imi tiin molin tinum kelan-temaala binim ko.

⁶Kale kanube tinum te tam kamaa God imi man keba iyo Kristen unang tinum imi tiin molin tinum kela umdii, beyo, “Nita kup o,” agan-bom kutaang tebeman-tema tap kale, kanuma umdii, God iyo tebe Saatan sugamiyok kanubela kaal fuyap kobesa ulutap ke tinum be kaal fuyap uyo kobelan-tema kale, kamaa Kristen keba iyo ulaa dugamin ba ko.

⁷Tinum iyo dok ita God imi ilak dolin binim bilip imi tiin diim uyo win mafak kup baga-emin tinum umdii, bemi ulaa dulap God imi unang tinum imi tiin molin tinum kelan-tema uyo, an-togon-bilipta, fitom tebebelu e, Saatan tebe yuut dep yang iinon-tema kale, tinum dok ita win tambal baga-emin tinum ita kup ulaa dulal o ageta ko.

⁸Kale ulutap kale, ibo, tinum iyo maak ulaa imdulup te tam pasta imi dong daga-emin tinum kelin o agelip umdii, kanupmin kuguup waafulin tinum ita maak ulaa imdulin o ageta kale, bilip iyo win tambal so ke-bom-nilip e, weng alop bagamin binim e minte, ok mafak umi aget kup ugel kala suun kup unan-kalin binim e minte, tuumon min umi mok uyo unan-bom suun kup kwaamin binim ke-bom-nilip e minte,

⁹tol kup tebesip tinum dital fagaa God imi tuluun weng tambal uta kup fomtuup waafulin kup ke-bom no kemin tinum ita maak ulaa imdulin o ageta kale,

¹⁰kamaki uyo ibo imi ogok uyo im-kugulipta, imi ogok uyo atin tol kemip kalaa age-nilipta, ita imkalipta, pasta imi dong daga-emin ogok uyo ke-bom-nilipta o ageta kale,

¹¹aa mungkup imi kalelal igil win tambal so ke-bom-nilip e minte, umik tem weng uyo bagamin binim ke-bom-nilip e, imi tiinemin tonamin uyo tele utama-bom-nilip e, tol kup tebesu kuguup uyo kup-kagamin binim, suun kup waafu-bom no kemin unang imi imagal ita maak ulaa imdulin o ageta kale,

¹²mungkup pasta imi dong daga-emin tinum igil unang imdal tagamin binim e minte, ilimi kalel man iyo atin tambaliim kup tiin mo-bom no kemin tinum ita maak ulaa imdulin o ageta ko.

¹³Kale pasta imi dong daga-emin tinum iyo dogap ita ogok tambal uyo kemip umdii, bilip iyo win tambal so ke-nilip e minte, finanin binim, bilip imi Yesus Krais imi ilak dugamin umi sang uyo fomtuup baga-e-bom no keman-temip ko.

¹⁴Niyo, yuut kapmi finang uyo no tolon o agan-bii kuta, koyo ise weng kosiik dola kopkeli utam-nalapta,

¹⁵kanube yuut no tilin-tem keli uyo, kapsino alugum God imi mulup tan iso ibo utamipta e, dogonupmin kuguup waafulan-temup uyo felepman-temu kalaa agelan-temip kale, God imi mulup tan kesip bilip iyo suun kup nin tinum God imi unang tinum bilip ita kale, Kristen unang tinum iyo God imi tuluun weng uyo ipkumal iyo baga-e-bilipta, senganan-nuubu ko.

¹⁶Kale God imi kuguup umi magam uyo kwiin kiim kale, siin uyo tinum iyo tele utamsaalip binim kuta, kamano koyo umi magam uyo kulbu botam. Bomi magam uyo Yesus Krais ita kale, Kristen nuyo bogo-nulup e, “Beyo mitam fen tinum kem ke-nala e, kemana e, God imi Sinik iyo kafalebela utamupta e, tinum beyo fen tol kup tebesa kalaa agelup e, ensel iyo atamip e, imi sang uyo yak abiip maak maak kelu e minte, kafin diim kasel unang tinum iyo imi ilak uyo do no kelipta, God iyo tebe duptamo tam abiil tigiin un-se o,” age bagan-nuubup ko.