1 Timoteus 3

1

2

3

4

5

6

¹San mi e taki now de fu fertrow. Efu wan sma wani tron tiriman fu a gemeente, dan na wan tumsi bun sani a wani.

²Wan tiriman fu a gemeente mus abi wan bun nen èn a mus abi wan frow nomo. A mus de nanga krin ai, a mus abi wan krin ferstan, èn a mus abi bun maniri. A doro fu en mus opo gi ala sma, èn a mus man gi leri.

³A no mus de wan sma di lobi dringi, èn a no mus de wan sma di e kisi atibron es'esi, ma a mus abi switi maniri. A no mus de wan trobiman, èn a no mus gridi fu moni.

⁴A mus de wan bun tiriman na ini en eigi oso, di e leri den pikin fu en tapu wan lespeki fasi fu du san a wani.

⁵Bika efu wan sma no man tiri en eigi oso, fa a sa man sorgu gi a gemeente fu Gado dan?

⁶Wan tiriman fu a gemeente no mus de wan sma di no drai en libi tumsi langa. Bika a kan kisi bigifasi, dan a o kisi a srefi strafu leki didibri.

⁷A mus abi wan bun nen na den sma di no e bribi, fu a no kisi pori nen èn fu didibri no man kisi en.

⁸Sosrefi den dinari fu a gemeente mus de sma di trawan kan lespeki. Den no mus de leki wan tumofo gon, den no mus lobi dringi furu win, èn den no mus suku fu abi wini tapu wan fasi di no fiti.

⁹Ma nanga wan krin konsensi den mus hori densrefi na den kibrisani san Gado sori wi fu a bribi.

¹⁰Fosi den sma disi tron dinari fu a gemeente, sma mus luku efu den fiti fu du a wroko. Baka te a sori tak' den o man, dan yu kan poti den leki dinari.

¹¹A mus de a srefi nanga den frow. Den mus de sma di trawan kan lespeki. Den no mus waka e pori trawan nen, ma den mus de nanga krin ai, èn den mus de fu fertrow na ini ala sani.

¹²Den dinari fu a gemeente mus abi wan frow nomo. Den mus kweki den pikin fu den bun èn sorgu bun gi den eigi oso.

¹³Bika den dinari di e du den wroko bun, e meki sma kisi lespeki gi den. Den sa man taki fri fu a bribi ini Kristus Yesus.

¹⁴Mi e skrifi yu den sani disi nanga aladi mi e howpu fu kon her'esi na yu.

¹⁵Efu mi tan tumsi langa fu kon, dan yu sabi fa den sma mus tyari densrefi ini a oso fu Gado, sobun a gemeente fu a libilibi Gado. Na a gemeente e tyari a tru leri èn na en na a stonfutu fu en.

¹⁶Fu tru, den kibrisani san Gado sori wi fu a bribi, bigi psa marki: Yesus kon leki libisma. A Santa Yeye sori tak' A bun ini Gado ai. Den engel si En. Den preiki fu En na ala den folku. Sma bribi ini En na ala sei fu grontapu. Èn Gado teki En go na ini a glori fu heimel.