1Iyavei co supi eté: acoi amove oico pota vahe Tũpa reroyasar rãro ãgua, ahe oipota mboravɨquɨ avɨye catu vahe.
2Sese acoi vɨreco vahe ocuaita Tũpa reroyasar rãro ãgua, ahe secoi tuprɨra mbahe avɨye vahe pɨpe yepi. Ipɨpe ava noñehei chira yamotarẽhɨsave. Iyavei omendara ñepei cuña reseño ité. Toñearo tuprɨ avei yuvɨreco, toyapo mbahe supi eté vahe, tiporomboetei tuprɨ avei. Iyavei omoinguera oyepɨri ava oyepota vahe güẽtave. Oicua aveira ava mbohe tuprɨ ãgua.
3Iyavei ndahei chira caguar tẽi. Ndosecai chiaveira ovava ãgua. Iyacatu rumo seco mbegüera opacatu ava upe. Ndoipota rai chiaveira guarepochi.
4Iyavei oicua tuprɨra güẽta pɨpendar rãro ãgua. Ombohe aveira guahɨr iporeroya ãgua, iporomboetei ãgua avei.
5Esepia, acoi ndoicuai vahe güẽta pɨpendar rãro, ¿mara ehira evocoiyase Tũpa reroyasar rãro?
6Tũpa reroyasar rãrosar rumo ndahei chira oipɨsɨ ramo vahe Tũpa opɨha pɨpe. Esepia, avɨyeteramo oyemboɨvate ai tiẽtera. Ipɨpe sui imocañɨprɨ avei secoira Caruguar nungar.
7Iyavei oyecua uca tuprɨ ranera Tũpa reroyasarẽhɨ pãhuve. Ahese ndipoi chira imboeteiẽhɨsa iyavei ndovɨapi chira Caruguar povrɨve.
8Iyavei Tũpa reroyasar rese ihañeco vahe yuvɨrecoira oporomboeteisa pɨpe. Tomboavɨye oñehe. Ndahei chira caguar tẽi; ndahei chiaveira guarepochi pota raisar tẽi.
9Iyacatu rumo, porombohesa supi eté vahe rese oyemboya catura opɨhañemoñeta catuprɨsa pɨpe yuvɨreco.
10Iyavei secoãhasa ranera. Acoi osẽ tuprɨse, ahese toyuvɨrecoi Tũpa reroyasar rese ihañeco vaherã.
11Iyavei sembireco yuvɨrecoi aveira oporomboeteisa pɨpe, nimahechiroi chira, osãro tuprɨra güecocuer yuvɨreco, iyavei imboyeroyaprɨ aveira opacatu mbahe rese yuvɨreco.
12Iyavei Tũpa reroyasar rese hañecosar ñepeiño itera sembireco, oicua aveira guahɨr rãro tuprɨ ãgua, güẽta pɨpendar rãro ãgua avei.
13Esepia, Tũpa reroyasar rese hañecosar oyapo tuprɨse oporavɨquɨsa yuvɨreco, ipɨpe sui imboyeroyasara. Osɨquɨyeẽhɨsave avei secoira Jesucristo reroyasa pɨpe.
14Che aso pɨhaivi pota nde repia. Aicuachía rumo co che ñehe ndeu
15acoi che aracahese, ereicuañora rumo pe reco tuprɨ ãgua ava Tũpa rese yuvɨrecoi vahe pãhuve; ahe acoi Tũpa oicove vahe upendar yuvɨrecoi, oyemovɨracua tuprɨ vahe yuvɨreco co porombohesa supi eté vahe mboyecua ãgua.
16Supi eté tuvichá eteprɨ Tũpa reco oyecua ramo vahe reroya tuprɨsa: Cristo oyemoporẽhɨ yande reco nungar pɨpe yandeu. Ipare Espíritu pɨpe imboyecuasa secocuer supi tuprɨ vahe. Iyavei Tũpa rembiguai rembiepiave secoi. Ichui imombehusa opacatu ɨvɨ rupi; opacatu rupi avei seroyasa. Iyavei ipɨsɨprɨ secoi ɨvave nara.
