1Betanga yo tiweta in moolmool. Le betanga tani in nen, kumata tamoto sa lono be iyei tool kuto mai pang di tooltool yo tigaua ye bareme ke Yesu nga, ngan tool tani in itara lono pang urata yo dook mata ngan leu.
2Ngan nanga, tool yo be iyei kuto mai pang bareme ke Yesu i, in tool la iyepe le yepongo ki dook mata le di tooltool tipuske touo busunu ki siap i, inbe tool la matana pang garup ataleu yo iyooloo koot i, inbe tool la ikan le iyin mata be i, inbe tool la ikaptutu dook ye yepongo ki i, inbe tool la itoo dada yo dook mata ye di tooltool matadi, inbe ya in ke be ikamata di lowo, inbe ya in tool dook mata ke be ipatomonai di tooltool ye betanga ke Maro lapau.
3Inbe tool tani in iyin ran medana mata le kuton moo ye tiap, inbe katen malmal a irau sokorai di tooltool tiap, bong iyepe le lono pusbe. Inbe tool tani in iye di tooltool tiparsu ye betebetanga tiap, inbe lono mai san pang pat ke yimoongoo so tiap lapau.
4Bong tool tani in matan kala rimana le di natunu le di rara ki yo iye di tiyepe ngan dook mata, inbe iyei di natunu tina a be nen ngan tiraua panga inbe titoo betanga yo iwete pang di ye nga le imot.
5Bong kumata le be tool tani in matan kala ya taunu rimana le di natunu ngan dook tiap nga, ngan o ke be matan kala di tooltool ke Maro yo tigaua ye bareme ke Yesu, ngan dook tiap lapau.
6Nen le tool yo nookoot yege iportaka lono a be itoo Yesu i, in ke be kataru a iyei kuto mai pang bareme ke Yesu tiap. Ole nen ngan itiki a ya taunu ipayiti ye urata ki yo iyei nga, ngan ole Maro iyemenaii ben tina yo be iyemenaia tool kuto mai kidi so sadi in nga. Le tool yo iyepe nen i, in ya taleu la be iyei tool kuto mai pang di tooltool yo tigaua ye bareme ke Yesu nga.
7Ngan la tool yo be ikaua urata nen i, in ke be di tooltool yo tigaua ye bareme ke Yesu tiap nga, ngan tikamata ben ya in tool dook mata. Ole nen ngan tigarungu ye betanga dook tiap, ngan ole lo itingi ye dowo ke tool kuto mai kidi so sadi.
8Ngan gaongo leu, di tamoto yo be tiyei suanga a be tilon di tooltool yo tigaua ye bareme ke Yesu nga, ngan be titoo dada yo dook mata ngan ye di tooltool matadi. Bong ke be tiwete pang di tooltool ngan medi ru ye betanga kidi tiap, inbe ke be tiyin ran medana mata a kutodi moo ye tiap, inbe ke be tillung di tooltool a tikap sokorai pat kidi tiap lapau.
9Bong betanga moolmool ke Maro yo ipatnaii paidi i, in tiparama le imede inbe tigaua lodi le imot be titoo. Muku ngan betanga tani in iken sollono, bong nookoot nga lod galanga ye.
10Le di tooltool yo be katar di nga, ngan katouo di muku ye urata a kakamata di ngan. Le kumata be tiyei urata dook mata le kapuske touo busunu kidi siap nga, ngan la be katar di a tiyei suanga pang di tooltool yo tigaua ye bareme ke Yesu nga.
11Ngan gaongo leu, di tooltool tina be tiyei suanga nga, ngan di rimadi ngan be titoo dada yo dook mata ngan ye di tooltool matadi. Bong di ngan ke be tiwete mur ye di tooltool tiap, inbe di ngan ke be tikan le tiyin mata tiap. Bong tiwete betanga kidi nga, ngan titoo le imot le lo itar kanono moolmool.
12Le di tooltool yo be tiyei suanga pang bareme ke Yesu nga, ngan ole matadi pang di garup tina yo tiyooloo di koot, ngan leu, inbe matadi kala di rimadi le di natudi le di tooltool kidi yo tiye di tiyepe nga, ngan dook mata.
13Di tooltool tina yo tiyei urata dook mata nga, ngan ole di tooltool tipayit di ye dada dook mata kidi yo tiyei nga. Nen le titattadai tiap, bong ole tikodo le timede a tiwete pang di tooltool ye lodi medana yo titaru pang Yesu Kirisi i.
14Timoti, lok be amala palbe pang yong. Bong awodo betanga tina ilo ye rau i pong,
15a be nen ngan kumata be atu ye so sa le amala tarai tiap nga, ngan ole betanga tina ipagalanga lom ye dada dook mata yo be idi tooltool yo tagaua ye bareme ke Maro koot, ngan tatoo nga. Ngan idi tooltool yo tatara lodo medana panga nga, ngan bareme ke Maro yo iyepe nen le taukan matenge i. Nen le idi nga dawa ben saua medana yo tipe a itoko rumu i, yesoo ye lodo medana yo tataru panga i, in taparama betanga tani yo moolmool in le imede.
16Le moolmool, Maro ipatnai dada dook mata yo lono be tatoo ngan paidi. Muku ngan betanga tani in iken sollono, bong nookoot nga lod galanga ye nen: Yesu in iyei tool moolmool a pombe mallangana. Inbe Maro Amunu Silene ipatnaii paidi ben ya in Maro natunu. Di bangabangana ke Maro tikamata. Inbe di tooltool tikaua betanga ki a tiweteweta pang di tooltool ke ni mai i le imot. Le di tooltool ke tana i ngan alunu kaiye la titara lodi medana panga nga. Motong la Maro ikauu a ilo pang malala ki, a be nen ngan iyeie ene le ilo ete ke be di tooltool tipayiti.
