Epístola 1 a Timoteo 3

1

2

3

4

5

6

¹Jisusa nemajuidaun diin atatus wakejuina duka, dekas pegkeg takata nuna wakegainak tuinawai.

²Tujash aents nunú takatan wakejauk pegkegchauji diigsaish jiyashtai amainai: Makichik nuwentin imá nuwejaig pujustatus wakeyin, emetug shiig esegag anentaimkau, eme anentsá diitai, jeen minitaish shiig aneas jukagtin, Apajuí chichame jintinkagtutnash dekau,

³nampechu, maanitnash wakeechau, kuichkinash imá nigki kuashat ajuttí tusa wakeechau, wait anenkagtin, kakagchau.

⁴Nuigtushkam niina jeenish shiig chichas pujú amainai. Uchijí aidaush apajinash umijin, eme anenkagtus diijatin amainai.

⁵Tuja ni jeenigkish shiig chichas pujachush, ¿itugsaya Jisusa nemajin aidaunash kuitamainaita?

⁶Tujash Jisusa nemajuina nuna diinuk yamá sujumankauk amaitsui, ememak iwanch wajukauwa numamtuk wajak suwimkan jumain asamtai.

⁷Nuigtushkam Apajuí nemagchau aidaush eme anentsá diitai amainai, pegkegchau chichajinum tau asa. Nunishtaik iwanch pegkegchau takamtiksamtai, Apajuí chichameshkam eme anentsá diiyam amainchau asamtai.

⁸Nunisag Jisusa nemajuidau atsumamujin diin aidaushkam ajantusa diimain amainai, ni chichakbaujinash imatiksag umin, nampechu, takat pegkegchau aina nujai kuichkijinatatus wakegá wekaechau.

⁹Nuigtushkam chichaman Apajuí iwaintugmakua nunash utujimtsuk dekaskeapi tinu amainai, nuniak dita dekaina nunisag pujumain ainawai.

¹⁰Jisusa nemajuidau atsumamujin diin agtina duka, eke adaitsuk wajuk pujawa nu diigmain ainagme, dutikam utugchatkesh atsugkui duwi adaimain ainagme.

¹¹Nuna nuweshkam aantsag ajantusa diitai amainai, chichama wekaetuchu, emetug shiig anentaimkau, ashí betek umin.

¹²Nunisag Jisusa nemajuidau atsumamujin diin aidaushkam makichik nuwentin, niina uchijinash shiig jintintin amainai.

¹³Jisusa nemajuidau atsumamujin diin aidau takatan shiig takainakug pegkegnum augmatam amain ainawai, dutikam niishkam kajinmamas, Kristu Jisusai kajintsá anentaimta nunashkam etsegmainai.

¹⁴Amina wainkatasan minita tayatkun juna papiin agajan awetajame,

¹⁵wi yajá aneasan megkaekuish Jisusa nemajin aidau ijunjamunmash, wajuk pujumainaita nunú dekaata tusan. Jutii Jisus nemajin aidautik, niina uchijí waigkú asaja, Apajuí tuke pujuwa nuna aentsji ainaji. Nunin asaja jutii ainaji dekaskea nunú etsejin aidautik.

¹⁶Dekas Apajuí iwaintugmakmawa nunuwai dekas ashí wagaakuk: Kristu aentsmaga wantinkauwai, Wakaní Pegkejishkam pegkegchaujish atsujui tiuwai, nayaimpinmaya aents aidaush wainkamu aajakuí, ashí nugkanum chichamesh etsegnakmatai, dita dekaskeapi tuidauk dekaskeapi tiaju ainawai, nunikmatai ataktú nayaimpinum jukimu aajakuí.