U-TIMOTI 3

1

2

3

4

5

6

¹“Ye se yu ‘Karasinga yombo talapemonga tapu-yemo molopo nokondu liemu paa papu.’ nimba pilielemo akumu kongono paa peanga tondolomo konopu mondolemo.” nirimu yemone ungu paa sika se nirimu.

²Akumunga, Karasinga yombomanga tapu-yemo molomba yemo yu ye paa sumbi nili ye se molopa, yombomane kanoko kiri pilingí ulu se yu-kinia naa peli yemo molopili. Tapu-ye molomba yemo yu ambo selumunga menu mindi molopili. Yu molopa kondopa, ulu peangama mindi konopu kimbu sipa, kimbu ki kangi konopu mélema yakala kolopa sembá mele mimi sipa nokopa, yombomane yu kanoko peanga pilku yunga unguma liku awi singí ulu peangama mindi sepa, yunga ulkana onge yomboma ‘Sukundu wangi.’ nimba nokopa kondopa, ⸤Pulu Yemonga unguma⸥ yomboma paa mimi siku pilingí mele sumbi sipa mane simba mele mimi sipa pilipa, aku sipa yemo molopili.

³No nomba amu naa topa, yomboma-kinia mumindili kolopa opa naa sepa, yomboma kinia taka lepa molopa, irinale konopu sipa sembá yemo naa molopa, kou-mone olandopa konopu naa mondopili.

⁴Yunga ambo bolangoma nokopa kondopa, yunga bolangoma yunga unguma taka leko pilku liku, liku awi siku molonge mele mane sipili.

⁵(Ye sene yunga ambo bolangoma nokopa kondomba mele naa piliemu liemu Pulu Yemonga yombo talapemo nambi sepa ⸤ “Molko kondangi.” nimba⸥ nokombaye? ⸤Manda mólo.⸥ Akumu pilipuli ‘yunga ambo bolangoma nokomba mele u kanani.’ nimbu nikiru.)

⁶Ye kokele Karasinga ye molombamo Karasinga yombo talapemonga tapu-ye se naa molopili. Aku sipa yemo tapu- yemo molopale kara pumbá kinia Pulu Yemone ⸤kurumanga nokoli⸥ depelemo kote sendepa “Kara purumumunga mindili nani.” nirimu mele yu aku sipa sembá kinia manda naa sembá ⸤kene wale mare awisili mele Karasinga yemo molopa umbu-konopu pemba kinia ‘Tapu-yemo molopili.’ nieni.⸥

⁷Yu molomba mele ungu se pea nikirula. Tapu-ye molomba yemo ultu molonge yombomane yu kanoko peanga pilku ‘Yu ye peangamo.’ ningí yemo mindi tapu-yemo molopili. Yu tapu-yemo molomba kinia ultu molemele yombomane “Yu ye kirimu.” ningí kinia ultu-yombomane ningu kinjingí unguma ⸤kurumanga nokoli⸥ depelemone lipa tapu-yemonga melu lemba kinia kanu yemo molopa kinjimba.

⁸Karasinga yombo talapemonga kongono sendeli ye molongema ono kepe aku siku mele molko kondangi: Yombomane ono kanoko peanga pilku ononga unguma liku awi siku, ‘ono olionga kongono sendeli yema molongi liemu papu.’ ningí uluma sekole kongono sengendo mimi siku pilku taka leko senge yema molko; konopuna ungu lupa pilku kerena ungu lupa ningu naa seko, yombo marendo ungu lupa ningu marendo topele toko ungu lupa ningu naa seko; no-tondolo awisili nongo amu naa toko, ‘⸤Karasinga⸥ yombomanga kongono sendepole kou-mone awisili limbu.’ ningí yema naa molangi.

⁹⸤Kanu yema⸥ olio Yesusi Karasini olionga nimba senderimu lipa tapondolemo mele ‘Sika.’ nimbu kuru mondolemolo yomboma Pulu Yemone ungu lopi serimuma nimba para sirimu ungu-sikama paa ambolonge yema molangi. Onone ungu sikama ambolongendo konopumuni pilkuli ‘Pulu Yemone kanopa kiri pilielemo ulu se konopuna naa pelemo. Kongono selioma sepo kondolio lémo.’ ningu pilkuli, ungu sikama ambolangi.

¹⁰Molonge mele u manda manjiku kanokole, ono molko kondoko, yombomane kanoko kiri pilingí ulu se ono kinia naa pepili molongi liemu ‘⸤Karasinga⸥ yombo talapemonga kongono sendeli yema molangi.’ nieni.

¹¹Amboma kepe, aku siku mele yombomane kanoko kiri pilingí uluma naa seko, uluma senge mele mimi siku pilku taka leko seko molonge amboma molko, yombo senga ungu-bulkundu naa nindiku, molko kondoko, ononga kongonoma mimi siku pilku seko kondonge amboma molangi.

¹²Karasinga yombo talapemonga kongono sendemba yemo yu ambo selumunga menu mindi molopili. Yunga ambo bolangoma nokopa kondopa, yunga bolangoma yunga unguma taka leko pilku liku, liku awi siku molonge mele mane sipa kondopili.

¹³Yombo talapemonga kongono seko kondonge yema yombomane liku awi siku ononga imbima ambolko paka tondolemele; Karasi Yesusi ⸤ ‘Sika.’ ningu⸥ kuru mondolemele mele olandopa kuru mondokole, aku siku kuru mondolemele mele pipili naa kolko yomboma sumbi siku ningu silimilila.

¹⁴I pepámo nu simbundu topo molopole ‘Nu kanambo.’ nimbu ‘Nu molenona nondopo paa wambo.’ konopu lepo molio.

¹⁵Aku-na-kolo ‘Ulu sene na pipi simba kinia manda nondopo naa ombónje kene’ nimbuli ‘Pulu Yemonga yombo molemelema seko molonge mele piliani.’ nimbu i pepámo u topo sikiru. Aku yomboma konde molopa mindi puli Pulu Yemonga yombo talapemo. Aku talapemo ungu-sikamo lipa tapondopa tondolo pumba pepili nilimú talapemo. Ungu-sika akumu ulkamo mele, Pulu Yemonga yombo talape akumu ungu-sikamonga ulka-simu mele.

¹⁶U Pulu Yemonga ungu se yuni mane sirimu ungu lopi serimumu kiniá mona nimba para sirimu aku ungumuni olio Pulu Yemonga yomboma molopo yuni kanopa peanga pilielemo uluma semolo mele lipa ora silimú aku ungumunga ulu-pulumu paa tondolomo, yombomane aku ungumunga pulumu manda toko mania naa mundungí. Aku ungu-pulumu i-sipa: Yu mana-ye se omba mona molorumu. Yu ulu-peangama sepa molopa kondorumu mele Minimuni lipa ora sirimu. Mulu-koleana angellomane yu kanoringi. Yunga semanemo ma-koleana pali ⸤yunga yombomane⸥ toko siliku andoringi. Yomboma kanu semanemo pilkuli ‘Sika.’ ningu kuru mondoringi. Pulu Yemone yu mulu-koleana olando lipa, yu u ye tondolomo molorumu kolea tondolo pa selina memba pumba mondorumu.