1Icon tsoan Diospan yorafo cushumisi ipaiquin yonoshosharafafainpaitiro.
2Nan nocofunu cushumisi shara fusti itiro. Ascano ahuara chaca ahuunoa shinainfocain cushumisi itiroma. Ahuin fusti ya icain pau fuchipaimisi iyamacain ahuara ahuuscarafiaino shinansharamisi icain ahuara shara fustisi shinanpaimisi icain ahuun pushu muran yora iquimasharamisi icain futsafo Diospan tsain tapimasharatiro icain.
3Paumisi iyamacain sutumitsapaimisiri iyamacain futsafo yoisharapaimisi icain. Ascataricai fochishmanantananpaimisi iyamacain pui noipaimisiri iyamacain. Nan cuscara nocofunu catonhuun icoinra huafo ato cushumisi inon.
4Ahuin yafi ahuun facufori ato ismasharaiton ahuun facufoan ahuunoa shinansharafain nicasharanonfo.
5Ascano ahuin yafi ahuun facufo nicamasharayamaino ahuuscashomun nan Diospan yorafo ichananmisifo ato nicamasharatiroquin.
6Ascacun nocofunun rama Jesús Ifoatocai ichananmisifo cushumisi itiroma. Nan cuscara man catoanfin shinanqui isca huatiroquin, —¡Aicho! Unfin fasi sharaquin. Ascan ua samamashta catoanfo un ato cushumisi inon. Ascan uncai futsafo cuscarama. Un ato finoncoianran, —icashon cacapaimisi itiro. Nannori Satanás noco shinanchacamapai.
7Ascacun isharaiton oinmisishacaquin nan icoinra huamafoanri ahuunoa shinansharacashon catontirofo nan ichananmisifo cushumisi inon. Nanscara iyamaiton Satanás ahuun nomuran shinanmatiro nan chaca huamisi cuscan. Ascashon nan chaca huamisifohuunoa shinanquicai a ichananmisifo tapimasharatiroma.
8Nanscarifiai ichananfo aton shara huashomisifo isharamisifo futsafoan atohuunoa shinansharafain icon fustisi yoimisifo. Nan cuscarafo ichananfo aton shara huashomisifo itiroquin. Iscarari itirofo. Paumisi iyamacain pui noimisiforicai itiroma.
9Ascashon tsoancai Jesushuunoa tapiyopaonima. Natian ahuunoa Diosin noco tapimanai cuscan tsoan nan icoinra huafoan shara huashomisi itiroquin. Ascano fasi finacaiquin Jesushuunoa tapipaicoian nan cuscarafin ichananfo aton shara huashomisi itiroquin.
10Tsoan ichananfo ato shara huashomisi ipaiyaiton iquisi oinsharayotirofo. Isharacoincaimain ahua chaca huamaquin. Ascan oianfo isharacoincacainaiton nan cuscara ichananfo shara huashomisi itiroquin.
11Aton ahuinfori isharacoinmisi icain yoiti huamitsapaimisi iyamacain paunmisiricai itiroma. Ahuara shara futsa aquifin Jesushuunshon asharamisi itiroquin.
12Nan ichananfo aton shara huamisifori ahuin fustiyafo itirofo. Ascashon ahuin yafi ahuun facuforifi onihuaniti. Nanfoanri Jesús tanasharanonfo.
13Nanscara shara huashomisi ichananfoan ahuunoa yoisharatirofo. Ascashon nanton nocon Ifo Jesucristo icoinra huaquin finacointiro.
14Uhuun facushtan Timoteo un mi ari cariscapaifiai un funa caiyamaquin un mia tapimai ahuuscashumain ichananmisifo isharatirofoquin. Uhuun cunuhuunshon un mia tapimayoi. Jesús icoinra huafo ichananmisifo nanfofin Diospan yorafoquin. Ascan nan Dios ipanaca. Ahuun tsain iconcoin ahuun yorafo nan ichananmisifohuunshon futsafori tapimaiquin.
16Icon atirifitocai tsoan Diospan tsain tapiataima isharashcaquin. Ascafia Jesushuunoashu non isharatiro. Aafin Apa Dios icariashu mai ano fotoni nocon cuscara yoracoin iishquin. Ascatarifi Diosin Yoshin Sharapan ismapaoni Jesuscai ahua chaca huamisima icon fustisi imisi. Diospan oinmati afu nai muran icafoanri oinnifo. Ahuunoashu manifoti futsafoan yoiqui isca huamisifo, —Jesús Upa Diosin facu. Ascashon arus fusti maton chaca soashotiroran, —ishon yoifoanfafainmisifo. Yoiaifoan nicacanashu atirifi manifoti anoshon icoinra huacani. Ascashu Jesús naafiashu mai murannoashu funini. Chipo afanan Apa icano nuinacahuani arifi nantifiton aton niaifocoin iishquin.
