1 ፂሞቲዮሳ 5

1

2

3

4

5

6

¹ጪማ ኣዴታ ኔ ኣዋዳ ቦንቻፌ ኣቲን ሃንቄቶፋ። ያላጋ ኣዴታ ኔ ኢሻዳ ኦꬃዳ ፄላ።

²ጪማ ማጫሳታ ኔ ኣዪዳ፥ ያላጋ ማጫሳታ ኔ ሚቺዳ፥ ፖሎ ጌሻቴꬃን ኦይካ።

³ኣዚኒ ሃይቂዳ ቱማ ኣምዔታ ቦንቻ።

⁴ሺን ኣምዔስ ናይቲ ዎይኮ ናይታ ናይቲ ዴዒኮ፥ ሄ ናይቲ ቱማ ኣያና ዴዖን ዴዔይሳ ቤሳናው ባንታና ዬሊዳይሳታኔ፥ ባንታ ዎጋ ኣዪዉኔ ዎጋ ኣዋ ማዲዲ ኩሼ ዛሮ ታማሮ። ሄሲ ፆሳ ኡፋይሲያባ።

⁵ባርካ ዴዒያ ቱማ ኣምዒያ ፆሳፌ ማዴ ዴማናው ኡፋይሳን ናጋሱ። ጋላሲኔ ቃማ ፆሳይ ባና ማዳና ሜላ ዎሳዉሱኔ ኦይቻዉሱ።

⁶ሺን ሃ ኣላሚያን ሎዖ ዱሳ ፃላላ ኮያ ኣምዒያ ፓፃ ዴዓሼ ሃይቂዳሮ።

⁷ኦኒካ ኤንታ ቦሮና ሜላ ሃ ኪታ ኤንታው ኢማ።

⁸ሺን ባ ዳቦታስ፥ ኡባፌ ኣꬂዲ ባ ሶ ኣሳስ ቆፖና ኦኒካ ባ ኣማኑዋ ካዲዳይሳ፤ ኣማኖና ኣሳፔካ ኣꬊዳ ኢታ።

⁹ላይꬂ ኡሱፑን ታሙ ኩሚቦና ኣምዔ ሱንꬃ ማዝጋባን ፃፎፓ። ቃሲ ሄሳ ቦላ ኢያ ባ ኣዚናስ ኣማኔቲዳሮ ጊዳናው ኮሼስ።

¹⁰ናይታ ዲሾን፥ ኢማꬄ ሞኮን፥ ጌሻታ ቶሁዋ ሜቻን፥ ሜቶቲያ ኣሳ ማዴን፥ ሎዖ ኦሶ ኡባስ ባና ኣꬃ ኢሚዳሮኔ ሎዖ ኦሶን ኤሬቲዳሮ ጊዳናው ቤሴስ።

¹¹ሺን ያላጋ ኣምዔታ ሱንꬃ ማዝጋባን ፃፎፓ። ኤንታና ኣዚና ጌሎ ጌሎ ጊያ ኣሾ ኣሞይ ኦይኪያ ዎዴ ኪሪስቶሳ ኣጋና።

¹²ኤንቲ ኮይሮ ጌሊዳ ቃላ ሜንꬂዳ ጊሾ ፒርዴታና።

¹³ሄሳ ቦላ ኤንቲ ኦሶ ꬋዪዲ ኬꬃፌ ኬꬄ ዩያና። ዩሻ ፃላላ ጊዶናሺን ዚጊርሳኒኔ ባንታና ጋꬆናባን ጌሊዲ ቤሶናባ ኦዴቶሶና።

¹⁴ሄሳ ጊሾ፥ ኑ ሞርኬቲ ኑ ቦላ ኦዴቲያ ኢታባ ዴሞና ሜላ ያላጋ ኣምዔቲ ኣዚና ጌሊዲ፥ ናዓ ዬሊዲ፥ ባንታ ኬꬃ ኣይሳና ሜላ ዞራይስ።

¹⁵ሃይሳፌ ካሴ ጉꬃ ኣምዔቲ ፃላሄ ካላናው ጉዬ ሲሚዶሶና።

¹⁶ኢሲ ኣማኒያ ማጫሴስ ሶ ኣሳ ጊዶን ኣምዔቲ ዴዒኮ ኢያ ኤንታ ማዳናው ቤሴስ። ሄሳዳ ኦꬂኮ፥ ዎሳ ኬꬃስ ቶሆይ ካዉዬስ። ሄ ዎዴ ዎሳ ኬꬃይ ማዴ ቤሲያ ቱማ ኣምዔታ ማዳናው ዳንዳዔስ።

¹⁷ዎሳ ኬꬂ ሎይꬂ ሄሚያ ጪማቲ፥ ኡባፌ ኣꬂዲ፥ ቃላ ሳባኮኒኔ ታማርሶን ዳቡሬይሳቲ ዳኮ ቦንቾ ኤካናው ቤሴስ።

¹⁸ጌሻ ማፃፋይ፥ «ዉዱማን ካꬃ ዬꬊያ ቦራ ዶና ቃቾፋ» ሄሳዳካ፥ «ኦሳንቾይ ባ ዳሞዚያ ኤካናው ቤሴስ» ያጌስ።

¹⁹ናምዑ ዎይኮ ሄꬑ ማርኪ ባይና፥ ዎሳ ኬꬃ ጪማ ሞቲያባ ሲዖፓ።

²⁰ሃራቲ ያያና ሜላ ናጋራ ኦꬂያ ኦናካ ኣሳ ኡባ ሲንꬃን ሃንቄታ።

²¹ኔኒ ኣሳ ሶምዖ ቤዖና፥ ኢሱዋ ኢሱዋፌ ዱማዮና ሃ ኪታ ናጋና ሜላ ፆሳ፥ ጎዳ ዬሱስ ኪሪስቶሳኔ ዶሬቲዳ ኪታንቾታ ሲንꬃን ታ ኔና ዞራይስ።

²²ኦዴ ቦላካ ኔ ኩሺያ ዎꬃዳ ሹማናው ኤሌሶፓ። ሃራታ ናጋራን ጌሎፓ፤ ኔና ጌሻቴꬃን ናጋ።

²³ኔኒ ኡባ ዎዴ ሃርጌቲያ ጊሾኔ ኔ ኡሎ ሃርጊያ ጊሾ ሃꬃ ፃላላ ኡዮፓ፤ ጉꬃ ዎይኔ ኡያ።

²⁴ኢሲ ኢሲ ኣሳታ ናጋራይ ቆንጬ፤ ኤንታ ናጋራይ ኤንታ ፒርዳናው ኤንታፌ ሲንꬄ ኣꬌስ፥ ሺን ሃራታ ናጋራይ ጉዬፔ ጋምዒዲ ቆንጬስ።

²⁵ሄሳዳ፥ ሎዖ ኦሶይካ ቆንጬ፤ ቆንጮና ኢፂኮካ ጌማናው ዳንዳዔና።