1 ፂሞቶሳ 3

1

2

3

4

5

6

¹ኦኒኔ ዎሳ ጎሊያ ካሌꬂያዋ ጊዳናው ኮዮፔ፥ ሎዖባ ኣሞቴዳ ጊያ ሃሳያይ ቱማ።

²ዎሳ ጎሊያ ካሌꬂያ ኡራይ ቦሪሴናዋ፥ ኢቲ ማቻቲ ፃላላይ ዴዒያዋ፥ ባሬና ሞዲያዋ፥ ባሬና ናጊያዋ፥ ባሬው ቤሲያዋ ኦꬂያዋ፥ ኢማꬃ ሞኪያዋ፥ ታማሪሳናው ዳንዳዪያዋ፥

³ማꬆቴናዋ፥ ኣሺኬቴꬃፔ ኣቲን ዋላቄቴናዋ፥ ፓሉሜቴናዋ፥ ሻሉዋ ሲቄናዋ፥

⁴ናናይ ኣው ኣዛዜቲያዋኔ ቦንቺያዋ፥ ቃሲ ባሬ ጎሊያ ኣዪሳናው ዳንዳዪያዋ ጊዳናው ቤሴ።

⁵ኣዪሲ ጎፔ፥ ኢቲ ኡራይ ባሬ ጎሊያ ኣዪሳናው ዳንዳዬናዋ ጊዶፔ፥ ፆሳ ኣማኒያዋንታ ዎቲ ኣዪሳናው ዳንዳዪ?

⁶ኦቶሩዋን ሱጌቲዲ፥ ፃላሂያ ካፑ ፆሳ ፒርዳን ኩንዴዳዋዳን ኩንዴና ማላ፥ ኦራꬃ ኣማኔዳ ኣሳ ጊዳናው ቤሴና።

⁷ፃላሂያ ካፑዋ ቦሪያኒኔ ጲሪያን ጌሌና ማላ፥ ሄ ኡራይ ዎሳ ጎሊያፔ ካሬና ዴዒያ ኣሳን ናሼቲያዋ ጊዳናው ቤሴ።

⁸ሄዋዳን ቃሲ ዎሳ ጎሊያ ማዲያዋንቱ ኣሳይ ቦንቺያዋንታ፥ ላዑ ዶና ሃሳዬናዋንታ፥ ዳሮ ዎዪኒያ ኤሳ ኡሼናዋንታ፥ ሚሻው ያሬቴናዋንታ፥

⁹ኣማኑዋ ፁራ ጌሻ ዎዛና ቆፋን ናጊያዋንታ ጊዳናው ቤሴ።

¹⁰ሄዋንቱ ካሴቲዴ ፓጬታናው ኮሼ። ፓጪያ ኣꬎዋፔ ጉዪያን፥ ዎሳ ጎሌን ኦꬂያዋንታ ጊዲዴ ኦꬂኖ።

¹¹ሄዋዳንካ ቃሲ ኡንቱንቱ ማቻቱ ኣሳይ ቦንቺያዋንታ፥ ዚጊሬናዋንታ፥ ባሬና ሞዲያዋንታ፥ ኡባባኒ ኣማኔቲያዋንታ ጊዳናው ቤሴ።

¹²ዎሳ ጎሊያ ማዲያዌ ኢቲ ማቻቲ ፃላላይ ዴዒያዋኔ ቃሲ ባሬ ናናኔ ባሬ ጎሊያ ሎይꬂ ኣዪሲያዋ ጊዳናው ቤሴ።

¹³ኣዪሲ ጎፔ፥ ዎሳ ጎሊያ ማዲያዋንታ ጊዲዴ፥ ሎዖ ኦሱዋ ኦꬂያዋንቱ ባሬንቱ ሁጴው ዎልቃማ ቦንቹዋ ዴሚኖ፤ ቃሲ ኪሪስቶሳ ዬሱሳን ባሬንቶ ዴዒያ ኣማኑዋ ሎይꬂ ፃሊዴ ሃሳያናው ዳንዳዪኖ።

¹⁴ታኒ ኔኮ ኤሌካ ባና ጋዴ ሃዋ ኔው ፃፋይ።

¹⁵ሺን ታኒ ቤናን ጋሚዖፔ፥ ፆሳ ጎሌን ኔኒ ዎታ ዴዓናው ቤሲንቶ ኤራና ማላ ፃፋይ። ሄ ጎሊ ቱማቴꬃው ቱሳኔ ባሶ ጊዲያ ዴዑዋ ፆሳ ዎሳ ጎሊያ።

¹⁶ኑ ኣማኑዋ ፁራይ ዎልቃማ ጊዲያዋ ኦኒኔ ሲꬋናው ዳንዳዬና። ኪሪስቶሲ ኣሹዋን ቆንጬዳ፤ ኢ ፂሉዋ ጊዲያዋ ጌሻ ኣያናይ ማርካቴዳ። ኪታንቻቱካ ኣ ቤዔዲኖ፤ ኣዪሁዳ ጊዴና ኣሳይ ኣባ ኦዲና ሲሴዳ። ሳዓን ዴዒያ ኣሳይ ኣ ኣማኔዳ፤ ቦንቹዋን ኢ ሳሉዋ ቤዳ።