1Wlipa na kwaane, chelee tub xaa nzhekla gak xaa tub xaa gol, xaa nabeyy lo re xaa Jesús, kwaane nak tub kwaan wen doo.
2Kwaanzee lee xaa kwaan nabeyy lo re xaa Jesús nzhaal nali le xaa re kwaan zee nik tub xaa naniit lee xaa nle kwaan nawent, nzhaal gak xaa nali lo sa xaa, nzhaal gak xaa tub xaa nali lo rese kwaan, nzhaal wen nabeyy xaa lo kwerp cheen xaa, nu nzhaal le xaa kwaan nii xaa. Nu noka nzhaal gak xaa tub xaa zaa garli kwaz stub naz xaa, nu nzhaal gak xaa tub xaa nzho mod zaa kwent xtizh Dios lo re myet.
3Nagakt xaa nguy, nixa nakwaant xaa dil, nzhaal gak xaa nadoo, nanzhaalt gak xaa tub xaa nzoblazh demi.
4Nzhaal nabeyy xaa lo re xaa li xaa, nu le xaa gon re xinn xaa xtizh xaa, nu wii xaa respet lo re myet.
5Nu chelee xaa nyent mod nabeyy xaa garli xaa, sbaaka nyent mod nabeyy xaa lo re xaa Jesús.
6Nyent mod gak xaa tub xaa pensa mzelo ngwii lo Jesús, nel napa kato xaa yalxwa, zee naab Dios kwent lo xaa mod ngunaab xaaya kwent lo Maxuu.
7Noka nzhaal gak xaa tub xaa nzhedizh wen re xaa nangwiit lo Dios, zee natont xaa ne xaa re myet, zee nayiyot xaa lo Maxuu.
8Sneeka nzhaal gak re xaa nle yudar re xaa Jesús: nzhaal wii myet respet lo xaa, nzhaal le xaa re kwaan nii xaa, nu nagakt xaa nguy, nixa nagakt xaa tub xaa nzoblazh demi.
9Nzhaal wii xaa lo Jesucrist mod mlu Dios lo be nu kwaan nak xgab cheen xaa tubka le xaa kwaan wen.
10Yilotlaka nkin zaa xaa tub zhiin lo xaa zee nen che wen le xaaya. Chelee xaa wen mle xaaya, zee nzho mod gak xaa tub xaa le yudar re xaa Jesús.
11Nu sneeka nzhaal gak re ngwnaa: nzhaal le me kwaan nali zee nyent cho né lee me kale kwaan nawent, nakwaant me diizh, nu noka nzhaal wen nabeyy me lo kwerp cheen me, nu nzhaal gak me nali lo re kwaan nle me.
12Nu rese xaa nle yudar re xaa Jesús nzhaal gak snee: nzhaal gak xaa nali lo sa xaa, nu wen nabeyy xaa lo re xinn xaa nu lo re xaa nzho li xaa.
13Sbaaka nzhaal gak re xaa nle yudar re xaa Jesús, nu snee wen nii re myet xaa, zee sbaa nzho mod zaa xaa kwent cheen Jesucrist kwaan dub lextoo xaa lo re myet, zee nzho mod wii re myet respet lo Jesucrist.
14Nzhekla na yal na mas lijer lo lu, per nal xaal na yech ne lo lu,
15zee chelee na gak na tras, nzhaal ne lu xomod le lu lo re xaa Jesús, re xaa nak xinn Dios, xaa tubka mban. Lee re xaa Jesús nak mod tub yiso kwaan nzen yoo zee gaka nye, nel nle xaa zee nacheet re myet re kwaan wli cheen Jesús.
16¡Naro doo nak kwaan ngulaan, kwaan mlu Dios lo be, xaa ngwii lo Jesucrist! Zee snee mbezh be: Jesucrist myaad ngok xaa myet lo yizhyo, nu lee Mbi Naban cheen Dios mlu nali nak xaa, nu ngune re mandad cheen Dios lo xaa. Xaa dub lo yizhyo mbin kwent cheen xaa. Zyen doo myet lo yizhyo mwii lo xaa. Nu Dios mtexoob xaa naz yiba.
