1Lik usukꞌ wa kambꞌiꞌij: We kꞌo junoq lik karaj kuꞌan aj kꞌamal kiwach rutinamit ri Dios, riꞌ lik chomilaj chak ri kurayij.
2Pero lik chirajawaxik che juna aj kꞌamal kiwach rutinamit ri Dios e jusukꞌ rubꞌinik usilabꞌik chaꞌ na jinta kꞌo kachꞌaꞌtibꞌen re. E kꞌola jusukꞌ rukꞌ ri rixoqil, lik chuchꞌobꞌo chi utz ri kuꞌano, chuchajij ribꞌ chiribꞌil ribꞌ chaꞌ na katzaq ta pa mak y chom kilitaj rubꞌinik kuma ri jujun chik. Xaqi chebꞌukꞌulu chi utz taq ri kebꞌopon chirocho, y kꞌola unaꞌoj che ukꞌutik Rutzij Upixabꞌ ri Dios.
3Lik chirajawaxik che na qꞌabꞌaꞌrel taj, na aj chꞌaꞌoj taj, na rayinel ta re puaq kachꞌak rukꞌ sokosoꞌnik, na keꞌek ta ukꞌuꞌx rukꞌ ri puaq; ma ri chirajawaxik wi e lik utz ukꞌuꞌx y chꞌuꞌchꞌuj ukꞌuꞌx.
4Chuꞌana ri saqil taqanik pa rocho; chukꞌutu kꞌu chike ri ralkꞌoꞌal chaꞌ kebꞌuꞌan e kojol tzij y jekꞌulaꞌ kekꞌojiꞌ chi jusukꞌ.
5Ma e ri na kuriq ta kuꞌan saqil taqanik pa rocho, ¿suꞌanik kꞌu riꞌ kebꞌuchajij chi utz rutinamit ri Dios?
6Na utz taj we kꞌo junoq kꞌakꞌ ukojom ri Utzilaj Tzij yey kakojik aj wach chupa riglesia, ma kꞌaxtaj kuꞌan nim che ribꞌ y kaqꞌat kꞌu tzij puwiꞌ jelaꞌ pachaꞌ ri xukꞌulumaj ritzel winaq ruma xuꞌan nim che ribꞌ.
7Ri lik chirajawaxik wi e chom rubꞌinik usilabꞌik chikiwach taq ri na kikojom ta rubꞌiꞌ ri Qanimajawal Jesucristo, chaꞌ na jinta junoq kakꞌaqaw bꞌi uqꞌij y na katzaq ta chupa juna pajtajibꞌal re ritzel winaq.
8Jekꞌulaꞌ raj chakibꞌ e toꞌbꞌel piglesia lik chirajawaxik chike e jusukꞌ ri kibꞌinik kisilabꞌik, na xa ta kebꞌ kipalaj, na e ta qꞌabꞌaꞌrelabꞌ, na e ta rayinel re puaq kachꞌak rukꞌ sokosoꞌnik.
9Chirajawaxik kakitaqej ri saqil kꞌutunik uqꞌalajisam ri Dios yey kakinaꞌ pa kanimaꞌ utz kiꞌanom chwach Rire.
10Nabꞌe na chirajawaxik kakꞌam kipa chaꞌ kaqꞌalajinik we lik jusukꞌ ri kibꞌinik kisilabꞌik; tekꞌuchiriꞌ utz kebꞌuꞌan aj chakibꞌ e toꞌbꞌel piglesia.
11Jekꞌulaꞌ, chirajawaxik chike rixoqibꞌ e jusukꞌ ri kibꞌinik kisilabꞌik, na e ta aj molot, lik kakichꞌobꞌ chi utz ri kakiꞌano y kakiꞌan chi utz ronoje ri taqal chike.
12Ekꞌu rachi aj chak toꞌbꞌel piglesia, lik chirajawaxik kꞌola jusukꞌ rukꞌ ri rixoqil y chuꞌana saqil taqanik pakiwi taq ri ralkꞌoꞌal y pakiwi konoje taq ri e kꞌo pa ri rocho.
13We kuꞌan kꞌu chi utz ruchak, katakꞌabꞌax uqꞌij chikiwach ri tikawex y kanimar ukꞌuꞌx che uqꞌalajisaxik ri kubꞌulibꞌal ukꞌuꞌx rukꞌ ri Qanimajawal Jesucristo.
14Riꞌin lik nukubꞌam pan nukꞌuꞌx kiꞌnwila tan awach Timoteo, pero kantzꞌibꞌaj na pan waꞌ chawe
15chaꞌ we xinmayin che awilik, chawetaꞌmaj saꞌ ri saqil bꞌinik silabꞌik chirajawaxik chike ri e re ri Dios; ma rike e utinamit ri Dios kꞌaslik yey rutinamit e chapayom re y e katikibꞌan re ri Qꞌijsaq.
16Paqatzij wi lik nim uqꞌij ri Qꞌijsaq re ri Dios qꞌalajisam chiqawach: E ri Qanimajawal Jesucristo xuꞌan tikawex echiriꞌ xkꞌun che ruwachulew. Ronoje ri xuꞌano y ri xubꞌiꞌij e lik jusukꞌ y ri Ruxlabꞌixel ri Dios e xqꞌalajisan re waꞌ. Xilitaj kuma ri ángeles. Xtzijox rubꞌiꞌ chike rukꞌiyal kiwach taq ri tikawex che ruwachulew y e kꞌi ri xkikoj rubꞌiꞌ. Yey xkꞌul tanchi chilaꞌ chikaj rukꞌ yakbꞌal uqꞌij.
