ПСАЛТЫР 9:1-16

¹Кіроўцу хору. Пасьля сьмерці Лабэна. Псальма Давідава.

²Славіць буду Цябе, Госпадзе, усім сэрцам маім, абвяшчаць пра ўсе цуды Твае,

³я буду радавацца, весяліцца, імя Тваё апяваць, Усявышні.

⁴Як павернуць назад мае ворагі, - спатыкнуцца й загінуць прад абліччам Тваім,

⁵бо Ты вёў мой суд і маю цяжбіну; Ты сеў на троне, Судзьдзя справядлівы.

⁶Ты абурыўся на народы, бязбожнага зьнішчыў, сьцёр іх імёны навечна.

⁷У ворага зброі ня стала зусім, і гарады Ты разбурыў; загінула зь імі памяць пра іх.

⁸А Гасподзь жыве вечна; Ён трон Свой на суд падрыхтаваў,

⁹і Ён будзе судзіць сьвет па праўдзе, па справядлівасьці суд над народамі ўчыніць.

¹⁰І будзе Гасподзь прытулкам прыгнечанаму, прытулкам у скрушлівы час;

¹¹І спадзявацьмуцца на Цябе тыя, што ведаюць імя Тваё, бо Ты не пакідаеш тых, што шукаюць Цябе, Госпадзе.

¹²Сьпявайце Госпаду, Які жыве на Сіёне, абвяшчайце ў народах дзеі Ягоныя,

¹³бо Ён спаганяе за кроў; памятае іх, не забывае енку прыгнечаных.

¹⁴Умілажалься зь мяне, Госпадзе; глянь на цярпеньні мае ад ненавісьнікаў маіх, - Ты, Які ўзносіш мяне над брамаю сьмерці,

¹⁵каб я абвяшчаў усю славу Тваю ў браме дачкі Сіёна: буду радавацца з майго ратаваньня Табою.

¹⁶Народы пападалі ў яму, якую выкапалі; у сетку, якую схавалі яны, ублыталі ногі свае.