Yontu 96:1-13

¹Ɩ́ yoo Tɑcɑɑ kɛ yontu kʋfɑtʋ, ɑtɛ yəlɑɑ mɛ mə tənɑ ɩ́ yoo Tɑcɑɑ kɛ yontu.

²Ɩ́ yoo Tɑcɑɑ kɛ yontu nɑ ɩ́ sɑ ɩ hətɛ, nɑ ɩ́ kpɑɑləɣɩ pɑɑ kʋyɑkʋ ŋkuɣu ɩ nyʋɣʋ yɑpʋ tɔm.

³Ɩ́ yɔɣɔtɩ piitimnɑɑ tɑɑ kɛ́ ɩ teeli tɔm nɑ ɩ́ yɔɣɔtɩ yəlɑɑ tənɑ tɑɑ kɛ́ ɩ teu tɔm.

⁴Tɑcɑɑ n kɛ́ sɔsɔ kɛ́ nɑ n mʋnɑ pɑ́ sɑ-ŋ. Nyɑ́ tɔm wɛ sɔɣɔntʋ kɛ́ nɑ pə́ tɛɛ tɩɩŋ tənɑ.

⁵Mpi tɔ, piitimnɑɑ tɩɩŋ tənɑ wɛ kpɛtɛ kɛ́. Amɑ Tɑcɑɑ nyɑ́ lɑpənɑ ɩsɔtɔnʋɣʋ.

⁶Teu sɔsɔɔm nɑɑkɩ nyɑ́ tɔɔ kɛ́, nɑ teeli sɔsɔ nɑ́ɑ́ wɛ nyɑ́ təyɑɣɑ tɑɑ.

⁷Piitimnɑɑ yəlɑɑ mɛ ɩ́ tʋ Tɑcɑɑ kɛ teeli, ɩ́ tʋ Tɑcɑɑ kɛ teeli nɑ ɩ́ kʋsɩ ɩ nyʋɣʋ.

⁸Ɩ́ sɑ Tɑcɑɑ kɛ ɩ hətɛ tɔɔ. Ɩ́ kɔnɑ mə kʋhɑhɑm nɑ ɩ́ sʋʋnɑ ɩ tɑɑsɩ tɔɔ.

⁹Ɩ́ həntɩ Tɑcɑɑ kɛ ɑtɛɣɛ sɑɑ wei ɩ hʋləɣɩ ɩ tənɑŋŋ wɛɛtʋ tɔ. Atɛ yəlɑɑ mɛ mə tənɑ ɩ́ sele ɩ ɩsɛntɑɑ.

¹⁰Ɩ́ heeli piitimnɑɑ tənɑ sɩ Tɑcɑɑ kɛlɛ wulɑʋ. Mpʋ tɔtɔɣɔ tɛtʋ səŋɑɑ təcɑ, tɩɩ seliɣi. Tɑcɑɑ təŋəɣɩ tɑmpɑnɑ kɛ́ nɑ ɩ́ hʋʋkənɑ yəlɑɑ.

¹¹Ɩsɔtɔnʋɣʋ lɑŋlɛ ɩ́ hʋləmɩ nɑ tɛtʋ yɔɔlɩ, teŋku nɑ ɩ tɑɑ nyəm tənɑ ɩ́ sɛɛ.

¹²Tɑwɑ tənɑ ɩ́ wɛɛ ɑcimɑ tɑɑ, nɑ hɔtʋɣʋ tɑɑ tɩɩŋ tənɑ kiisinɑ lɑŋhʋlʋmlɛ,

¹³kɛ Tɑcɑɑ ɩsɛntɑɑ. Mpi tɔ, ɩ kɔŋ sɩ ɩ hʋʋnɑ tɛtʋ tənɑ. Ɩ kɑ́ təŋ tɑmpɑnɑ nɑ ɩ́ hʋʋnɑ ɑntulinyɑ nɑ ɩ yəlɑɑ.