Yontu 38:4-19

⁴Nyɑ́ pɑ́ɑ́nɑ́ tɔɔ, mɑ tɔnʋɣʋ fɛɩ təcʋŋŋ. Mɑ kʋpəntʋɣʋ tɔɔ, ɑlɑɑfəyɑ fɛɩ mɑ mʋwɑ tɑɑ.

⁵Mɑ ɩsɑɣɑtʋ kəlɑ-m kʋŋkʋlʋməŋ. Nɑ tə́ nɩɩ-m ɩsɩɩ səɣəlɑ sɔsɔɔnɑ.

⁶Mɑ hiŋ tɑɑ lɑpɑ kʋsɔɣɔtʋ kɛ́ nɑ pə́ wɩɩkɩ. Mɑ kʋmɛlɛntʋ kɑsəyɑɣɑ ntɛ́.

⁷Wʋsɑsɩ kɔkəlɑ-m kɛ́ nɑ mɑ́ kɑwɑ kɑtɑtəlɑɣɑ. Lɑŋwɑkəllɛ tɑɑ kɛ́ mɑ tɔŋ kʋyɛɛŋ tənɑ.

⁸Wʋsɑsɩ sɔsɔɔnsɩ sɑləɣənɑ mɑ tənɑɣɑ tɑɑ. Pʋlʋpʋ fɛɩ təcʋŋŋ kɛ́ mɑ tɔnʋɣʋ tɑɑ.

⁹Pə yɔkɑ-m kɛ́ tənɑŋnɑŋ mɑ fɛɩ tomɑ. Nɑ mɑ lɑŋwɑkəllɛ yeki nɑ mɑ́ mɔləɣɩ.

¹⁰Tɑcɑɑ n nyəmɑ́ mɑ kʋnyɩɩləm kɛ teu. Pəyele n nyəmɑ́ mɑ mɔlɑ.

¹¹Mɑ lɑŋlɛ tɔɔkɩ kɛ́ nɑ mɑ tomɑ tɛŋ. Mɑ ɩsɛ nɑ́ɑ́ tɩɩ tɛŋ nɑʋ.

¹²Mɑ tɑɑpɑlɑɑ nɑ mɑ ɑsəmɑɑ seeki mɑ wɑhɑlɑ. Nɑ mɑ cɔlɔ nyə́mɑ hɑtələɣənɑ-m.

¹³Mpɑ pɑ pɛɛkəɣɩ mɑ səm tɔ pɑ nyəkɩ-m kɑtɔsɩ ɩlɛnɑ mpɑ pɑɑ cɑɑ-m nɑ kʋpɑntʋ tɔ pɑ́ yɔɣɔtəɣɩ ɩsɑɣɑtʋ nɑ tɔm kʋtʋsʋtʋ kɛ tɑm.

¹⁴Amɑ mɑ pəsɑ ntɑm kɛ́ mɑɑ nɩɩkɩ, yɑɑ kɑmumukɑ mɑɑ yɔɣɔtəɣɩ nɑtəlɩ.

¹⁵Mɑ wɛ kɛ́ ɩsɩɩ ntɑm, mɑɑ cɔɔkɩ nɑtəlɩ.

¹⁶Mɑ Ɩsɔ Tɑcɑɑ nyɑɣɑ mɑ tekiɣi, nɑ mɑ́ tɑŋɑɑ sɩ ń cɔnɑ mɑ nɔɣɔ.

¹⁷Hɑlɩ mɑ sələmɑ-ŋ sɩ ń tɑɑ yele nɑ pɑ́ pɑɑnɑ-m. Yɑɑ pɑ́ kɛɛsənɑ mɑ cɛŋlʋɣʋ nɑ pɑ́ kʋlɩ mɑ tɔɔ.

¹⁸Mpi tɔ, mɑ cɛɛ fiɣinuɣu kɛ́, nɑ mɑ wʋsɑsɩ tɔɔsəɣɩ-m pə tɔm.

¹⁹Mɑ tisɑ mɑ kʋpəntʋɣʋ kɛ́ nɑ kʋ tɔm cɑɑləɣɩ-m.