Yontu 34:1-11

¹Tɑfiiti yontu kɛ wɑɑtʋ wei ɩ polɑ Filiisi nyə́mɑ wulɑʋ Apimelɛkɩ tɛ nɑ ɩ́ pəsɩ ɩsɩɩ kʋmɛlɛŋ nɑ ɩ́lɛ́ ɩ tɔɣɔnɩ-ɩ tɔ.

²Mɑɑ sɑ Tɑcɑɑ kɛ pɑɑ wɑɑtʋ wei kɛ́. Mɑ nɔɣɔ tɑɑ kɛ́ nyɑ́ sɑmtʋ kɑ wɛɛ tɑm.

³Mɑɑ sɑ-ŋ mpi n lɑpɑ-m tɔ pə tɔɔ. Kʋnyɔntɔɣɔlɑɑ ɩ́ nɩɩ nɑ ɩ́ yɔɔlɩ.

⁴Tə kpɛntɩ nɑ tə́ tɑlɑ Ɩsɔ nɑ tə́ sɛɛ-ɩ.

⁵Tɑcɑɑ, mɑ yɑɑ-ŋ ń cɔ-m, nɑ ɩ́ wɑɑsɩ-m mɑ sɔɣɔntʋ tənɑ tɑɑ.

⁶Ye yʋlʋ tekiɣi Tɑcɑɑ pʋntʋ ɩsɛntɑɑ hɛtəɣɩ kɛ́ nɑ fɛɛlɛ yɑ ɩ tokuɣu tɑɑ.

⁷Ye wɑhɑlɑ tʋ ɩ́ wiinɑ Tɑcɑɑ, ɩ nɩɩkɩ kɛ́ nɑ ɩ́ yɑpɩ-ɩ ɩ nəɣəsɛɛ tənɑ tɑɑ.

⁸Ɩsɔtɑɑ tillu wɛ yəlɑɑ mpɑ pɑ nyɑŋnɑ Tɑcɑɑ tɔ pɑ wɑɑlɩ kɛ́. Nɑ ɩ́ ləsəɣɩ-wɛɣɛ ɑsolɑ tɑɑ.

⁹Ɩ́ mɑɣɑsɩ nɑ ɩ́ nɑ́ ɩsənɑ Tɑcɑɑ wɛ leleŋ tɔ. Leleŋ nɩɩlʋ ntɛ́ yʋlʋ wei ɩ tʋɣɩ Tɑcɑɑ kɛ kpʋlʋɣʋ tɔ.

¹⁰Tɑcɑɑ nyə́mɑ mɛ, ɩ́ nyɑŋnɑ-ɩ. Pʋlʋpʋ ɩɩ lɑŋəɣɩ mpʋ ɩnɩ pə lɑtɑɑ.

¹¹Hɑlɩ tɔɣɔlɑsɩ piyɑ mɑɣɑmɑɣɑ wiiki nyɔɣɔsɩ kɛ́. Amɑ Tɑcɑɑ pɛɛkəlɑɑ nɑ́ɑ́ lɑŋəɣɩ kʋpɑntʋ.