Yontu 18:5-42

⁵Səm kɑ tʋ-m ɑlukpɑlɑ kɛ́, nɑ pə́ nyɑɑsəɣɩ-m ɩsɩɩ pɔɣɔ ɩsɑɣɑɑ.

⁶Atɛtəlɛ kɑ hɔkɑ-m tə ŋmɩɩsɩ kɛ́ nɑ səm nɑ́ɑ́ tuti-m nɑ pə puluɣu.

⁷Mɑ yɑ́ɑ́ Tɑcɑɑ kɛ mɑ lɑŋwɑkəllɛ wɑɑtʋ sɩ ɩ́ wɑɑsɩ-m. Mɑ kiisɑɑ nɑ ɩ́ nɩɩ mɑ nɔɣɔ kɛ ɩ təyɑɣɑ tɑɑ.

⁸Pɑ́ɑ́nɑ́ kpɑ Ɩsɔ nɑ tɛtʋ sele, nɑ pɔɔŋ nɑ́ɑ́ sele too ɩ kilɑ tɛɛ.

⁹Ɩsɔ tɔwɑ kɔkɔ nɑ kɑ cəɣəlɑsɩ nɑ ɩ nɔɣɔ nɑ kɑ nyɔɔsɩ lɩɩnɑ ɩ mɩɩnɑ tɛɛ.

¹⁰Ɩsɔ lumsɑ ɩsɔtɔnʋɣʋ nɑ ɩ́ tii. Nɑ ɩ nɔɔhɛɛ tɛɛ kɛ́ ɩsɔtɔnʋɣʋ kpɩɩsəŋ nyəŋkʋ.

¹¹Ɩsɔ cɑɣɑ ɩsɔtɑɑ tillu tɔɔ nɑ ɩ́ kʋləɣɩ hʋntʋ, kɛ heelim tɔɔ.

¹²Ɩsɔ tɑkɑ ɩ təɣɩ səkpɛtʋɣʋ nɑ ɩ́ wɛ tɛʋ ŋmʋntʋɣʋ kʋkpɛɛtʋɣʋ tɛɛ.

¹³Ɩsɔ nyɑləməlɛ tɛɛ-ɩ nɔɣɔ nɑ tə́ yɑsəɣɩ ɩsɔŋmʋntʋ nɑ tə́ lɔkɩ tɛʋ tɔmpɛɛ nɑ kɔkɔ cəɣəlɑsɩ.

¹⁴Ɩsɔtɑɑ Ɩsɔ Sɔsɔ nɔɣɔ nɩɩ ɩsɔtɑɑ kɛ́ ɩsɩɩ tɛʋ holɑ.

¹⁵Ɩsɔ tɔwɑ mɑ kolontunɑɑ kɛ nyəmɑ́ nɑ ɩ́ yɑsɩ-wɛ. Nɑ ɩ́ tisi pɑ tɔɔ kɛ́ cɑlɑnɑɑ kɛ sɔsɔm nɑ pɑ́ se yem yem.

¹⁶Tɑcɑɑ mʋ pɑ́ɑ́nɑ́ nɑ ɩ́ woso ɩ mɩɩnɑ tɛɛ, nɑ teŋku tɛtʋ nyɩɩ nɑ pə́ nɑ́ ɑntulinyɑ kite.

¹⁷Ɩlɛnɑ ɩ́ tisi ɩ niŋ nɑ ɩsɔtɑɑ nɑ ɩ́ ləsɩ-m lʋm sɔsɔɔm tɑɑ.

¹⁸Nɑ ɩ́ yɑ-m mɑ kolontunɑɑ toŋ nyə́mɑ mpɑ pɑ tɛɛ-m tɔ pɑ niŋ tɑɑ.

¹⁹Mɑ wɑhɑlɑ wule kɛ pɑ tutɑ-m, ɩlɛnɑ Tɑcɑɑ wɑɑsɩ-m.

²⁰Ɩsɔ sɔɔlɑ-m tɔɣɔ ɩ wɑɑsɑ-m sɩ mɑ́ cɑɣɑnɑ mɑ tɩ.

²¹Mɑ təŋɑ tɑmpɑnɑ tɔɣɔ n lɑpɑ-m mpʋ, mɑ kʋsiɣisim lɑpʋ kɑsəyɑɣɑ ntɛ́.

²²Mɑ təŋɑ Tɑcɑɑ tɔm kɛ́, mɑ tɑ wɑkələnɑ-ɩ.

²³Mɑ təŋɑ nyɑ́ kʋsəsɩɩtʋ tənɑ tɔɣɔ. Mɑ tɑ yɔkɩ nyɑ́ kiiu nɑkʋlɩ.

²⁴Mɑ luɣu fɛɩ tɑɑlɩ nɔɣɔlʋ, tɔɣɔ mɑ kpɑ mɑ təɣɩ ɩsɑɣɑtʋ təlɑtɛ.

²⁵Ɩlɛnɑ Tɑcɑɑ lɛɛtɩ-m mɑ tɑmpɑnɑ təŋʋɣʋ tɔɔ. Mɑ kʋsiɣisim lɑpʋ kɑsəyɑɣɑ ntɛ́ nɑ ń nyəmɑ́.

²⁶Kʋpɑntʋ kɛ n fɛləɣɩ tə lɑtʋ. Nɑ ń təŋ tɑmpɑnɑ nɑ ń lɑnɑ ɑ təŋlʋ.

²⁷Yʋlʋ ɩ́ wɛ tənɑŋŋ ḿpʋɣʋ n lɑkɩ-ɩ. Ɩlɛnɑ ń kisi ɩsɑɣɑʋ kɛ ɩ ɩsɑɣɑtʋ tɔɔ.

²⁸N wɑɑsəɣɩ təpɑsəlɑɑ. Ɩlɛnɑ ń tisiɣi kɑlɑmpɑɑnɩ nyə́mɑ.

²⁹Mɑ Ɩsɔ Tɑcɑɑ yekinɑ nɑ mɑ nyɑɑləm nɑɑkɩ. Nɑ pə́ kɛɛləɣɩ mɑ səkpɛtʋɣʋ.

³⁰Nyɑ́ toŋ kɛ mɑ ŋmɑɑkənɑ koluŋɑ ɩcɑtɛ, nɑ mɑ́ sʋʋ nɑ mɑ́ tuti mɑ kolontunɑɑ.

³¹Tɑcɑɑ nyɑ́ kʋlɑpʋtʋ wɛ kɛ́ təcʋŋŋ. Nɑ nyɑ́ kʋyɔɣɔtʋtʋ fɛɩ sikɑ. N kentiɣi mpɑ pɑ cɔɔsəɣənɑ-ŋ tɔ ɩsɩɩ kpɑ́lʋɣʋ

³²Tɑcɑɑ nyɑ́ tike təkoŋ ntɛ́ Ɩsɔ. Tɑ Ɩsɔ nyɑ́ tike təkoŋ ntɛ́ kʋkpɑmʋɣʋ ŋku kʋ kentiɣi-tʋ tɔ.

³³Nyɑ́ hɑɑkənɑ-m tomɑ. Nɑ ń tiikiɣi-m mpɑɑʋ kʋsiɣisuɣu tɑɑ.

³⁴Nɑ ń yeki nɑ mɑ́ pəsəɣɩ sewɑ nɑ nɑɑni kɛ pulɑsɩ tɔɔ ɩsɩɩ nɑm.

³⁵N fɑləsɑ mɑ niŋ nɑ yoou, nɑ mɑ́ nyɩ tɔɔʋ toŋ nyəŋkʋ tɔʋ.

³⁶N yɑpɑ mɑ nyʋɣʋ nɑ pə́ wɛɛ ɩsɩɩ kʋkentuɣu. Nyɑ́ toŋ teesiɣi-m nɑ mɑ́ wɛɛnɑ tomɑ.

³⁷Nyɑ́ hɑsəɣənɑ mɑ nɔɔhɛɛ tɛɛ, pʋlʋpʋ ɩɩ tuuliɣi-m.

³⁸Nɑ mɑ́ tɔɣɔnəɣɩ mɑ kolontunɑɑ nɑ mɑ́ kpɑɑkɩ-wɛ, mɑ́ tɑ wɑkəlɩ-wɛ mɑɑ mələɣɩ.

³⁹Nɑ mɑ́ huɣi-wɛɣɛ ɑtɛ, nɑ pɑ́ wɛ mɑ nɔɔhɛɛ tɛɛ pɑɑ tɑsəɣɩ kʋlʋɣʋ.

⁴⁰Nyɑ́ hɑɑkənɑ-m yoou toŋ nɑ ń yeki nɑ mɑ kolontunɑɑ həntəɣɩ-m ɑtɛ.

⁴¹N yeki nɑ mɑ kolontunɑɑ seeki-m nɑ mɑ́ wɑkələɣɩ-wɛ tənɑŋnɑŋ.

⁴²Pɑ wiiwɑ nɔɣɔlʋ tɑ wɑɑsɩ-wɛ. Nɑ pɑ́ yɑɑ Ɩsɔ, Ɩsɔ tɑ́ cɔ.