Yontu 119:99-159 - PIIPILI ƖSƆ TƆM TAKƎLAƔA

⁹⁹Mɑ tɛɛ mɑ sɛɣɛsəlɑɑ tənɑɣɑ nyəm. Mpi tɔ, nyɑ́ kʋsəsɩɩtʋ kɛ mɑ mɑɣɑsəɣɩ.

¹⁰⁰Mɑ tɛɛ kʋkpɑtəlɑɑ kɛ ləmɑɣɑsɛɛ. Mpi tɔ, mɑ tɔkɑ nyɑ́ kʋtʋtʋtʋ.

¹⁰¹Mɑ kisɑ mpɑɑŋ ɩsɑɣɑŋ tɑɑ tɔntɛ sɩ mɑ́ pəsɩ nɑ mɑ́ tɔkɩ nyɑ́ tɔm.

¹⁰²Mɑɑ hɑtələɣənɑ nyɑ́ kʋsəsɩɩtʋ. Mpi tɔ, nyɑ́ sɛɣɛsəɣənɑ-m.

¹⁰³Nyɑ́ tɔm wɛ leleŋ kɛ mɑ tɑntɑhɑɑʋ tɑɑ kɛ́. Tə kəlɑ tɩɩŋ kɛ leleŋ kɛ mɑ nɔɣɔ tɑɑ.

¹⁰⁴Nyɑ́ kʋsəsɩɩtʋ pəsəɣənɑ-m nyəntʋ nɑ mɑ́ kisiɣi pɔpɔtʋ tənɑ.

¹⁰⁵Nyɑ́ tɔm wɛnnɑ ɩsɩɩ fətəlɑ kɛ mɑ nɔɔhɛɛ tɛɛ nɑ pə́ nɑɑkɩ mɑ mpɑɑʋ tɑɑ.

¹⁰⁶Mɑ tuuki sɩ mɑɑ tɔkɩ nyɑ́ kʋsəsɩɩtʋ. Mɑɑ lɑ ɩsɩɩ mɑ tuuwɑ tɔ.

¹⁰⁷Tɑcɑɑ, pə pɑsɑ-m teu kɛ́. Yele nɑ mɑ́ wɛɛnɑ weesuɣu ɩsɩɩ n yɔɣɔtʋɣʋ tɔ.

¹⁰⁸Hɑɩ, Tɑcɑɑ, mʋ mɑ sələmʋɣʋ ɩsɩɩ kʋcɔɔʋ. Sɛɣɛsɩ-m nyɑ́ kʋsəsɩɩtʋ.

¹⁰⁹Mɑ weesuɣu wɛ ɑsolɑ tɑɑ kɛ́ tɑm kɛ́. Amɑ mɑ kɑɑ sɔɔ nyɑ́ kiiu tɔm.

¹¹⁰Asɑɣɑɑ nyəkɩ-m kɑtɔsɩ kɛ́. Amɑ mɑɑ hɑtələɣənɑ nyɑ́ kʋsəsɩɩtʋ.

¹¹¹Nyɑ́ kʋtʋtʋtʋ kɛ-m kʋpɑntʋ sɔsɔɔntʋ kɛ tɑm tɔɔ kɛ́, tə hɛɛsəɣɩ mɑ lɑŋlɛ.

¹¹²Mɑ tʋ mɑ tɑɑ sɩ mɑ́ təŋ nyɑ́ kʋsəsɩɩtʋ*fɑ* hɑlənɑ mɑ səm.

¹¹³Mɑ tɑɑ kpɑɑnɑ ɑtɑɑ nɑ ɑ wɑɑlɩ yəlɑɑ kɛ́. Amɑ mɑ sɔɔlɑ nyɑ́ kiiu.

¹¹⁴Nyɑɣɑlɛ mɑ kpʋlʋɣʋ tətʋlɛ nɑ mɑ kentulu. Nyɑ́ kʋyɔɣɔtʋtʋ kɛ mɑ tɛɛləɣɩ.

¹¹⁵Asɑɣɑɑ mɛ ɩ́ hɑtələnɑ-m. Ɩlɛnɑ mɑ́ tɔkɩ mɑ Ɩsɔ kiiŋ.

¹¹⁶Te-m ɩsɩɩ n kɑ sɩɩʋ nyɑ́ nɔɣɔ tɔ nɑ mɑ́ hiki weesuɣu. Nyɑɣɑ mɑ tɛɛləɣɩ, tɑɑ tʋ-m fɛɛlɛ.

¹¹⁷Wɛɛ mɑ tentu nɑ pə́ yɑ mɑ nyʋɣʋ. Ɩlɛnɑ mɑ pɑɑsənɑ nyɑ́ kʋsəsɩɩtʋ kɛ tɑm tɔɔ mɑ́ tɑɑ hɛɛsɩ.

¹¹⁸N tɔɣɔnəɣɩ mpɑ pɑɑ təŋəɣɩ nyɑ́ kʋsəsɩɩtʋ tɔɣɔ. Mpi tɔ, pɑ tʋsʋɣʋ ɩɩ wɑɑsəɣɩ pʋlʋ.

¹¹⁹N lɔɔkɩ ɑtɛ ɑsɑɣɑɑ tənɑɣɑ ɩsɩɩ hute. Pə tɔɔ kɛ́ mɑ sɔɔlɑ nyɑ́ kʋsəsɩɩtʋ.

¹²⁰N tʋ nyɑ́ sɔɣɔntʋ kɛ mɑ tɑɑ nɑ mɑ tɔnʋɣʋ seliɣi, nɑ mɑ́ nyɑŋnɑ nyɑ́ hʋʋlɛ.

¹²¹Mɑ tɔkɑ nyɑ́ kiiu nɑ nyɑ́ siɣisuɣu kɛ́. Tɑɑ pɛtɩ-m mɑ ŋmɑkəllɑɑ.

¹²²Sɩɩ nyɑ́ təmlɛ tʋ mɑɣɑ nɔɣɔ sɩ n kɑ́ sənɑ-m. Tɑɑ yele nɑ kɑlɑmpɑɑnɩ nyə́mɑ muɣulu-m.

¹²³Mɑ tɑŋɑ nyɑ́ nyʋɣʋ yɑpʋ. Mɑ tɑŋɑ ɑkɑɩtʋ nti tə tɔm n sɩɩwɑ nɔɣɔ tɔ nɑ mɑ ɩsɛ tɛŋ.

¹²⁴Lɑ nyɑ́ təmlɛ tʋ mɑɣɑ kʋpɑntʋ, nɑ ń sɛɣɛsɩ-m nyɑ́ kʋsəsɩɩtʋ.

¹²⁵Mɑ kɛ́ nyɑ́ təmlɛ tʋ kɛ́, hɑ-m lɑɣɑtʋ nɑ mɑ́ nyɩ́ nyɑ́ kʋsəsɩɩtʋ.

¹²⁶Tɑcɑɑ pə tɑlɑɑ sɩ ń lɑ pʋlʋ. Pɑ yɔkəɣɩ nyɑ́ kiiu kɛ́.

¹²⁷Pə tɔɔ kɛ́ mɑ sɔɔlɑ nyɑ́ kʋsəsɩɩtʋ nɑ pə́ kəlɩ wʋlɑ kʋpɑmpɑŋ.

¹²⁸Pə tɔɔ kɛ́ mɑ nyənəɣɩ nyɑ́ kʋtʋtʋtʋ tənɑɣɑ kʋsiɣisitʋ nɑ mɑ tɑɑ kpɑɑkənɑ pɔpɔtʋ.

¹²⁹Nyɑ́ kʋsəsɩɩtʋ kɛ kʋpɑmpɑntʋ kɛ́ pə tɔɔ kɛ́ mɑ təŋəɣɩ-tɩ.

¹³⁰Nyɑ́ tɔm cɛkənɑʋ kɔŋnɑ nyɑɑləm kɛ́ tə hɑɑkɩ lɑɣɑtʋ kɛ mpɑ pɑ lɑŋɑ-tɩ tɔ.

¹³¹Mɑ liki nyɑ́ tɔm kɛ́ nɑ hiluɣu. Mpi tɔ, mɑ wɛnɑ nyɑ́ kʋsəsɩɩtʋ nyɔɣɔsɩ kɛ́.

¹³²Kɛɛsɩ nyɑ́ ɩsɛ nɑ mɑ tɔɔ nɑ ń nyənɩ mɑ pətɔɔtəlɛ, ɩsɩɩ n lɑkʋɣʋ mpɑ pɑ sɔɔlɑ nyɑ́ hətɛ tɔ.

¹³³Nyɑ́ tɔm ɩ́ tʋ-m nɑɑni. Tɑɑ yele nɑ ɩsɑɣɑtʋ nɑtəlɩ tə́ pəsɩ-m.

¹³⁴Wɑɑsɩ-m, yəlɑɑ cɑɑkɩ pɑ ŋmɑkələɣɩ-m. Ɩlɛnɑ mɑ tɔkɩ nyɑ́ kʋsəsɩɩtʋ.

¹³⁵Nyɑ́ ɩsɛntɑɑ ɩ́ hɛtənɑ nyɑ́ təmlɛ tʋ mɑɣɑ teu. Sɛɣɛsɩ-m nyɑ́ kʋsəsɩɩtʋ.

¹³⁶Wɑɑtʋ wei mɑ nɑɑkɩ sɩ pɑɑ tɔkəɣɩ nyɑ́ kiiu tɔ mɑ lukiɣi ɩsəlʋm kɛ́.

¹³⁷Hɑɩ, Tɑcɑɑ, n kɛ́ siɣisilu kɛ́, nɑ ń təŋəɣɩ tɑmpɑnɑ kɛ nyɑ́ hʋʋlɛ tɑɑ.

¹³⁸Nyɑ́ kʋsəsɩɩtʋ siɣisɑɑ kɛ nɑ tə kɛ́ tɑmpɑnɑ.

¹³⁹Wɑɑtʋ wei mɑ nɑɑkɩ mɑ kolontunɑɑ sɔɔkɩ nyɑ́ tɔm tɔ, pɑ́ɑ́nɑ́ sɔsɔɔnɑ kpɑɑkɩ-m kɛ́.

¹⁴⁰Nyɑ́ tɔm lɑpɑ tə təmlɛ. Nɑ nyɑ́ təmlɛ tʋ mɑ́, mɑ sɔɔlɑ-tɩ.

¹⁴¹Mɑɣɑ səkpelu kɛ́, nɑ nɔɣɔlʋ ɩɩ cɑɑkɩ-m. Amɑ mɑ tɑ sɔɔ nyɑ́ kʋsəsɩɩtʋ tɔɔ.

¹⁴²Nyɑ́ siɣisuɣu kɛ́ tɑm nyəŋkʋ kɛ́, nɑ nyɑ́ kiiu kɛ tɑmpɑnɑ.

¹⁴³Lɑŋwɑkəllɛ nɑ nəɣəsɛɛ pə hikɑ-m. Amɑ mɑ lɑŋlɛ hɛɛkənɑ nyɑ́ kiiŋ.

¹⁴⁴Nyɑ́ kʋsəsɩɩtʋ siɣisinɑ tɑm tɔɔ. Hɑ-m lɑɣɑtʋ nɑ mɑ́ wɛɛnɑ weesuɣu.

¹⁴⁵Mɑ yɑɑkɩ-ŋ nɑ mɑ lotu tənɑɣɑ. Tɑcɑɑ cɔ-m ɩlɛnɑ mɑ́ tɔkɩ nyɑ́ kʋsəsɩɩtʋ.

¹⁴⁶Mɑ yɑɑkɩ-ŋ, wɑɑsɩ-m. Ɩlɛnɑ mɑ tɔkɩ nyɑ́ kʋsəsɩɩtʋ.

¹⁴⁷Mɑ kʋləɣɩ nɑ pə́cɔ pə́ nyɑɑlɩ nɑ mɑ́ sələmɩ sɩ ń wɑɑsɩ-m. Mɑ tɑŋnɑ tɛɛlʋɣʋ kɛ nti n kɑ́ yɔɣɔtɩ tɔ.

¹⁴⁸Mɑɑ kpəkɩ ɩsəlɛ, hɑlənɑ pə́ nyɑɑlɩ nɑ mɑ́ mɑɣɑsɩ nyɑ́ tɔm.

¹⁴⁹Tɑcɑɑ n kɛ kʋpɑŋ kɛ́, ɩlɛ nɩɩ mɑ nɔɣɔ, nɑ ń hɑ-m weesuɣu ɩsɩɩ n sɩɩwɑ tɔ.

¹⁵⁰Mpɑ pɑ huliɣi ɩsɑɣɑtʋ wɑɑlɩ tɔ pɑ kpɛɣɛtɑɑ, nɑ pɑ́ hɑtələɣənɑ kiiu.

¹⁵¹Hɑɩ, Tɑcɑɑ, n kpətənɑ-m kɛ́ nɑ nyɑ́ kʋsəsɩɩtʋ tənɑ kɛ́ tɑmpɑnɑ.

¹⁵²Hɑtoo lɔŋ kɛ mɑ nyəmɑ́ sɩ n sɩɩ nyɑ́ kʋsəsɩɩtʋ kɛ tɑm tɔɔ.

¹⁵³Nyənɩ mɑ wɑhɑlɑ nɑ ń wɑɑsɩ-m. Mpi tɔ, mɑɑ sɔɔkɩ nyɑ́ kiiu.

¹⁵⁴Yoonɑ mɑ nɔɣɔ nɑ ń yɑ-m, nɑ ń hɑ-m weesuɣu ɩsɩɩ n yɔɣɔtʋɣʋ tɔ.

¹⁵⁵Asɑɣɑɑ kɑɑ nɑ nyʋɣʋ yɑpʋ. Mpi tɔ, pɑɑ pɛɛkəɣɩ nyɑ́ kʋsəsɩɩtʋ.

¹⁵⁶Hɑɩ, Tɑcɑɑ, nyɑ́ sɔɔlʋɣʋ tɔɔwɑɣɑ. Hɑ-m weesuɣu ɩsɩɩ n mɑɣɑsɑɑ tɔ.

¹⁵⁷Mɑ kolontunɑɑ nɑ mɑ kʋnyɔntʋlɑɑ tɔɔwɑɣɑ. Mɑɑ hɑtələɣənɑ nyɑ́ kiiŋ.

¹⁵⁸Mɑ tɑɑ kpɑɑkənɑ wɑɑlɩ lɩɩlɑɑ mpɑ pɑɑ tɔkəɣɩ nyɑ́ tɔm tɔɣɔ.

¹⁵⁹Tɑcɑɑ nyənɩ mɑ sɔɔlɑ nyɑ́ kʋsəsɩɩtʋ kɛ́. Ɩlɛ hɑ-m weesuɣu kɛ nyɑ́ kʋpɑntʋ tɔɔ.