Yontu 119:82-147 - PIIPILI ƖSƆ TƆM TAKƎLAƔA

⁸²Mɑ ɩsɛ tɛŋnɑ nyɑ́ nɔɣɔ sɩɩʋ kiŋ kɛ́, nɑ mɑ́ pɔɔsəɣɩ sɩ pəlee kɛ́ n kɑ hɛɛsɩ mɑ lɑŋlɛ?

⁸³Mɑ tɔnʋɣʋ cukɑ kpɑsɩ kɛ́ ɩsɩɩ kɔŋlɛ kɛ nyɔɔsɩ tɑɑ. Mɑ kɑɑ sɔɔ nyɑ́ kʋsəsɩɩtʋ tɔɔ.

⁸⁴Kʋyɛɛŋ ɩsənɑɣɑ pə kɑɑsɑ nyɑ́ təmlɛ tʋ mɑ? Wɑɑtʋ wei kɛ́ n kɑ́ hʋʋnɑ mpɑ pɑ tʋɣʋ-m wɑhɑlɑ tɔ?

⁸⁵Ɩsəcɑʋtʋnɑɑ huliɣinɑ mɑ nɔɣɔ tɔɔ kɛ́ pɔɔŋ, pɑɑ təŋəɣɩ nyɑ́ kiiu kɛ pɑɑ pəcɔ.

⁸⁶Nyɑ́ kʋsəsɩɩtʋ tənɑ kɛ́ kʋsiɣisitʋ kɛ́. Pɑ tʋɣʋ-m wɑhɑlɑ kɛ mʋsʋŋ kɛ́, wɑɑsɩ-m.

⁸⁷Pɑ kɑɣɑ pɑ hu-m nɑ pɑ́ kʋ-m ɩlɛ mɑɑ lɔɔkɩ nyɑ́ kʋsəsɩɩtʋ.

⁸⁸Hɑ-m weesuɣu kɛ nyɑ́ kʋpɑntʋ tɔɔ, ɩlɛnɑ mɑ təŋ nyɑ́ kʋsəsɩɩtʋ.

⁸⁹Hɑɩ, Tɑcɑɑ, n wɛ tɑm tɔɔ kɛ́. Nyɑ́ tɔm cɑɣɑ teu kɛ ɩsɔtɑɑ kɛ́.

⁹⁰Kʋpɑntʋ nti n lɑkɩ tɔ tɩɩ tɛŋ. Nyɑ́ sɩɩnɑ tɛtʋ nɑ tə nyɔɔwɑ teu.

⁹¹Nyɑ́ kʋsəsɩɩtʋ tɔɔ kɛ́ pə tənɑ pə cɑɣɑ teu kɛ sɑŋɑ. Mpi tɔ, pə tənɑ pə lɑkɩ-ŋ təmlɛ.

⁹²Ye mɑ lɑŋlɛ tɑɑ hɛɛnɑ nyɑ́ kiiŋ, mɑɑ lepɑ mɑ wɑhɑlɑ tɑɑ kɛ́.

⁹³Mɑ kɑɑ sɔɔ nyɑ́ kʋsəsɩɩtʋ. Ntəɣɩ n hɑɑkənɑ-m weesuɣu.

⁹⁴Mɑ kɛ́ nyɑ́ nyəŋ kɛ́, wɑɑsɩ-m. Mpi tɔ, nyɑ́ kʋsəsɩɩtʋ kɛ mɑ pɛɛkəɣɩ.

⁹⁵Asɑɣɑɑ cɛŋəɣɩ-m kɛ́ sɩ pɑ kʋɣʋ-m. Pɑɑ nɑ mpʋ nyɑ́ kʋsəsɩɩtʋ kɛ mɑ keŋnɑ ŋkpɑŋŋ.

⁹⁶Mɑ nɑwɑ təmɑ kʋpɑnɑ tənɑ tənɑsɩ. Amɑ nyɑ́ kʋsəsɩɩtʋ fɛɩ tənɑɣɑ.

⁹⁷Mɑ sɔɔlɑ nyɑ́ kiiu kɛ sɔsɔm kɛ́. Kʋ tɔm kɛ mɑ mɑɣɑsəɣɩ kʋyɛɛŋ tənɑ.

⁹⁸Nyɑ́ kʋsəsɩɩtʋ hɑɑkɩ-m ləmɑɣɑsɛɛ nɑ pə́ kəlɩ mɑ kolontunɑɑ. Mpi tɔ, tə wɛ mɑ kiŋ kɛ tɑm tɔɔ kɛ́.

⁹⁹Mɑ tɛɛ mɑ sɛɣɛsəlɑɑ tənɑɣɑ nyəm. Mpi tɔ, nyɑ́ kʋsəsɩɩtʋ kɛ mɑ mɑɣɑsəɣɩ.

¹⁰⁰Mɑ tɛɛ kʋkpɑtəlɑɑ kɛ ləmɑɣɑsɛɛ. Mpi tɔ, mɑ tɔkɑ nyɑ́ kʋtʋtʋtʋ.

¹⁰¹Mɑ kisɑ mpɑɑŋ ɩsɑɣɑŋ tɑɑ tɔntɛ sɩ mɑ́ pəsɩ nɑ mɑ́ tɔkɩ nyɑ́ tɔm.

¹⁰²Mɑɑ hɑtələɣənɑ nyɑ́ kʋsəsɩɩtʋ. Mpi tɔ, nyɑ́ sɛɣɛsəɣənɑ-m.

¹⁰³Nyɑ́ tɔm wɛ leleŋ kɛ mɑ tɑntɑhɑɑʋ tɑɑ kɛ́. Tə kəlɑ tɩɩŋ kɛ leleŋ kɛ mɑ nɔɣɔ tɑɑ.

¹⁰⁴Nyɑ́ kʋsəsɩɩtʋ pəsəɣənɑ-m nyəntʋ nɑ mɑ́ kisiɣi pɔpɔtʋ tənɑ.

¹⁰⁵Nyɑ́ tɔm wɛnnɑ ɩsɩɩ fətəlɑ kɛ mɑ nɔɔhɛɛ tɛɛ nɑ pə́ nɑɑkɩ mɑ mpɑɑʋ tɑɑ.

¹⁰⁶Mɑ tuuki sɩ mɑɑ tɔkɩ nyɑ́ kʋsəsɩɩtʋ. Mɑɑ lɑ ɩsɩɩ mɑ tuuwɑ tɔ.

¹⁰⁷Tɑcɑɑ, pə pɑsɑ-m teu kɛ́. Yele nɑ mɑ́ wɛɛnɑ weesuɣu ɩsɩɩ n yɔɣɔtʋɣʋ tɔ.

¹⁰⁸Hɑɩ, Tɑcɑɑ, mʋ mɑ sələmʋɣʋ ɩsɩɩ kʋcɔɔʋ. Sɛɣɛsɩ-m nyɑ́ kʋsəsɩɩtʋ.

¹⁰⁹Mɑ weesuɣu wɛ ɑsolɑ tɑɑ kɛ́ tɑm kɛ́. Amɑ mɑ kɑɑ sɔɔ nyɑ́ kiiu tɔm.

¹¹⁰Asɑɣɑɑ nyəkɩ-m kɑtɔsɩ kɛ́. Amɑ mɑɑ hɑtələɣənɑ nyɑ́ kʋsəsɩɩtʋ.

¹¹¹Nyɑ́ kʋtʋtʋtʋ kɛ-m kʋpɑntʋ sɔsɔɔntʋ kɛ tɑm tɔɔ kɛ́, tə hɛɛsəɣɩ mɑ lɑŋlɛ.

¹¹²Mɑ tʋ mɑ tɑɑ sɩ mɑ́ təŋ nyɑ́ kʋsəsɩɩtʋ*fɑ* hɑlənɑ mɑ səm.

¹¹³Mɑ tɑɑ kpɑɑnɑ ɑtɑɑ nɑ ɑ wɑɑlɩ yəlɑɑ kɛ́. Amɑ mɑ sɔɔlɑ nyɑ́ kiiu.

¹¹⁴Nyɑɣɑlɛ mɑ kpʋlʋɣʋ tətʋlɛ nɑ mɑ kentulu. Nyɑ́ kʋyɔɣɔtʋtʋ kɛ mɑ tɛɛləɣɩ.

¹¹⁵Asɑɣɑɑ mɛ ɩ́ hɑtələnɑ-m. Ɩlɛnɑ mɑ́ tɔkɩ mɑ Ɩsɔ kiiŋ.

¹¹⁶Te-m ɩsɩɩ n kɑ sɩɩʋ nyɑ́ nɔɣɔ tɔ nɑ mɑ́ hiki weesuɣu. Nyɑɣɑ mɑ tɛɛləɣɩ, tɑɑ tʋ-m fɛɛlɛ.

¹¹⁷Wɛɛ mɑ tentu nɑ pə́ yɑ mɑ nyʋɣʋ. Ɩlɛnɑ mɑ pɑɑsənɑ nyɑ́ kʋsəsɩɩtʋ kɛ tɑm tɔɔ mɑ́ tɑɑ hɛɛsɩ.

¹¹⁸N tɔɣɔnəɣɩ mpɑ pɑɑ təŋəɣɩ nyɑ́ kʋsəsɩɩtʋ tɔɣɔ. Mpi tɔ, pɑ tʋsʋɣʋ ɩɩ wɑɑsəɣɩ pʋlʋ.

¹¹⁹N lɔɔkɩ ɑtɛ ɑsɑɣɑɑ tənɑɣɑ ɩsɩɩ hute. Pə tɔɔ kɛ́ mɑ sɔɔlɑ nyɑ́ kʋsəsɩɩtʋ.

¹²⁰N tʋ nyɑ́ sɔɣɔntʋ kɛ mɑ tɑɑ nɑ mɑ tɔnʋɣʋ seliɣi, nɑ mɑ́ nyɑŋnɑ nyɑ́ hʋʋlɛ.

¹²¹Mɑ tɔkɑ nyɑ́ kiiu nɑ nyɑ́ siɣisuɣu kɛ́. Tɑɑ pɛtɩ-m mɑ ŋmɑkəllɑɑ.

¹²²Sɩɩ nyɑ́ təmlɛ tʋ mɑɣɑ nɔɣɔ sɩ n kɑ́ sənɑ-m. Tɑɑ yele nɑ kɑlɑmpɑɑnɩ nyə́mɑ muɣulu-m.

¹²³Mɑ tɑŋɑ nyɑ́ nyʋɣʋ yɑpʋ. Mɑ tɑŋɑ ɑkɑɩtʋ nti tə tɔm n sɩɩwɑ nɔɣɔ tɔ nɑ mɑ ɩsɛ tɛŋ.

¹²⁴Lɑ nyɑ́ təmlɛ tʋ mɑɣɑ kʋpɑntʋ, nɑ ń sɛɣɛsɩ-m nyɑ́ kʋsəsɩɩtʋ.

¹²⁵Mɑ kɛ́ nyɑ́ təmlɛ tʋ kɛ́, hɑ-m lɑɣɑtʋ nɑ mɑ́ nyɩ́ nyɑ́ kʋsəsɩɩtʋ.

¹²⁶Tɑcɑɑ pə tɑlɑɑ sɩ ń lɑ pʋlʋ. Pɑ yɔkəɣɩ nyɑ́ kiiu kɛ́.

¹²⁷Pə tɔɔ kɛ́ mɑ sɔɔlɑ nyɑ́ kʋsəsɩɩtʋ nɑ pə́ kəlɩ wʋlɑ kʋpɑmpɑŋ.

¹²⁸Pə tɔɔ kɛ́ mɑ nyənəɣɩ nyɑ́ kʋtʋtʋtʋ tənɑɣɑ kʋsiɣisitʋ nɑ mɑ tɑɑ kpɑɑkənɑ pɔpɔtʋ.

¹²⁹Nyɑ́ kʋsəsɩɩtʋ kɛ kʋpɑmpɑntʋ kɛ́ pə tɔɔ kɛ́ mɑ təŋəɣɩ-tɩ.

¹³⁰Nyɑ́ tɔm cɛkənɑʋ kɔŋnɑ nyɑɑləm kɛ́ tə hɑɑkɩ lɑɣɑtʋ kɛ mpɑ pɑ lɑŋɑ-tɩ tɔ.

¹³¹Mɑ liki nyɑ́ tɔm kɛ́ nɑ hiluɣu. Mpi tɔ, mɑ wɛnɑ nyɑ́ kʋsəsɩɩtʋ nyɔɣɔsɩ kɛ́.

¹³²Kɛɛsɩ nyɑ́ ɩsɛ nɑ mɑ tɔɔ nɑ ń nyənɩ mɑ pətɔɔtəlɛ, ɩsɩɩ n lɑkʋɣʋ mpɑ pɑ sɔɔlɑ nyɑ́ hətɛ tɔ.

¹³³Nyɑ́ tɔm ɩ́ tʋ-m nɑɑni. Tɑɑ yele nɑ ɩsɑɣɑtʋ nɑtəlɩ tə́ pəsɩ-m.

¹³⁴Wɑɑsɩ-m, yəlɑɑ cɑɑkɩ pɑ ŋmɑkələɣɩ-m. Ɩlɛnɑ mɑ tɔkɩ nyɑ́ kʋsəsɩɩtʋ.

¹³⁵Nyɑ́ ɩsɛntɑɑ ɩ́ hɛtənɑ nyɑ́ təmlɛ tʋ mɑɣɑ teu. Sɛɣɛsɩ-m nyɑ́ kʋsəsɩɩtʋ.

¹³⁶Wɑɑtʋ wei mɑ nɑɑkɩ sɩ pɑɑ tɔkəɣɩ nyɑ́ kiiu tɔ mɑ lukiɣi ɩsəlʋm kɛ́.

¹³⁷Hɑɩ, Tɑcɑɑ, n kɛ́ siɣisilu kɛ́, nɑ ń təŋəɣɩ tɑmpɑnɑ kɛ nyɑ́ hʋʋlɛ tɑɑ.

¹³⁸Nyɑ́ kʋsəsɩɩtʋ siɣisɑɑ kɛ nɑ tə kɛ́ tɑmpɑnɑ.

¹³⁹Wɑɑtʋ wei mɑ nɑɑkɩ mɑ kolontunɑɑ sɔɔkɩ nyɑ́ tɔm tɔ, pɑ́ɑ́nɑ́ sɔsɔɔnɑ kpɑɑkɩ-m kɛ́.

¹⁴⁰Nyɑ́ tɔm lɑpɑ tə təmlɛ. Nɑ nyɑ́ təmlɛ tʋ mɑ́, mɑ sɔɔlɑ-tɩ.

¹⁴¹Mɑɣɑ səkpelu kɛ́, nɑ nɔɣɔlʋ ɩɩ cɑɑkɩ-m. Amɑ mɑ tɑ sɔɔ nyɑ́ kʋsəsɩɩtʋ tɔɔ.

¹⁴²Nyɑ́ siɣisuɣu kɛ́ tɑm nyəŋkʋ kɛ́, nɑ nyɑ́ kiiu kɛ tɑmpɑnɑ.

¹⁴³Lɑŋwɑkəllɛ nɑ nəɣəsɛɛ pə hikɑ-m. Amɑ mɑ lɑŋlɛ hɛɛkənɑ nyɑ́ kiiŋ.

¹⁴⁴Nyɑ́ kʋsəsɩɩtʋ siɣisinɑ tɑm tɔɔ. Hɑ-m lɑɣɑtʋ nɑ mɑ́ wɛɛnɑ weesuɣu.

¹⁴⁵Mɑ yɑɑkɩ-ŋ nɑ mɑ lotu tənɑɣɑ. Tɑcɑɑ cɔ-m ɩlɛnɑ mɑ́ tɔkɩ nyɑ́ kʋsəsɩɩtʋ.

¹⁴⁶Mɑ yɑɑkɩ-ŋ, wɑɑsɩ-m. Ɩlɛnɑ mɑ tɔkɩ nyɑ́ kʋsəsɩɩtʋ.

¹⁴⁷Mɑ kʋləɣɩ nɑ pə́cɔ pə́ nyɑɑlɩ nɑ mɑ́ sələmɩ sɩ ń wɑɑsɩ-m. Mɑ tɑŋnɑ tɛɛlʋɣʋ kɛ nti n kɑ́ yɔɣɔtɩ tɔ.