1E BAKOVI DAGI i takia e Moses, “Ngane, o vano turane huriki o bole tala o Egipto, mu pea a tanga iea, mu lakea na malala a ta muholi vona ga habia ne mua. Hosi a ta muholi vona ne Abraham, ne Isak, ne Iakop, a ta maea, ‘Ga habia ne huriki a hamone matou a malala iea.’
2Ga rudua a agelo nau, ge muga mua, ge vakasiri a dala ne mua. Iau bara lili tala e huriki a Kenan, a Amor, a Hiti, a Peres, a Hivi, a Iebus ra ri made vona a malala iea.
3Mu vano mu made vona a malala kamumu i vona a maki ni kani. Pali iau i uka ma ga turane mua, a vuhuna mu tagege hateka. Ma ga turane mua, ga ratapile mua na dala.”
4Na tahuna ri longoa a nitane Bakovi Dagi, ri mangenge, i uka ma ri bagetu na nirodo kamumu ne ria.
5E BAKOVI DAGI i takia e Moses ge vakalongo e huriki a Israel vona a nitana, “Mu tagege hateka. Iau bara vano turane mua o ga made popote turane mua, bara ratapile mua. Ngane mu longo, mu kali tala a maka bagetua ne mua ni rata na gol, ga luhoi kamumu a ra naro ga rata virihi mua vona.”
6Na tahuna ri pe a lolo e Sinai, i uka ma ri bagetu na nirodo kamumu.
7Na tahuna e huriki a Israel ri lakea na tabeke tara, ri vakapesi a kape ne ria. Pali e Moses bara i vakapesi basi popote na mada a kape ni tagui e BAKOVI DAGI. E rei a viri i ngaru ni lohoka na ningaru vona, bara i lakea vona a kape iea.
8Na tahuna e Moses i dili vona a kape iea, e huriki ri made na kape ne ria bara ri pesi ri matanonoa e Moses i laho dili.
9Na tahuna i dili pali, a bubu bara i puru valai i pesi tabukoi na matana kape. E huriki ri longoa e BAKOVI DAGI i made pololilo na bubu, i ta turane Moses.
10Bara ri pesi na matana kape ne ria, ri masia a bubu i pesi tabukoi na matana kape na Vure, lakea ri lolu ri kavurikea a Vure.
11E BAKOVI DAGI i ta turane Moses i manga a bakovi i ta turana a bakovi tara. Na tahuna ru vata lobo, e Moses i hamule na mada. Pali a koma tamuhane, e Iosua, a bolekori ne Moses, e tune Nun, i made mule na kape.
12E Moses i takia e BAKOVI DAGI, “Muga o taki iau ga matakari e huriki ri gi lakea na malala ne ria. Pali i uka ma o taki iau vona e rei a bakovi ge turagu ge tuhori iau. Muga o ta maea, ‘A lohoka kamumu vomu, a ngaru ioe.’
13Ioe o ngaru iau, o taki iau vona a niluhoi vomu, ga lohoka kamumu vomu, ga rata vakaroro a maki o ngaru. O luhoi kamumu, e huriki a bakovi a ngatavine o vulaki pali, ngane ria a viri vomu.”
14E Bakovi Dagi i koli, i ta maea, “Iau ga vano turamu, ga habi a nivalemu vomu o malo.”
15Lakea e Moses i taki tabua e Bakovi Dagi, “Ioe o marikoi ni vano turane mia, naha ni matataro mia mi gi pea a tabeke iea.
16Ioe i uka ma o vano turane mia, mi gi lohoka navai vomu o ngaru mia? Ioe bara o vano turane mia, e huriki a kabu ranga bara ri lohoka vona, e huriki a Israel ria a viri vomu.”
17Lakea e BAKOVI DAGI i takia e Moses, “Iau ga rata manga a hini o taki, a vuhuna a ngaru ioe, a lohoka kamumu vomu.”
18Muri e Moses i takia, “A ngaru ioe go vakasiri iau vona a bagetua vomu.”
19E BAKOVI DAGI i koli, i ta maea, “Iau ga vakasiria vomu a naro kamumu nau, ga vakalongoa vomu a ragu e BAKOVI DAGI. O longo kamumu! Na tahuna a ngaru ni rata kamumu a viri, bara rata kamumua. Na tahuna a ngaru ni dodo a viri, bara dodoa.
20Pali i uka ma o kara ni masia a matagu. A viri i matai a matagu bara i mate.
21“Mata lakea, a kedo dagi i tabuli tabukoi nau, o pesi langa vona.
22Na tahuna a bagetua nau ge valai tabukoi vomu, ga ru dili ioe na dupina kedo ga kavitagu ioe na limagu, ge harena na tahuna a polotaro ioe.
23Muri ga bole talea a limagu, o masia a bitogu, pali a matagu i uka ma go masia.”
