1E BAKOVI DAGI i rata kamumua e Sara, i muri mai a ngava i takia vona, lakea i habia vona a ningaru i taki mugea.
2E Sara i singou i podea a koma na tahuna e Abraham i gare pali. E Sara i podea a koma na tahuna e Bakovi Dagi i taki mugea pali.
3E Abraham i vunua a koma i podea e Sara, e Isak.
4Na tahuna e Isak i tahoka a parava i polotolu, e Abraham i muri mai a nitana Vure, i palea a kuline tuna.
5E Abraham i tahoka a pida i 100, lakea e Sara i podea e Isak.
6Muri, e Sara i ta maea, “A Vure i habia nau a nipitei. E rei i longoa a velengagu bara i vivi turagu.”
7E Sara i ta tabu, “Muga, e rei a viri ge takia e Abraham ne Sara ge tahoka a koma? Ngane e Abraham i gare, pali a podea vona e tuna bakovi.”
8E Isak i kulabo, lakea i pile a ruru. Na tahuna i pile a ruru, lakea e Abraham i made maia.
9E Hagar, ra ngatavine o Egipto, ia tara i podea ne Abraham a koma bakovi. Na parava tara, e Sara i masia a koma iea i rehi turana e tuna,
10lakea i takia e Abraham, “O lili talea ra vorakato ngatavine turana e tuna. E tuna vorakato ngatavine, i uka ma ru gu vaveru vona e tugu e Isak, a mahala vomu.”
11Ra ngava iea, i ratea e Abraham i loho lege lae a vuhuna e Ismael tara e tuna.
12Pali a Vure i takia, “Naha ni luhoi lege lae vona a koma bakovi turana a vorakato ngatavine vomu. O longo maia a ngava i taki ioe vona e Sara, a vuhuna e Isak bara i vakabele e huriki a hamomu.
13E tuna vorakato ngatavine vomu tara ga ratea ge vakabele e huriki a hamona ri gi ala kupo, a vuhuna ia tara e tumu.”
14Na hatelanga pokopoko na parava muri, e Abraham i bole ranga maki ni kani turana a naru ni kiru dili na kulina meme, i vakakube e Hagar vona, i rudua ge vano turana e tuna. E Hagar i vano i laho viliha na tabeke i ngeki ne Bersiba.
15A naru na buroi i lobo, lakea e Hagar i vakamadea e tuna na taruna kai kiroko.
16Muri i laho lokovonga popote, i made puru, a vuhuna i koi ni masia e tuna ge mate. E Hagar i made puru i vakatubu ni tangi.
17Muri a Vure i longoa a koma i tangi, lakea a agelo i gale valai meli na hunu i ta maea, “Hagar i navai? Naha ni mangenge. A Vure i longoa pali a nitangi ne tumu.
18O vano o tuli pesia, o tangotata tora ia, a vuhuna iau ga ratea ge bele kupo e huriki a hamona.”
19Muri a Vure i vakapalala a matane Hagar, lakea i masia a lomu. I vano i kirua a buroi, i vakaninua e tuna.
20A Vure i matakaria e Ismael, i koru rike. I made na tabeke i ngeki, ia a mari ni voro a kiniperi.
21Na tahuna i made na tabeke i ngeki e Paran, e kinana i vakaparangia na ngatavine o Egipto.
22Na parava tara e Abimelek turane Pikol, a burena tara vona, ru lakea ne Abraham. Lakea e Abimelek i takia, “A Vure i turamu na maki lobo o rata.
23Ngane o kaba o ta muholi nau na matana Vure, naha ni tami iau, e huriki e tugu, turana e huriki a hamogu. Ioe a mosi, o vakasiri a naro kamumu nau turana a malala o made vona, i manga iau a rata a naro kamumu vomu.”
24Lakea e Abraham i koli mule, i ta maea, “Iau a ta muholi.”
25Muri e Abraham i hehea e Abimelek na lomu vona e huriki a vora ne Abimelek ri radia.
26Lakea e Abimelek i ta maea, “Iau i uka ma a lohoka vona a viri i ratea a naro iea. Ioe i uka ma o vakalongo muga iau. Mona kunana a longoa a ngava iea.”
27Lakea e Abraham i bole ranga sipsip a bulmakau, i habi ne Abimelek, ru valongo mai a ngava.
28E Abraham i bole tala na kabu na sipsip vona, a tuna sipsip a kinana i polorua, i ru here ria.
29Lakea e Abimelek i nanea e Abraham, “I navai o bole a tuna sipsip a kinana i polorua, o ru here ria?”
30E Abraham i ta maea, “O bole na limagu a tuna sipsip a kinana i polorua nga, ge vakasiri, iau a kelia ra lomu iea.”
31Ra tanga iea ni gale Bersiba, a vuhuna ra bakovi ala rua nga ru valongo mai a nita muholi vonga.
32Muri na ngava dagi ni rata o Bersiba, e Abimelek rua e Pikol, a burena tara vona, ru hamule lakea na robo na Palestina.
33E Abraham i varoa o Bersiba a kai a tamaris, lakea i kavurikea vonga a rana e BAKOVI DAGI, a Vure Vakaroro.
34Muri e Abraham i made tabaka na robo na Palestina na parava i kupo.
