1Lon eu pwin ewe king Pelsasar a föri eu kametip mi lapalap fän iten nöün kewe engeröü samol. Iwe ra fokun ünüfengen wain.
2Nge lupwen Pelsasar a ekis puch ren ünüman wain, a apasa pwe repwe uwato ekewe kap kolt me silifer Nepukatnesar saman we a angei seni ewe Imwenfel lon Jerusalem. Pun Pelsasar a mochen pwe i me nöün kewe samol, pwal pwülüan me ülüpwülüan kana repwe aea le ün.
3Iwe, ra uwato ekewe kap kolt me silifer mi nom lon ewe Imwenfelin Kot lon Jerusalem me lom, nge ewe king me nöün kewe samol, pwal pwülüan me ülüpwülüan kana ra ün wain lor.
4Ra pwal mwareiti ar kewe uluulun kot ra för seni kolt, silifer, piras, mächä, irä me fau.
5Lon ewe chök otun a pwä aütün pöün eman aramas a makei won ewe etip mi pwech lon imwen ewe king awenewenen ewe lenien atittin. Iwe, lupwen ewe pau a makei ewe mak, ewe king a küna.
6Mürin, won mesen ewe king a wopwechepwechela, nge pwäsukun ra nechefengen, pun a fokun niuokus.
7Iwe, ewe king a kökkö fän leüömong pwe repwe emwenato ekewe sourong, ekewe souürür me ekewe soupwe. Nge lupwen ra feito, ewe king a üreniir, “Iö leimi epwe tongeni aleani ei mak o awewe ngeniei wewen, üpwe fang ngeni üfen king mi parochol, epwe pwal mwärini epa mwärämwär seni kolt fän üan. Iwe, epwe nampa ülüngat le nemenem lon mwüi.”
8Mürin, nöün ewe king soutipachem meinisin ra kanoto ren, nge esap wor eman a tongeni aleani ewe mak ika awewe ngeni ewe king wewen.
9Ren ei a lapala än ewe king Pelsasar niuokus, nge wowon a siwil, pwal nöün kewe samol ra rükö.
10Iwe, lupwen ewe kiwin inen ewe king a rongorong mwökütükütün ewe king me nöün kewe samol, a tolong lon ewe lenien kametip o apasa, “Amwo ewe king epwe manau tori feilfeilachök. Esap wor popun pwe kopwe niuokus ika epwe siwil wowomw.
11Pun mi wor eman mwän lon mwum, ngünün ekewe kot mi pin ra nom won. Iwe, lon mwün semom a fen pwä pwe an ekiek a saram, a pwal tipachem o silelap usun chök ekewe kot. King Nepukatnesar semom we a seikätä pwe epwe samolun ekewe soutipachem me sourong, souürür me soupwe.
12Pun a pwä pwe a eäni tipachem me silelap mi fokun amwarar, a tufich le awewei tan, a pwal asilla wewen asisil o pwäri mine a monomon. Iei mine kopwe körato Taniel mi pwal iteni Peltesasar me ren ewe king, pwe epwe awewe ngonuk wewen ei mak.”
13Mürin, ra emwenato Taniel fän mesen ewe king. Nge ewe king a kapas ngeni, “Ifa usun, en Taniel eman lein ekewe chon Juta mi oola, semei we ewe king a emwenato seni Juta?
14Iwe, üa rongorong pwe ngünün ekewe kot mi pin ra nonom womw, om ekiek a saram, om tipachem me silelap a pwal fokun alolol.
15Iwe, ekewe soutipachem me sourong ra feito rei pwe repwe aleani ei mak o awewe ngeniei wewen, nge resap tongeni.
16Nge üa rong pwe en ka tongeni awewei mettoch o pwäri mine a monomon. Iwe, are kopwe tongeni aleani ei mak o awewe ngeniei wewen, üpwe fang ngonuk üfen king mi parochol o amwärämwäralong fän uom epa mwärämwär seni kolt, üpwe pwal seikuketä pwe kopwe nampa ülüngat le nemenem lon mwüi.”
17Mürin, Taniel a üreni ewe king, “Kose mochen kopwe püsin eäni om kewe lifang, nge liwini we kopwe ngeni eman. Nge inamwo, üpwe chök aleani ngonuk en king ei mak o awewe ngonuk wewen.
18Ai king, ewe Kot mi Fokun Tekia a ngeni Nepukatnesar semom we mwün me nemenem, pwal iteüöch me ling.
19Iwe, aramasen mwü me fanü meinisin, pwal aramas mi eäni sokopaten fos ra niuokusiti Nepukatnesar o chechech fän mesan pokiten ewe nemenem mi watte Kot a ngeni. Iwe, a niela iö a mochen niela, a pwal amanaua iö a mochen amanaua. A seikätä iö a mochen seikätä, nge a asapwilätiu iö a mochen asapwilätiu.
20Nge lupwen a lamalamtekia o ülöförea, ewe king a tur seni wisan wisen king, nge lingan a pöüt seni.
21Iwe, aramas ra asüela seni me leir, nge tipan a wiliti tipen man, pwe a chök nonom lein ekewe aas mi mwacho. Iwe, a mongö fetil usun chök kow, nge inisin a chöchön ren amurenipwin tori a mefi pwe ewe Kot mi Fokun Tekia a nemeni mwün aramas, nge a ngeni iö a mochen fang ngeni.
22Iwe, en Pelsasar nöün Nepukatnesar we ka fen silei ekei mettoch meinisin, nge kosap atekisonok.
23Ka ü ngeni ewe Samolun läng ren om apasa pwe repwe uwato reöm ekewe kapen lon an Imwenfel. Iwe, en me noum kewe samol, pwülüom me ülüpwülüom kana oua pwal aea le ün wain. Iwe, ka mwareiti ekewe uluulun kot mi för seni silifer me kolt, pwal seni piras, mächä, irä me fau, ekewe uluulun kot resap tongeni küna och ika rongorong ika memef. Nge kosap asamolu ewe Kot mi amwöchü manauom o silei om föför meinisin.
24Iei popun Kot a tinato ewe pau pwe epwe makei ei mak.
25Iwe iei kapasen ei mak: Mene, Mene, Tekel, Parsin.
26Nge iei wewen eu me eu ekei kapas: Mene wewen Kot a aleani ränin om nemenem o aükätiu.
27Tekel wewen Kot a kilonuk, nge a pwä pwe ka fokun päl.
28Peres wewen mwum epwe kinikinfesen, nge chon Metia me chon Persia repwe mwüni.”
29Mürin, Pelsasar a apasa pwe repwe aüföüfa ngeni Taniel echö üfen king mi parochol o amwärämwäralong fän üan epa mwärämwär seni kolt. Iwe, pworausen Taniel a rongofeil pwe epwe nampa ülüngat le nemenem lon mwün Pelsasar.
30Nge lon ewe chök pwinin, Pelsasar ewe kingen Papilon a ninnila.
31Iwe, Tarius ewe re Metia a popuetä le nemeni ewe mwü, lupwen a ierini wone me ruu.
