Soũↄ 119 - Bibeli Luayãtaalá

¹Báaadeↄn gbɛ̃́ pↄ́ aa ku tàaesai aa Dii ikoyã kũaↄ ũ.

²Báaadeↄn gbɛ̃́ pↄ́ aaì Dii yã'onɛ ma aaì aà kĩ́i wɛɛlɛ ń nↄ̀sɛmɛndooↄ ũ.

³Aali yãkpaanlakɛo, aaì aà dↄ̀ↄ sɛ́.

⁴N n ↄtondↄkĩi ↄ̀lↄwɛ̃ɛ, kɛ́ wàↄ tɛi ń laaio.

⁵Má ye màↄ ku ma dↄ̀ↄwaɛ, míↄ n yãdilɛnɛↄ kũa.

⁶Tó má n yãdilɛaↄ kũa píi, bee a to wí ma kũo.

⁷Gↄↄ pↄ́ málɛ n yãmaapiↄ dada, má n sáaukpa ń nↄ̀sɛpuaoɛ.

⁸Máↄ n yãdilɛnɛↄ kũaɛ, ńsu ma to we míↄmiↄo.

⁹Kpelewa ɛ̀waaso a kɛ àↄ ku gbãlɛsaii? Sema aà yãkɛa kpaaĩ ń n yã́o.

¹⁰Málɛ n kĩ́i wɛɛlɛ ń nↄ̀sɛmɛndoo, ńsu to mà pãalɛ n yãdilɛaↄnɛo.

¹¹Ma n yã́ dà ma sↄ̃ guu, kɛ́ másu duunakɛnɛo yã́i.

¹²Ma n sáaukɛ̀, Dii, ǹ n yãdilɛnɛↄ damɛɛ.

¹³N ikoyã pↄ́ bↄ̀ ń lɛ́uↄ píi, má dau siu nɛ́ɛ.

¹⁴Málɛ pↄnakɛ ń n yã'onɛↄ lá wì kɛ ń àizɛɛowa.

¹⁵Málɛ n ↄtondↄkĩi wàaipa, ma làasoo ku n kɛkɛáↄwa.

¹⁶Ma pↄ kɛ̀na n yãdilɛaↄwa, n yã́ a sãmaguo.

¹⁷Yãmaakɛ mapi n zↄ̀blenaɛ, mí e màↄ ku màↄ n yã́ kũa.

¹⁸Ma wɛ́ kɛ̃́mɛɛ, kɛ́ mà wɛsi n ikoyã bↄnsaɛↄlɛ.

¹⁹Bↄ̀mↄn ma ũ dṹnia guu, ńsu ǹ n yãdilɛaↄ ulɛmɛɛo.

²⁰N ikoyãↄ nidɛa gↄↄpii mɛ́ tò ma nisĩna vùa.

²¹Ni waladeↄ lele, ni láaikɛmá, gbɛ̃́ pↄ́ pã̀alɛ n yãdilɛaↄnɛpiↄ.

²²Ma bↄ sↄ̃́sↄ̃a ń sa pↄ́ aaì kamaguou, asa má n yã'onɛↄ kũaɛ.

²³Baa kɛ́ kíaↄ zↄ̃̀lɛ lɛkpàaĩmazi, ma làasoo aↄ ku n yãdilɛnɛↄwaɛ.

²⁴N yã'onɛↄ mɛ́ ì ma pↄ kɛ na, n yã́pi mɛ́ ì lɛdaa.

²⁵Ma nisĩna naa líwa. Ma misi lá ń òwa.

²⁶Ma a yãkɛaↄ dↄ̀dↄnɛ, ↄ̃ ń wèa. Ǹ n yãdilɛnɛↄ damɛɛ.

²⁷To mà n ↄtondↄkĩiↄ dↄ̃, ma làasoo iↄ ku n yãbↄnsaɛↄwa.

²⁸Kua pↄsiau ma nↄ̀sɛ ↄ́ↄlↄ̀. Ma gba gbãa lá ń òwa.

²⁹Ma kɛ̃ sã́sãzɛwa, ní ma gba zɛ́ mà zɛ ń n ikoyão.

³⁰Ma sĩana zɛ́ sɛ̀, ma sↄ̃ ìↄ ku n ikoyãwa.

³¹Má n yã'onɛↄ kũa ↄplapla. Dii, ńsu to wí ma kũo.

³²Má wãa ń n yãdilɛaↄ, asa n ma sↄ̃ dàmɛɛ doũɛ.

³³Dii, ǹ n yãdilɛnɛↄ zɛ́ ↄlↄmɛɛ màↄ kũa e ma wɛ̃ni lɛ́u.

³⁴Ma gba ↄ̃nↄ màↄ n ikoyã kũa, míↄ zĩkɛwà ń nↄ̀sɛmɛndoo.

³⁵Ma da n yãdilɛaↄ zɛ́u, asa bee mɛ́ ì kamagu.

³⁶To ma sↄ̃ ta n yã'onɛↄwa, asu tá gbɛ̃ble'aiwao.

³⁷To ma wɛma pↄ́ gianaↄla, ma lɛ́ ń láo n zɛ́ guu.

³⁸Yã́ pↄ́ ń ò kɛ mapi n zↄ̀blenaɛ, lɛ́ pↄ́ ń gbɛ̃̀ n vĩakɛnaↄnɛpi.

³⁹To sↄ̃́sↄ̃a pↄ́ má a vĩa vĩ gɛ̃ ma swã́ kpɛ, asa n yãkɛkɛa maaɛ.

⁴⁰Má ye n ↄtondↄkĩii fá, ma lɛ́ ń láo n maakɛa guu.

⁴¹Dii, mↄ gbɛ̃kɛkɛmɛɛ, ma suaba lá ń òwa,

⁴²mí yã́zãsi ma sↄ̃̀sↄ̃nawa, asa málɛ n yã́ náaikɛ.

⁴³Ńsu to màↄ ku sĩana'oanɛ́ saio, asa n ikoyãↄ ↄ̃ ma wɛ́ dↄi.

⁴⁴Máↄ n ikoyãↄ kũa za gbã e gↄↄpiiɛ,

⁴⁵míↄ bɛ ma laaiwa, asa ma n ↄtondↄkĩi wɛ̀ɛlɛɛ.

⁴⁶Má n yã'onɛↄ o kíaↄnɛ, wí a ma kũo.

⁴⁷N yãdilɛaↄ ì ma pↄ kɛ na, asa má ye yã́piↄiɛ.

⁴⁸Má ye n yãdilɛaↄi ↄ̃ ma ↄdↄi, mi làasookɛ n yãdilɛnɛↄwa.

⁴⁹To yã́ pↄ́ ń ò n zↄ̀blenaɛ dↄngu, asa ń tò ma wɛ́ dↄiɛ.

⁵⁰Ma nↄ̀sɛ ì níni ma taasikɛa guu, asa n yã́ mɛ́ ì ma lɛ́ ń láo.

⁵¹Waladeↄ lɛ́ ma yáalↄ maamaaɛ, ń beeo má pãalɛ n ikoyãɛo.

⁵²Mi làasookɛ n ikoyã yãaↄwa, ↄ̃ aaì ma nↄ̀sɛ nínimɛɛ, Dii.

⁵³Ma pↄ ì pa maamaa vãikɛnaↄ pãkpaa n ikoyãi yã́i.

⁵⁴Mi lɛsi n yãdilɛnɛↄ musu ma kua dṹniau bↄ̀mↄ ũ guu.

⁵⁵N yã́ ìↄ dↄmagu gwã́, Dii, ↄ̃ miↄ n ikoyãↄ kũa.

⁵⁶Má yã́ beeↄ dↄ́ɛ dↄ̃, asa miↄ n ↄtondↄkĩi gwaɛ.

⁵⁷Dii mɛ́ ma baa ũ, ma lɛgbɛ̃̀ ma mɛ̀ má n yãma.

⁵⁸Mi awakpanɛ ń nↄ̀sɛmɛndoo, sùuukɛmanↄ lá ń òwa.

⁵⁹Ma a yãkɛaↄ gwà, ↄ̃ ma n yã́zɛ sɛ̀.

⁶⁰Máↄ wãa, má zɛzɛo, má n yãdilɛaↄ da.

⁶¹Baa tó gbɛ̃vãiↄ ba lìamazi, n ikoyãↄ sãmaguo.

⁶²Mi fɛlɛ mà n sáaukpa wɛɛdo n ikoyã maapiↄ musu.

⁶³N vĩakɛnaↄ gbɛ̃nan ma ũ, gbɛ̃́ pↄ́ aaì n ↄtondↄkĩi gwaↄ.

⁶⁴Dii, n gbɛ̃kɛ dṹnia pà. Ǹ n yãdilɛnɛↄ damɛɛ.

⁶⁵N maakɛ̀ mapi n zↄ̀blenaɛ, lá ń òwa, Dii.

⁶⁶Wɛzɛ̃ ń dↄ̃ao damɛɛ, asa ma n yãdilɛaↄ sìɛ.

⁶⁷E ǹyↄ̃ gɛ́ ↄtↄ̃ↄlɛia, má sã́sãaɛ, ãma tiasa má n yã́ kũa.

⁶⁸Ń maa mɛ́ ni yãmaakɛ. Ǹ n yãdilɛnɛↄ damɛɛ.

⁶⁹Baa kɛ́ waladeↄ yã́sia lì wa nànaa, miↄ n ↄtondↄkĩi gwa ń nↄ̀sɛmɛndooɛ.

⁷⁰An swã́ yìaa, aa sↄũkũ̀, mapi sↄ̃ ma pↄ na n ikoyãwa.

⁷¹N ↄtↄ̃ↄlɛaa kɛ̀ maaɛ, asa ma e ma n yãdanɛↄ dàdaɛ.

⁷²Ikoyã pↄ́ lɛ́ bↄ n lɛ́u maamɛɛ dɛ vua ń ã́nusu ↄwatɛ̃ ↄ̀aa sↄoↄla.

⁷³N ↄ mɛ́ ma ikàsa, ↄ̃ n ma kɛ. Ma gba ↄ̃nↄ mà n yãdilɛaↄ dada.

⁷⁴Tó n vĩakɛnaↄ ma e, an pↄ ì kɛ na, asa n yã́ ↄ̃ ma wɛ́ dↄi.

⁷⁵Dii, má dↄ̃ kɛ́ n ikoyãↄ maa, kɛ́ ń náai vĩ yã́i ↄ̃ n ↄtↄ̃̀ↄlɛa.

⁷⁶Gbɛ̃kɛkɛmɛɛ, ma nↄ̀sɛ i níni, lá ń ò mapi n zↄ̀blenaɛwa.

⁷⁷Mↄ ǹ wɛ̃nadↄ̃mɛɛ màↄ ku aafia, asa n ikoyãↄ mɛ́ ma pↄnakɛbↄ ũ.

⁷⁸To wí waladeↄ kṹ, asa aa yãdↄ̀aɛ, mí làasookɛ n ↄtondↄkĩiwa.

⁷⁹To n vĩakɛnaↄ mↄ ma kĩ́i, gbɛ̃́ pↄ́ aa n yã'onɛ dↄ̃piↄ.

⁸⁰To màↄ ku tàaesai n yã́ↄ musu, kɛ́ wí su ma kũo yã́i.

⁸¹Ma sↄ̃anzi ǹ ma suaba e ma nisĩna lòo, n yã́ ↄ̃ ma wɛ́ dↄi.

⁸²Ma wɛdↄ̀dↄ n lɛgbɛ̃ai e ma wɛ́ wò, bↄɛ ńyↄ̃ ma nↄ̀sɛ nínimɛɛi?

⁸³Má dɛ lán báa bↄ̀ↄ pↄ́ tɛ́zãna màwaɛ, ń beeo n yãdilɛnɛↄ lí sãmaguo.

⁸⁴Mapi n zↄ̀blena máↄ n dã e bↄɛ ni? Bↄɛ ńyↄ̃ ĩada ma wɛ̀lɛↄwai?

⁸⁵Waladeↄ ì ɛyↄ̃mɛɛ, an yã́ lí kↄ̃'e ń n ikoyãoo.

⁸⁶N yãdilɛaↄ píi náai vĩ. Dↄmalɛ, asa wàlɛ ĩadaa pãɛ.

⁸⁷À gↄ̃̀ yↄↄ aa ma bↄ dṹniauɛ, mapi sↄ̃ mi n ↄtondↄkĩi tó weo.

⁸⁸Ma lɛ́ ń láo n gbɛ̃kɛ yã́i, mí n yã'onɛ ma.

⁸⁹Dii, n yã́ ìↄ ku gↄↄpiiɛ, a zĩ́napɛlɛa musu n bɛ.

⁹⁰Ń náai vĩ wɛ̃ ń wɛ̃o, n dṹnia kàlɛ, ↄ̃ a ku.

⁹¹N ikoyãↄ mɛ́ tò pↄ́pii kú gbã, asa pↄ́pii misiilɛanɛ.

⁹²Tó n ikoyã mɛ́ ma pↄnakɛbↄ ũo, dↄ̃ ma mìdɛ ma taasikɛa guu.

⁹³N ↄtondↄkĩi a sãmagu bauo, asa a sabai ↄ̃ n ma lɛ ń láo.

⁹⁴N pↄ́n ma ũ, ma suaba, asa miↄ n ↄtondↄkĩi wɛɛlɛɛ.

⁹⁵Gbɛ̃vãiↄ lɛ́ ma wɛ, ↄ̃ ma laai ku n yã'onɛↄwa.

⁹⁶Má è pↄ́pii maa lɛ́ kuɛ, ãma n yãdilɛaↄ zↄ̃ↄ lɛ́ vĩo.

⁹⁷Má ye n ikoyãi à kɛ̀ zài, miↄ làasookɛwà gↄↄpiiɛ.

⁹⁸N yã́ tò ma ↄ̃nↄ dɛ ma ibɛɛↄla, asa a ku ma sↄ̃u gↄↄpiiɛ.

⁹⁹Ma wɛzɛ̃ dɛ ma yãdanɛdeↄla, asa ma làasoo ìↄ ku n yã'onɛↄwaɛ.

¹⁰⁰Ma ↄ̃nↄ dɛ maezↄ̃ↄↄla, asa miↄ n ↄtondↄkĩiↄ gwaɛ.

¹⁰¹Mi gbápɛlɛ zɛ́ vãie guuo, kɛ́ mà e màↄ n yã́ kũa yã́i.

¹⁰²Mi kɛ̃ n ikoyãↄwao, asa ḿmɛ ń dàmɛɛ.

¹⁰³N yã́ↄ namɛɛ à kɛ̀ zài, a na dɛ zↄ́a ma lɛ́u.

¹⁰⁴N ↄtondↄkĩi ì ma gba ↄ̃nↄ, a yã́i tò má za sã́sãzɛ píiu.

¹⁰⁵N yã́ mɛ́ filia ũ ma gbázĩ, ì gupumɛɛ zɛ́u.

¹⁰⁶Ma lɛgbɛ̃̀ ↄ̃ ma kpalɛ ma siwà, ma mɛ̀ máↄ zĩkɛ n ikoyãↄwaɛ.

¹⁰⁷Ma taasikɛa kɛ̀ zài, Dii. Ma lɛ́ ń láo lá ń òwa.

¹⁰⁸To n sáau pↄ́ málɛ kpá kángu, ní n ikoyãↄ damɛɛ, Dii.

¹⁰⁹Gↄↄpii miↄ ku ga lɛ́zĩɛ, ń beeo n ikoyãↄ lí sãmaguo.

¹¹⁰Vãikɛnaↄ baikpàmɛɛ, kási mi zã n ↄtondↄkĩiwao.

¹¹¹N yã'onɛↄá ma pↄ́ɛ gↄↄpii, aaì to ma pↄ kɛ na.

¹¹²Ma a sↄ̃ kpà n yãdilɛnɛↄwa, máↄ kũa gↄↄpii e ma wɛ̃ni lɛ́uɛ.

¹¹³Má za nↄ̀sɛmɛmpladeↄgu, má ye n ikoyãi.

¹¹⁴Ḿmɛ ń ma ulɛkĩi ń ma sɛ̀ngbaoo ũ, n yã́ ↄ̃ ma wɛ́ dↄi.

¹¹⁵À gomala vãikɛnaↄ, kɛ́ mà zĩkɛ ma Lua yãdilɛaↄwa.

¹¹⁶Ǹyↄ̃ ma kũa lá ń òwa, míↄ ku, ńsu to tãmaa ma nɛo.

¹¹⁷Ǹyↄ̃ dɛ ma gbãa ũ, míↄ aafia, ma wɛ́ iↄ pɛ n yãdilɛnɛwa láasai.

¹¹⁸Ɔzↄ̃ gbɛ̃́ pↄ́ pã̀alɛ n yãdilɛnɛɛi, an mↄafiliyã a àikɛnɛ́o.

¹¹⁹Ni dṹnia vãikɛnaↄ waa bìsa ũ, a yã́i tò má ye n yã'onɛi.

¹²⁰Má n vĩa vĩ, ma mɛ ì seenata, n ikoyãↄ ì to vĩa ma kũ.

¹²¹Ma yãkɛ̀ a zɛ́wa wásawasaɛ, ńsu ma to ma ĩadamadeↄnɛo.

¹²²Kpɛ́gaausi mapi n zↄ̀blenaɛ, ńsu to waladeↄ ma wɛtão.

¹²³Ma wɛ́ dↄ n dↄnlɛi e ma wɛ́ wò, má sↄ̃́anzi ǹ ma suaba lá ń òwa.

¹²⁴Yãkɛmɛɛ n gbɛ̃kɛ guu, ní n yã́ da mapi n zↄ̀blenaɛ.

¹²⁵N zↄ̀blenan ma ũ, ma gba ↄ̃nↄ, kɛ́ mà n yã'onɛↄ yáasi dↄ̃.

¹²⁶N yãkɛgↄↄ kà, Dii, wàlɛ bↄ n ikoyã kpɛ.

¹²⁷Má ye n yãdilɛaↄi dɛ vuaa, baa vua baasaa.

¹²⁸Má è n ↄtondↄkĩi maa, a yã́i má za sã́sãzɛ píiu.

¹²⁹N yã'onɛↄ dɛmɛɛ yãbↄnsaɛ ũ, Ayãmɛto má dà ma sↄ̃u.

¹³⁰N yã́ bↄↄlɛkɛa ì gupunɛ́, ì nↄ̀sɛdoũdeↄ gba ↄ̃nↄ.

¹³¹Ma lɛ́ ɛlɛa, málɛ we fòofoo, asa n ikoyãↄ ni lɛ́ ma dɛɛ.

¹³²Ma wɛgwa, sùuukɛmanↄ, lá ni kɛ gbɛ̃́ pↄ́ ye n tↄ́iↄnɛwa.

¹³³Ma dazɛwa lá ń òwa, ńsu to yãvãie kibleao.

¹³⁴Ma bↄ gbɛ̃́ taiinkɛnaↄ ↄzĩ, kɛ́ màↄ n ↄtondↄkĩi gwa.

¹³⁵Mapi n zↄ̀blena wɛgwa, ní tó mà n yãdilɛnɛↄ dↄ̃.

¹³⁶Wɛ́'i lɛ́ bàalɛ ma kùawa, kɛ́ wa n ikoyã kũao yã́i.

¹³⁷Dii, ń maa, n yãkɛkɛaↄ zɛvĩ.

¹³⁸N n yã́ↄ dìlɛ a zɛ́wa, aa náai vĩ maamaaɛ.

¹³⁹N yã́ lɛ́ kɛ ma ibɛɛↄnɛ yãe ũo, ↄ̃ a yã́ lɛ́ ma dɛ.

¹⁴⁰Wa è n yã́ sãa vĩo, mapi n zↄ̀blena, má yei maamaaɛ.

¹⁴¹Pↄen ma ũo, wì sakamagu, ń beeo n ↄtondↄkĩi lí sãmaguo.

¹⁴²N yã́ ìↄ zɛvĩ gↄↄpiiɛ, n ikoyã sĩana vĩ.

¹⁴³Taasi n yã'ↄ̃mao ma le, ãma n yãdilɛaↄ mɛ́ ma pↄnakɛbↄ ũ.

¹⁴⁴N yã'onɛↄ maa gↄↄpiiɛ, ma gba ↄ̃nↄ kɛ́ màↄ ku.

¹⁴⁵Mi n sísi ń nↄ̀sɛmɛndoo, wea Dii, míↄ n yãdilɛnɛↄ kũa.

¹⁴⁶Mi lɛzunzi, ma suaba, míↄ n yã'onɛↄ kũa.

¹⁴⁷Mi fɛlɛ gudↄsai mà wiilɛma, n yã́ ma wɛ́ dↄi.

¹⁴⁸I lí na ma wɛ́u gwãasĩnao, kɛ́ mà e làasookɛ n yã́wa yã́i.

¹⁴⁹Ma yãma n gbɛ̃kɛ yã́i, Dii, ma lɛ́ ń láo lá n ikoyã'òwa.

¹⁵⁰Gbɛ̃́ pↄ́ lɛ́ lɛkpaaĩmaziↄ kãi, aa zã̀ ń n ikoyão.

¹⁵¹Ń kumanↄ kãi, Dii, n ikoyã píi sĩana vĩ.

¹⁵²Má dↄ̃̀ n yã'onɛↄwa à gɛ̃̀gɛ̃, kɛ́ ń dìlɛ àↄ ku gↄↄpii yã́i.

¹⁵³Ma taasi gwa, ní ma suaba, asa n ikoyã i sãmaguo.

¹⁵⁴Zɛmanↄ, ní ma bↄ, ma lɛ́ ń láo lá n a lɛgbɛ̃̀wa.

¹⁵⁵N dↄnlɛ zã̀ ń vãikɛnaↄ, asa aali n yãdilɛnɛↄ wɛɛlɛo.

¹⁵⁶Ń sósobi vĩ zↄ̃ↄ, Dii, ma lɛ́ ń láo lá n ikoyã'òwa.

¹⁵⁷Ma ĩadamadeↄ ń ma wɛ̀lɛↄ dasi, ãma mi pãalɛ n yã'onɛↄnɛo.

¹⁵⁸Má ye n náaikɛnsaiↄ gĩyãio, kɛ́ aaliↄ n yã́ kũao yã́i.

¹⁵⁹Gwa lá má ye n ↄtondↄkĩii. Dii, ma lɛ́ ń láo n gbɛ̃kɛ yã́i.

¹⁶⁰N yã́pii zĩ́naá sĩanaɛ, n ikoyãↄ maa, aa láaa vĩo.

¹⁶¹Gbãadeↄ ì ĩadaa pã, ãma n yã́ ↄ̃ má a vĩa vĩ.

¹⁶²Mi pↄnakɛ ń n lɛgbɛ̃ao, lán gbɛ̃́ pↄ́ àizɛɛ zↄ̃ↄ kↄ̃mpawa.

¹⁶³Má za mↄafiliu, má ye a yã́io, n ikoyã má yei.

¹⁶⁴Miↄ n táasilɛ gↄↄ do gɛ̃n soplapla kɛ́ n ikoyãↄ maa yã́i.

¹⁶⁵Gbɛ̃́ pↄ́ ye n ikoyãiↄ aafia zↄ̃ↄ, yãe lí tó aa fùo.

¹⁶⁶Ma wɛ́ dↄi ǹ ma suaba, Dii, mi zĩkɛ n yãdilɛaↄwa.

¹⁶⁷Má n yã'onɛↄ kũa ń nↄ̀sɛo, má yei maamaaɛ.

¹⁶⁸Mi n ↄtondↄkĩi gwa, mi n yãma, asa ma kɛkɛá píi kú n ↄzĩɛ.

¹⁶⁹To ma wiilɛa kama, Dii, ma gba ↄ̃nↄ lá ń òwa.

¹⁷⁰To ma wabikɛa n le, ma suaba lá n a lɛgbɛ̃̀wa.

¹⁷¹N táasilɛa aↄ dↄ ma lɛ́uɛ, asa ni n yãdilɛnɛↄ damɛɛ.

¹⁷²Má lɛsi n lɛgbɛ̃a musu, asa n yãdilɛaↄ maa píiɛ.

¹⁷³Ǹyↄ̃ kú ń dↄamalɛ sↄuo, asa ma zɛ ń n ↄtondↄkĩioɛ.

¹⁷⁴Málɛ a nidɛ ǹ ma suaba, Dii, n ikoyã mɛ́ ma pↄnakɛbↄ ũ.

¹⁷⁵To màↄ ku, míↄ n táasilɛ, to n ikoyãↄ aaↄ ma kũa.

¹⁷⁶Ma liaa lán sã pↄ́ sã̀sãwa, mapi n zↄ̀blena, ma wɛɛlɛ, asa n yã́ↄ i sãmaguo.