SAN MARCOS 5

1

2

3

4

5

6

7

8

9

10

11

12

13

14

15

16

¹Nda̱ Dihvo vo nduco ihyan apóstol yahn ye ta̱ma la̱do viche vine me, ya̱hn yahn ya̱n Gadara.

²Cuahn che ndiquenda̱ ye chete ba̱rco me ne, nda̱ a̱ma sa̱hn che chenun vaco chihnga̱ sa̱hn, chica se na̱n ya̱yan.

³Min na̱n ya̱yan che va̱co se. Nde a̱ma ihyan hua co dechiche ye sa̱hn, nde huane nduco cadena.

⁴A̱ma ndeh yune redechiche ihyan ta̱h se ma̱n, ca̱h se ma̱n, ate rihno rendeh se cadena. Nde a̱ma ihyan hua richa ye ca̱hco dihn ye sa̱hn.

⁵Nde ro nde ra̱hn rechica se va̱n chano ma̱n, na̱n ya̱yan ma̱n, rah se ma̱n, renun yah ma̱n se sa̱hn nduco tu ma̱n.

⁶Ate ro min cua̱hn che nda̱ Dihvo vo ne, china̱n se ihyan, ne cuahn se rano se chehntihya se na̱n ye.

⁷Numa dito se cah se: ―Jesús, Da̱ya Dendiohs che a̱ma yudo ye, ¿dehco che reca̱hdenun ne yune yáhn? Nde muhn nde na̱n Dendiohs, ca̱hmá có ndih che hua din ne che chuhríhn.

⁸Tihca̱ ra̱hn se, te Dihvo vo ne, a chihco yudo ye vaco chihnga̱ chahn, ne ra̱hn ye: ―Vaco chihnga̱, ¡cuendiquenda̱h nchuhn! ¡Cuihcoma̱n ne sa̱hn tih!

⁹Tumerune ye sa̱hn: ―¿Deh doche ne? Ndahconan se yahn ye: ―Legión duché, te a̱ma ya̱hn ri nuhn.

¹⁰Tuhme a̱ma rica se che hua dechuh ye vaco chihnga̱ chahn a̱ma la̱do.

¹¹Min nino va̱n chano ne, chenan a̱ma ya̱hn cuche reh te.

¹²A̱ma rica vaco chihnga̱ chahn ihyan: ―Cuedechuh ne nuhn ca̱va che conda̱ nuhn cuche sih.

¹³Ca̱h yune Dihvo vo, ne ndiquenda̱h vaco chihnga̱ chahn sa̱hn min, ne chenda̱ cuche chahn. Tuhme nduh che o mil cuche chahn ne, cochahn te rano te, cheranun te chete vine me, ne chih nducoya̱ca te.

¹⁴Sa̱hn che redin se cuda̱do cuche chahn ne, dihya se chi, ne chano se. Cuahn se, ngu se ndudo yahn ihyan che vate ye viya̱n ma̱n, ra̱ncho ma̱n.

¹⁵Tuhme cuahn ihyan chahn ndihchero ye deh che chi. Cuahn che nda̱ ye na̱n Dihvo vo ne, ndihchero ye sa̱hn che chenun vaco chihnga̱ sa̱hn ro mena̱n me. Min va se, a ntonun se tino yahn se. A va cua̱co dave yahn se, ne dihya ye chi.

¹⁶Tuhme ihyan che ndihchero ye deh che chi ne, neca̱h cuande ye ihyan che nda̱ chahn, deh che chi yahn sa̱hn min ma̱n, deh che chi yahn cuche chahn ma̱n.

¹⁷Tuhme cana̱n ihyan chahn rica ye Dihvo vo che nda̱ca ye ya̱n min, na̱hn ye.

¹⁸Cuahn che chenda̱ Dihvo vo chete ba̱rco me che na̱hn ye ne, rica sa̱hn min ihyan che ca̱h yune ye che conduco se ihyan.

¹⁹Ate hua ca̱h yune ye, ne ra̱hn ye ri ye sa̱hn: ―Conahn cua̱hn ndevaque na̱n che chenan ihyan yehn. Cahme co ihyan yahn vederihno chahte che din Dihve Dendiohs ndoque ma̱n, nduhca̱ che quenan va̱hino ye di ma̱n.

²⁰Tuhme cona̱hn se ya̱n va̱co se nino ya̱n Decápolis. A̱ma rente se yahn vederihno chahte che din Dihvo vo nduco se, ne a̱ma chahn ino nducoya̱ca ihyan.

²¹Cuahn che nta̱ Dihvo vo la̱do cuh yahn vine me ne, ndo da̱ma a̱ma ya̱hn ihyan na̱n ye.

²²Ura min ne, nda̱ a̱ma sa̱hn ndina̱n yahn ya̱co che duche se Jairo. Cuahn che ndihchero se Dihvo vo ne, cuahn se chehntihya se na̱n ye.

²³Chica se favor ihyan, ne ra̱hn se: ―Ta̱hn dihn da̱yá, a̱ma tahn ndi te, adeche coh te. Cuhn vo nduco ne, nahn ta̱h ne ta̱hn ca̱va che ndoyahn te.

²⁴Tuhme cuahn Dihvo vo nduco se, ne a̱ma ya̱hn ihyan nduco ye ihyan, nde tuno chi chiche cuahn ye.

²⁵Min va̱n ihyan chahn ne, nduco a̱ma nda̱hta che cah te. Rendora te yun ro ro. A ri ndichio nduyo che quenan cah min ta̱hn.

²⁶A̱ma dico sa̱hn doctor ta̱hn, ate ndere rechuhrihn te, te hua ndoyahn te. Chihno toh te nducuahn yahn te che va, ate nde tahque ri dito cah yahn te.

²⁷A chihnevan ta̱hn min che rente ihyan yahn vederihno che redin Dihvo vo, ne din te fuerza che nda̱ te va̱n ihyan. Chahn nda̱ te cua̱hn veda̱me Dihvo vo, ne nahn ta̱h te tino yahn ye.

²⁸Tihca̱ din te, te ra̱hco te: “Ndete che co ca̱de nahn tá̱h a mare tino yahn ye ne, ndoyáhn.”

²⁹Ndeta̱hno chehuan cah yahn te, ne checadino te che a ndoyahn te.

³⁰Tuhme checadino Dihvo vo che chinahn a̱ma vederihno, ne ndaconan ye tumerune ye: ―¿Duh nahn ta̱h tino yáhn ne?

³¹Ra̱hn ihyan apóstol yahn ye ri ye ihyan: ―A rendihchero ne te a̱ma ndito ca̱hche ihyan na̱n ne. ¿Dehco che tumerune ne: “Duh nahn ta̱h tino yahn ne?”

³²Ate raconan muhn raconan min Dihvo vo, rendihchero ye cua̱hn chihto na̱n ye duh che nahn ta̱h tino yahn ye.

³³Ta̱hn min ne, nde tuno rendoh te che va̱h te. Chahn nda̱ te, chehtihya te na̱n ye, ne neca̱h cuande te ihyan nducuahn che chahno te chi.

³⁴Ra̱hn ye ri ye ta̱hn: ―Da̱yá, nducote chitehne ne, a ndoyehn. A co nahn ndevaque ndete che nehn. Hua dehve rahque, te a ndoyehn.

³⁵Nde metah cuihno ca̱hma Dihvo vo cuahn che nda̱ a̱ma o ihyan ndeva̱co Jairo, ne ra̱hn ye ri ye sa̱hn: ―A chih ta̱hn da̱ya ne. Ametah deh cuande che denduh ne Ihyan Ricuahn ca̱va che ca̱hn ye.

³⁶Chihnevan Dihvo vo che ra̱hn ihyan chahn, ate hua tumaca̱h ye. Ra̱hn ye ri ye Jairo: ―Hua te co ran. Cuitehne che co conán di.

³⁷Tuhme quendi ye cuahn ye nduco Jairo, ne atena̱n Pedro ma̱n, Jacobo ma̱n, Jua̱n che dihno Jacobo ma̱n, cahnecun ye che cuahn ye nduco ye.

³⁸Cuahn che nda̱ Dihvo vo va̱co Jairo ne, ndihchero ye che a̱ma ya̱hn ihyan chenun ye min, raco ye ma̱n, rah ra̱n ye ma̱n.

³⁹Tuhme chenda̱ ye chete vah, ne ra̱hn ye ri ye ihyan chahn: ―¿Dehco che a̱ma rah ra̱n nchuhn ma̱n, raco ne ma̱n?, te ta̱hn dihn tih ne, dehve ndih te, te quiya̱do te.

⁴⁰Ate chihyon nan ihyan chahn ihyan. Tuhme ndetenda̱h vah Dihvo vo nducoya̱ca ye, ne cuahn ye nduco chida ta̱hn dihn me ma̱n, chaco te ma̱n, ihyan che nduco ye ma̱n, chenda̱ ye nduco vih na̱n che quendite te.

⁴¹Cheta̱h ye ta̱h te, ne ra̱hn ye deva̱co yahn ye: ―Talita cumi ―che nahn ca̱hma: Ta̱hn dihn, cuenecuen.

⁴²Ta̱hn dihn me ne, a ri te ndichio nduyo. Ndeta̱hno necuan te, cana̱n rica te, ne a̱ma cuahn ino ihyan chahn.

⁴³A̱ma chihco yudo Dihvo vo che hua duhva ca̱hma che ndedetuhche ye ta̱hn, ne ra̱hn ye ri ye indihte yahn te che ca̱h ye, cheh te.