1Dauda lɛ̀. Dii, ḿbe ma a swɛ̃̀ kpàmma,
2Ma Luda, má n náanɛkɛna, ǹton tó wí ma kũro, ǹton tó ma ibɛɛnↄ ma nɛro.
3Wí é gbɛ̃ kɛ̀ aↄ̃ wɛ́ɛ dↄnziinↄ kũ zikiro, sé gbɛ̃ kɛ̀ aↄ̃ bↄ̀ n kpɛɛ yãkↄdↄana sainↄ.
4Dii, ǹ n zɛ́ ↄdↄamɛ, ǹ n yã dadamɛ.
5Ǹ ma da n yãpura zɛ́a, ǹ à yã dadamɛ, zaakɛ Luda ma mìsirin n ũ, ma wɛ́ɛ ègↄ̃ dↄnzimɛ gurↄ píngi.
6N wɛ̃nda kↄ̃n n yenzio gↄ̃ dↄngu, zaakɛ beenↄↄ kúnyo zaa zi, Dii.
7Ǹton taari kɛ̀ má kɛ̀nↄ yã daro ke durun kɛ̀ má kɛ̀ ma gↄ̃kparɛkɛgurↄↄnↄ. Ǹ tó ma yã gↄ̃ dↄngu yenzi guu, kɛ̀ ń maa yãnzi, Dii.
8Dii maa, è yã kɛ a zɛ́a, beee yãnzin è a yã dada durunkɛrinↄnɛzi.
9È zĩndabusarinↄ da a zɛ́a, è yã maaa dadańnɛ.
10Dii ègↄ̃ yenzi kↄ̃n náanɛo vĩ kↄ̃n gbɛ̃ kɛ̀ aↄ̃ a bà kuunańyo yã kũnanↄ.
11Baa kɛ̀ ma durun bíta Dii, ǹ kɛ̃mɛ n tↄ́bↄna yãnzi.
12Dé bé à Dii vĩa vĩi? Dii è adee da zɛ́ kɛ̀ dɛ à sɛ́a.
13Adee égↄ̃ kú nnamana guu, à boriinↄ bé wégↄ̃ ń bùsu vĩ.
14Dii ègↄ̃ nna kↄ̃n a vĩakɛrinↄ, è tó aↄ̃gↄ̃ a bà kuunańyo yã dↄ̃.
15Ma wɛ́ɛ ègↄ̃ pɛ́ Diia, zaakɛ àmbe è ma gbá bↄ bàn.
16Ǹ aɛ dↄma, nɛ́ ma wɛ̃nda gwa, zaakɛ má kú mado wɛ́ɛtãmma guu.
17Ma yã'ↄ̃ammanↄ kàara ma nↄ̀sɛ guu, ǹ ma bↄ ma nawɛ̃a pìn.
18Ǹ ma wɛ́ɛtãmma kↄ̃n ma pↄsiaao gwa, nɛ́ ma durunnↄ kɛ̃ma píngi.
19Ǹ gwa lán ma ibɛɛnↄ dàgula nà, aↄ̃ zàmagu pãsĩpãsĩ.
20Ǹ ma wɛ̃̀ndi dãkpa, nɛ́ ma mì sí, ǹton tó wí ma kũro, zaakɛ ma nanzi.
21Ǹ tó yãpura kↄ̃n kuuna maaao gↄ̃ ma dãkpaa, zaakɛ ma wɛ́ɛ ègↄ̃ dↄnzi.
22Luda, ǹ Isarailinↄ bↄ ń nawɛ̃anↄn píngi.
