1Dauda lɛ̀. Musu è Luda gakui bↄ gupuraaa, bàtumapↄnↄ è à zĩi ↄdↄańnɛ.
2Lɛn èegↄ̃ yã oo lɛ lán guu e dↄↄ nà, è dↄ̃na kpáḿma gwãavĩ kↄ̃n gwãavĩo.
3È yã oro, à yã'ona borii kuuro, wè à kĩi maro.
4À kòto è da andunala píngi, à yã'ona è gá ai tↄↄtɛ lɛ́zɛkiia. Luda kpɛ́ bò ↄfãntɛ̃nɛ gwe,
5è bↄ kpɛ́n à fɛɛ lán nↄsɛri bà, è fɛɛ táo kↄ̃n pↄnnaao lán gↄ̃sagbãaa bà.
6È fɛɛ ludambɛlɛa kɛ̀, è bikũ à gá ai à lɛ́a kãa, pↄ́ke ègↄ̃ utɛna à puusunɛro.
7Dii doka papana, è ń kuuna kɛkɛ à kɛńnɛ dↄ. Dii yã náanɛ vĩ, è lɛ́ da ↄ̃ndↄ̃saideenↄa.
8Dii ↄdↄkii bé à súusu, è ń pↄↄ kɛ nna. Dii yãdiɛnanↄↄ gbãsĩ vĩro, è ń uu wereńnɛ.
9Mìsiɛna Diinɛ zɛ́ pì wɛ́ɛbↄna, weégↄ̃ tɛ́zi gurↄ píngi, Dii yãkpaɛkɛna yãpuraa vĩ, ègↄ̃ maa wásawasa.
10À maaa dɛ vurala, baa vura maaa, à nnaa dɛ zↄ́'ila, baa zↄ́ búsu.
11Beee musu nɛɛ̀ lɛ́ da mamↄma n zↄ̀bleria, gbɛ̃ kɛ̀ n yã kũna àre ègↄ̃ bíta.
12Dé bé eé fↄ̃ à yã kɛ̀ à zã̀anↄ dↄ̃ↄ? Ǹ sùu kɛmao kↄ̃n ma taari kɛ̀ utɛnamɛɛnↄ.
13Ǹton tó mamↄma n zↄ̀bleri taari kɛnnɛ gĩanziro, ǹton tó durunnↄ kí blemaro, mɛ́gↄ̃ kuu wásawasa taari bíta sai.
14Ǹ tó yã kɛ̀ èe bↄↄ ma lɛ́n kɛnnɛ kↄ̃n laasuu kɛ̀ kú ma swɛ̃̀ guuo, Dii, ma gbɛ̀si, ma mìsiri.
