1À Dii sáabu kɛ, zaakɛ à maa, à gbɛ̃kɛɛ yãana vĩro.
2Isarailinↄ o: À gbɛ̃kɛɛ yãana vĩro.
3Aruna boriinↄ o: À gbɛ̃kɛɛ yãana vĩro.
4À vĩakɛrinↄ o: À gbɛ̃kɛɛ yãana vĩro.
5Ma Dii sìsi ma nawɛ̃a guu, ben à wèmala à ma gba mɛ̀porokii.
6Dii kúmao, vĩa é ma kũro. Bↄ́n gbɛ̃ntee é fↄ̃ à kɛmɛɛ?
7Dii kúmao ma dↄnlɛri ũ, mɛ́ ma ibɛɛnↄ tí dↄ.
8À maa wà na Diizi dɛ gbɛ̃ntee náanɛkɛnala.
9À maa wà na Diizi dɛ gbãadeenↄ náanɛkɛnala.
10Bori píngi lìgamazi, ben ma ń kaatɛ kↄ̃n Dii tↄ́o.
11Aↄ̃ lìgamazi kpa píngi, ben ma ń kaatɛ kↄ̃n Dii tↄ́o.
12Aↄ̃ fĩ̀ma lán zↄ́nↄ bà, ben aↄ̃ gàga lán kãɛ tɛ́ bà, ma ń kaatɛ kↄ̃n Dii tↄ́o.
13Aↄ̃ ma yĩpa kpɛɛ, má yezi mà lɛ́ɛ, ben Dii dↄ̀malɛ.
14Dii bé ma gbãaa ũ, à táakin mɛɛ̀ lɛ́, àmbe à gↄ̃̀ ma mìsiri ũ.
15À ma, pↄnna wiii dↄ gbɛ̃ maaanↄ bùran, Dii ↄplaa zĩ bíta kɛ̀.
16Dii ↄplaa kú musu, Dii ↄplaa zĩ bíta kɛ̀.
17Mɛ́ garo, mɛ́gↄ̃ kuu, mɛ́gↄ̃ Dii yãkɛnanↄ tↄ̃kɛ̃ɛ.
18Dii ma toto maamaa, mↄde èe tó gaa ma sɛro.
19À zɛ́ maaa gbànↄ wɛ̃mɛ, lɛ mà gɛ̃ mà Dii sáabu kpá.
20Dii ua zɛ́n yɛ̀, gbɛ̃ maaanↄ bé wè gɛ̃n.
21Ma n sáabu kɛ̀ Dii, zaakɛ n wemala, n gↄ̃ ma mìsiri ũ.
22Gbɛ̀ kɛ̀ kpɛ́borinↄ pã kpàzi bé à gↄ̃̀ kpɛ́ gooda gbɛ̀ mìdee ũ.
23Dii bé à beee kɛ̀, ben à kɛ̀we yãbↄnsaɛ ũ.
24Gurↄↄ kɛ̀ Dii dìɛn yɛ̀, wà pↄnnaa kɛn wà nↄ̀sɛ kɛ nna.
25N yã nna Dii! Ǹ wa mì sí! Ǹ sùu kɛ Dii! Ǹ wa dakↄ̃rɛ mìnnaao!
26Aubarikadeen gbɛ̃ kɛ̀ èe mↄↄ kↄ̃n Dii tↄ́o ũ, zaa Dii ua wée gbãakɛ kpaanzi.
27Diin Luda ũ, à guu pùwe. À zà lá kpákpa àgↄ̃ tɛ́o zĩbaakɛrinↄzi ai sa'oki kobanↄ kiia.
28Ma Ludan n ũ, mɛ́ n sáabu kɛ, ma Luda, mɛ́ n tↄ́ sɛ́ lezĩ.
29À Dii sáabu kɛ, zaakɛ à maa, à gbɛ̃kɛɛ yãana vĩro.
