Text copied!
CopyCompare
Luda yã takada kↄ̃n Bokobaru yão - SAAMUNƆ

SAAMUNƆ 57

Help us?
Click on verse(s) to share them!
1Lɛ̀ kɛ̀ Dauda dà gurↄↄ kɛ̀ à bàa lɛ̀ Solunɛ à ùtɛ gbɛ̀wɛɛn. Ǹ ma wɛ̃nda gwa Luda, ǹ ma wɛ̃nda gwa, zaakɛ ḿbe ma nanzi. Ǹ ma sↄtↄ n ↄru ai ma bↄ gaa lɛ́zĩ.
2Mɛ́ɛ wii pɛɛ Luda Musudezi, Luda kɛ̀ è yã kɛ̀ à ò papamɛɛ pì.
3Eé tó dↄnlɛ bↄ zaa musu à ma mì sí, eé wí da gbɛ̃ kɛ̀ aↄ̃ↄe pɛɛɛmaziinↄa, eé a gbɛ̃kɛ kↄ̃n a náanɛyão kɛmɛ.
4Má kú músunↄ tɛ́, ma gↄ̃ daɛna nↄ̀bↄ pãsĩnↄ dagura. Gbɛ̃ pìnↄ nɛ́nɛ nna lán fɛ̃ɛdaa bà, aↄ̃ swaa nɛ́ sárimɛ kↄ̃n kào.
5Luda, ǹ n zĩnda tↄ́ sɛ́ lezĩ ai musumusu, ǹ tó n gakui da andunala píngi.
6Aↄ̃ bà kpàkpamɛ ma zɛ́n, ben nawɛ̃a tↄ̃̀ma, aↄ̃ wɛ̀ɛ yↄ̃̀ ma aɛ, ben aↄ̃ zù à guu.
7Ma làakari kpaɛna Luda, ma làakari kpaɛna, mɛ́ lɛ̀ sí mà n táaki lɛ́.
8Ǹ vu, ma swɛ̃̀! Ma mↄrↄ kↄ̃n ma kuntigio kú máa? Mɛ́ gudↄↄ pá mìo.
9Dii, mɛ́ n sáabu kpá boriinↄ tɛ́, mɛ́ n táaki lɛ́ gbɛ̃nↄnɛ.
10Zaakɛ n gbɛ̃kɛ bíta kà n kiia, n náanɛ ludambɛ luguu lè.
11Luda, wà n tↄ́ sɛ́ lezĩ ai musumusu, ǹ tó n gakui da andunala píngi.