1Aleluya! Lɛ̀sina wa Ludanɛ maa, à nna bensↄ̃ à kↄ̃ sìo wà à táaki lɛ́.
2Dii e Yerusalɛmu fɛɛɛ dↄ, èe Isaraili zĩ̀zↄnↄ kaakↄ̃a, èe ɛara à suńyo.
3È gbɛ̃ kɛ̀ aↄ̃ nↄ̀sɛ yàkanↄ làakari kpáɛńnɛ, è ń bↄ̀ pípińnɛ.
4À sↄsↄnɛnↄ lɛ́ dↄ̃, è ń baade sísi a tↄ́a.
5Wa Dii bíta, à iko vĩ maamaa, à ↄ̃ndↄ̃ↄ lɛ́ vĩro.
6Dii è zĩndabusarinↄ gba gbãaa, mↄde è ↄ tↄ̃ zaakɛrinↄa ai tↄↄtɛa.
7À lɛ̀ sí Diinɛ kↄ̃n à sáabukɛnao, à wa Luda táaki lɛ́ kↄ̃n mↄrↄo.
8È tó lou sisi, è tↄↄtɛ gba lou, è tó sɛ̃̀ bↄɛ sĩ̀sĩnↄa.
9È pↄ́blee kpá nↄ̀bↄnↄa kↄ̃n gbáa kãnkãna nɛ́nↄ, tó aↄ̃ↄe wii pɛɛ.
10Èe kɛ sↄ̃ gbãakɛɛ bé è kánɛro, èe kɛ gↄ̃sagbãakɛɛ bé è kɛnɛro.
11Gbɛ̃ kɛ̀ aↄ̃ↄ à vĩa vĩinↄ bé è kánɛ, gbɛ̃ kɛ̀ aↄ̃ wɛ́ɛ dↄ à gbɛ̃kɛɛzinↄ.
12Yerusalɛmudeenↄ, à Dii tↄ́ bↄ, Zayↄndeenↄ, à a Luda táaki lɛ́.
13Zaakɛ è aubarika daagu, è a wɛ́tɛ bĩilɛnↄ gbãaa kaaraare.
14È a gba aafia ai a bùsulɛ lɛ́n, è pↄ́bori maaa kpáawa à mↄ́awa.
15È yã o à kpãsã tↄↄtɛnɛ, à yã è ká gↄ̃ↄgↄ̃ↄ.
16È tó lougbɛ kwɛ́ púu lán buu bà, è tó kpíi kpá lán túbu bà,
17è lougbɛ fã lán gbɛ̀kↄsↄ bà. Dé bé eé fↄ̃ à zɛ à ĩa yĩizi?
18È yã o à kpãsã, lougbɛ è yↄ́, è ĩa gbarɛ, à í è bàa lɛ́.
19È tó Yakubu boriinↄ gↄ̃ a yã dↄ̃, è doka kɛ̀ a dìɛnↄ da Isarailinↄnɛ.
20Èe beee kɛ bori pãnde kenɛro, aↄ̃ↄ à yãdiɛnanↄ dↄ̃ro. Aleluya!
