Bomai Po 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Mosesgo po geninama weyu, te po wali, “Dage da, te Genuai Bidi dago God agai wai puluba dao. Tialima, dage te isai bidide gela weyu da, te usu dao. Tiali goli, dagego duga tigi wali me togoyu, o duga tobolu nisi gebo badu me poayu me igio. Teda te wani yaibao, te Godigo po wali pisąbo bagego ebo gilama yaibao.

²Dage Genuai Bidi dago Godigo tedali gasagi yai we bidi dao. Magi baso meni, agai dage tigidali tǫde we bidi tomode selama, tama dage aga we bidi bidimainogo dage sa muai dao. Dage da, agai dila pai wiegi yai nai tiwai elalubao,” wali.

³Tama Mosesgo po ma wadoliyu, te po wali, “Dagego te hasa dabe te dwai nai dao olama habu selali, te hasa dabe tulamo dao.

⁴Dagego kau kibu, me sipsip kibu, me meme kibu mi,

⁵me bulu hasa dia, me bulu kibu sipsip, me bulu kibu meme, te dagego tuiagameo, me bulu hasa dabe te bulu dude bidibo, te hasa dabe tuiagameo.

⁶Augwaligo nogo sągą tomode si peda pelama, tama augwali kau kibugo yali gilama augwali nosai tubo dao.

⁷Tiali goli, te hasa dabe augwaligo nosai te bulmakaugo tiwai tusiąma, tama nogo sągą dani peda pisąma ebaso da, teda dagego tubo habu mu dao. Dagego te kamel, me rabit, me gesia te masigi bulude bidibo, te hasa tubo habu mu dao. Augwali te kau kibu yaligia te nosai dabe tuyu ebo dao, tiali goli agai nogo sągą dani te tomode si peda pabeo. Tama tibaso, dagego koneao, te tama tiwai hasa dabe te Godigo gedude meda yai dao homu yao.

⁸Dagego kibu tugio. Augwaligo kau kibugo yaligiama sągą ogo dani elalubadi goli, augwaligo nosai te bulmakaugo tiwai tubo menio. Tama tibaso, dagego koneiąo, te tama tiwai nai dabe te Godigo gedude meda yai dao. Dagego te hasa dabe tubo habu dao, tama augwali isai digi dagego nogo tubo me habu dao,” Mosesgo te po wai.

⁹“Dagego te sųgų dabe te bogo elaluyu, tigide abolo elaluyu ebo, te sųgų dabe tuyu yagameo.

¹⁰Tiali goli, te węde bidibo nai dabe te bogo meni eyu, abolo meni eyu yai, te nai dabe da me tulamuo. Dagego te homu yao, te sųgų nai dabe te Godigo gedude meda yai nai dao, te homu yao,” wali.

¹¹“Dagego Godigo gedude wiegi yai ba naga tuao.

¹²Tiali goli, dagego te tigidali hani genuai me dwasianu kemodage, me hulide bilibo uni, me kugidi, me te toli, me te nambisde ba kanai, me te bobobage dogoni yai ba, me te ba augwaligo hupou nogi wabo, me te pato, me augwaligo komoran wabo, te pato, me hulide bilibo bogwą, dagego tugio,” wali.

¹⁹“Te Godigo gedude bogo yai te pa dabe te meda yai dao. Tama tibaso, dagego tulamo dao.

²⁰Tiali goli, dagego Godigo gedude wiegi yai te pa o mano dabe tuiagameo.”

²¹“Dagego te hasa dabe olo dali isai tulamo dao. Te gasa bulu bidi dagego bulude bidiba, te bidi dabego te hasa tumainogo tagalao, ma augwaligo dageba abelemainogo yao. Tiali goli, dage da, te God Genuai Bidigo we bidi dao. Dage aga tedali gasagi yai hani we bidi mu dao,” wali. “Dagego te meme kibu so me deligo ame pę te senede tabilama, tama te meme so kibugo digi gǫų tede ma ulamo dao,” wali.

²²Mosesgo te po wali, “Dagego tigidali nai dabe dagego tigidali sogo kibu bede duga gide siyu eba, dagego nogo si pesage holama, tama dagego pesage deli muao.

²³Nosali dagego te nai dabe te Genuai Bidigo lotu wabo pesage deli sa muaibao, te pesageba sela pao. Tama te pesagede Genuai Bidigo gedude dagego te nai dabe te wit, me wain dabe, me ni oliv wel me dagego te nai pesage deli te sesali te nai tula siliąo. Tama me ma, dagego te kau kibu me sipsip kibu dabego gomunai wai dabe tede elama tuiąo, te lotu wabo pesagede. Dagego te tama tiyu da, teda dagego tigidali sogo God dologode naga bidibo kolesaga elaluaibao, te God dago Genuai Bidi.

²⁴Ma, dage digibulu mu bidiyu da, teda dagego te wiegi yai nai dagego me selama, tama dagego te Godigo lotu wabo pesage sa muani teba seseyu usu sąbaso,

²⁵teda dagego te olo bidi dabego te nai dabe abelemainogo sula tagalao. Tama nosali te mone te sa muani lotu wabo pesage deliba selasa pao.

²⁶Tama monego dagego te godolo ebo nai sese tama abelagameo. Te kau kibu me te sipsip kibu dabe tama abeliąo, me te wain, me bia tiwai nai abeliąo. Tama te lotu wabo pesagede te Genuai Bidigo gedude dagego me, duga wai puluba, dagego te nai dabe tulama, tama wiegi yai homu pemene mu iyąo.”

²⁷“Tiali goli, dagego te Livai dabe dagego hanude bidibo bage me gegeda pelamuo. Augwaligo dagego hanude augwaligo tǫ menio. Augwaligo tǫ me, be me, te meba nai dabe te augwa mu menio.

²⁸Te tigidali kibu be sela ebo sogo, dagego te bugulali muani tubo nai dabe sese sela pelama, tama te bakstuaba muagasao, te duga hanu dabede tama tiao.

²⁹Te nai dabe te Livai dabego nai dao. Magi baso meni, te bage augwaligo augwa tǫ me, be me menio. Tama me ma, te digibulu asama bidagasai bidi, me te tiana wai, me wilawe we dabe me, augwali dagego hanude te bidibao. Te we bidi augwali augwa homugo aselama, te muani nai sagasiyu emainao. Dagego te tama tiyu da, teda Genuai Bidi dago God aga dagego tigidali sę dabe wiegi yai mu ilaibao,” Mosesgo te po wai.