Deuteronomio 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

¹Moisés Israel-dulemarga sogdebalid: “Bemar, be-Bab-Dummad-Jehová-mimmigan gumalad. Mer dule-burgwisad-ular, be-san-uka daas-daas imako, mer nono-swiri be ibalo.

²Ar bemar be-Bab-Dummad-Jehováʼba uklegarmaladid. Ar Bab-Jehová unnila egadgarbi-guega, we-napneggi dulamar-bukidar-bukwad-abargi bemar-sunonikid.”

³Moisés Israel-dulemarga sogdebalid: “Melle ibmar-ised gunmalo.

⁴We-ibmar-durgandi sunna be gunmaloed: Moli-bebe-nikad, sibad-wawaad, sibad,

⁵goe-ciervoʼye-nugad, goe-gacelaʼye-nugad, goe-corzoʼye-nugad, sibad-ome-sapurbalid, sibad-íbiceʼye-nugad, goe-antílopeʼye-nugad, degine, sibad-wawaad-sapurbalid.

⁶”Degine, sunna be ibdurgan e-goonasi-darbo-marar-nikamalad, geb, gagan-masar, gannar-mabaliga-sabanyagi-mas-saboged, be gunmaloed.

⁷”We-ibdurgandi be gunnosulid: Moli-yargan-mureged, nubi, ugdun. Ar wemar amba gagan-masar, gannar-mabaliga-sabanyagi-mas-saboged-inigwele, e-gonasidi negabar mararsulid. ”We-ibdurgandi be gunnosulid, ise-gullegedga gumaloed:

⁸Sina, amba be gunnosurbalid, ar goonasi-darbo-marar-nika-inigwele, mas-masar, gannar-mabaliga sabanyagi mas sabosulid. ”Degisoggu, we-ibdurgan ise gullegoed. Sin-e-san bemar gunnosurmalad, sin-burgwaledbela gwen be ebuosurmalad.

⁹Bela ibdurgan-diakinmalad e-see-nikamalad, degi, uayob-uka-nikamalad, nabir be gunmaloed.

¹⁰Ar ibmar-durgan-diakinmalad e-see-nikasulile, degi, uayob-e-uka-nikasulile, be gunnosurmalad, ise gullegedga gumaloed.

¹¹Nuu-nuegan bela sunna be gunmaloed.

¹²Degi-inigwele, ar wemardi be gunnosurmalad: Sulubagi, sulubagi-garmar-bisge-bisge-imaked, uabu,

¹³mula, degi, bela sulubagi-senigan akar-akar-daklemalad, bela e-sordamar be gunnosulid.

¹⁴Degine, abgokor, degi, abgokormar-akar-akar-daklemalad be gunnosurbalid.

¹⁵Nuu-dummad-dukar-suid avestruzʼye-nugad, irmon-senigan, bela dilli-dilli akar-akar-daklemalad, noo-akar-akar-daklemalad be gunnosulid.

¹⁶Irmon, dabgala-ibisʼye-nugad, badugiid-calamónʼye-nugad,

¹⁷gorgi, mula-buitreʼye-nugad, diidod,

¹⁸dabgala-dummad, garzaʼye-nugad, degi, garza-akar-akar-daklemalad, salligiid-abubillaʼye-nugad, degine, uksir, wemar be gunnosurbalid.

¹⁹Gukur-akar-akar-nabir-gukumalad, ise gullegoed. We-ibmarmar-isemalad, melle be gunmalo.

²⁰Ar nuumar-nuegandi nabir be gunmaloed.

²¹”Ibdurgan be burgwar-mai amisale, melle be gunmalo. We-ibmar, dule-ainebarmalad-be-abargi-mamaidga be ukoed. Amardi, sunna we-ibmar-burgwaled gunmaloed. Sulile, dule-ainebarmalad-bese-atakdanimaladga manigi ega be ukoed. Ar bemardi, be-Bab-Dummad-Jehováʼba uklegarmaladid, unnila egadga nug-imaklesmaladid. ”Sibad-e-mimmi, melle e-nan-nunisgi be duo.”

²²Moisés Israel-dulemarga sogdebalid: “Birga-ilibali bela ibmar-gwagmar be-nainugi be wesmaladi, ambegi gwensak (10%) Bab-Dummadga be ukergebmalad.

²³Be-Bab-Dummad-Jehová-asabin, e-neg-susadgi, e-nug-nasiko-sogsadgi ibmar-ambegi-gwensak-ukleged (10%) be gunnoed. Amar wemalad: Be-ibmar-gwag-ukleged, be-vino-binid-ukleged, be-olivo-gwallu-binid-ukleged. Degine, be-moli-gebegwalulesmalad, be-sibad-wawaad-gebe-gwalulesmalad, be-sibad-gebe-gwalulesmalad, wemar, Bab-Jehová-neg-susadgi be gunnoed, adi, bemar bane-bane be-Bab-Dummad-Jehová-dobee nanamalagar.

²⁴”Ar be-Bab-Dummad-Jehová megega-neg-susad begi dikasuli siile, ase geg be ibmar-sede-itogele, degidbali, geg be ibmar ambegi-gwensak-ukleged (10%) sede-itogele,

²⁵be we-ibmar maniga-obinyoed. Geb be be-Bab-Dummad-Jehová-neg-susadse we-mani be sedoed.

²⁶Agi, geb a-manigi be ibmar-bakbiedba we-ibmar be bakoed: Moli-bebe-nikad, sibad-wawaad, vino, degine, gobed-bamalad-sole-solemalad. ”Agi be-Bab-Dummad-Jehová-asabin, be, degine, be-gwenadganse-bakale, mas gunnoed, degi, weligwar itomaloed.

²⁷”Levita-dulemar-bemar-neggweburgi-maid, nue be akwemalo, melle be obanmalo, ar ade, bemarga nainumar-uklesadyob, wemargardi uklessulid.

²⁸”Birgapaagwad-iliba, bela be-ibmar-wesadi, ambegi-gwensak-ukleged (10%) be suoed, be-neggweburmargi be sabogoed.

²⁹A-neggweburmarse we-dulemar nonimaloed: Levita-dule-bemarba-nainu-nikudsulid, dule-be-yarginsurmalad, dule-sergan-sated, omegan-e-sui-burgwismalad be-neggweburgi-gudidimalad. ”Deyob, a-dulemar mas gunmaloed, nue-immee gudii gumaloed, adi, be-Bab-Dummad-Jehová bela-be-ibmar-nued-imakmaladgi ise-nued bemargi binsamalagar.”