1Niꞌcã nʉmʉ Noemí Rure aꞌtiro nico niwõ: —Niꞌcʉ̃ mʉꞌʉ marãpʉ niacjʉre aꞌmabosagoti. Cʉ̃ mʉꞌʉrẽ añurõ eꞌcati niseticã weegʉsami.
2Mʉꞌʉ masĩsaꞌa. Booz marĩ acaweregʉ nimi. Mʉꞌʉ cʉ̃rẽ daꞌracoꞌterã numia meꞌrã daꞌraco niapʉ. Niꞌcãcã ñami cãpũpʉ cʉ̃ trigo, cebada perire suꞌtiweegʉ waꞌagʉsami.
3Mʉꞌʉ aꞌtiro weeya. Uꞌaya. Mʉꞌʉ upʉre ʉꞌmʉtise meꞌrã waꞌre, mʉꞌʉ yaro suꞌtiro añurõ niyʉꞌrʉnʉꞌcãrõrẽ sãñaña. Tuꞌajanʉꞌcõ, cʉ̃ suꞌtiweeropʉ waꞌaya. Mejõ cʉ̃ baꞌa, sĩꞌrĩ tuꞌajati dʉporo mʉꞌʉrẽ ĩꞌacã weeticãꞌña.
4Cʉ̃ noꞌo cãrĩatjore añurõ ĩꞌaweꞌoya. Beꞌro cʉ̃ tiro waꞌa, cʉ̃ dʉꞌpocãrĩ omaꞌcarore pãaña. Topʉ cũñaña. Beꞌro cʉ̃ basu mʉꞌʉ weeatjere weregʉsami, nico niwõ.
5Rut core yʉꞌtico niwõ: —Nipeꞌtise mʉꞌʉ níꞌcaronojõta weegoti, nico niwõ.
6Tojo weego Rut na suꞌtiweeropʉ waꞌa, nipeꞌtise co mañecõ dutiꞌcaronojõta weeco niwõ.
7Booz baꞌa, sĩꞌrĩ, añurõ eꞌcatigʉ nicʉ niwĩ. Tojo wééca beꞌro na suꞌtiwééca mesã tiro cãrĩgʉ̃ ejaqueꞌacʉ niwĩ. Beꞌro Rut diꞌtamarĩrõacã waꞌa, cʉ̃ dʉꞌpocãrĩ omáca caserore pãa, topʉ ejaqueꞌa, cũñaco niwõ.
8Ñami deco ʉcʉamajã wãꞌcã, majãmiqueꞌamigʉ̃, niꞌcõ numio cʉ̃ dʉꞌpocãrĩ tiro cũñacã ĩꞌamarĩacʉ niwĩ.
9Booz core “¿Noa niti mʉꞌʉ?” ni sẽrĩtiñaꞌcʉ niwĩ. —Yʉꞌʉ Rut, mejõ nigṍ niꞌi. Mʉꞌʉ yʉꞌʉ acaweregʉ diácjʉ̃, yʉꞌʉre coꞌtegʉnojõ niꞌi. Tojo weego mʉꞌʉ yʉꞌʉre nʉmoticã ʉasaꞌa, nico niwõ.
10Booz core yʉꞌticʉ niwĩ: —Õꞌacʉ̃ mʉꞌʉrẽ añurõ weeato. Mʉꞌʉ marãpʉ mijĩ wẽ́rĩ́ca beꞌrore mʉꞌʉ mañecõrẽ añurõ weesetiapʉ. Mʉꞌʉ niꞌcãrõacã yʉꞌʉre sẽrĩse peꞌe mʉꞌʉ mañecõrẽ weese nemorõ añuꞌu. Mʉꞌʉ apĩ yʉꞌʉ nemorõ maꞌmʉrẽ aꞌmaboapã. Noꞌo peje cʉogʉnojõrẽ o pajasecʉogʉnojõrẽ aꞌmaboapã. Tojo weetiapã.
11Ne uiticãꞌña. Nipeꞌtirã yá macãcjãrã mʉꞌʉ numio queoro weesetisere masĩpeꞌtitojama. Tojo weegʉ yʉꞌʉ nipeꞌtise mʉꞌʉ sẽrĩsere weegʉti.
12Diacjʉ̃ta yʉꞌʉ mʉꞌʉ acaweregʉ waro, mʉꞌʉrẽ coꞌtegʉnojõ niꞌi, nígʉ̃ peꞌe. Tojo nimicã, apĩ yʉꞌʉ nemorõ mʉꞌʉ acaweregʉ waro nimi.
13Aꞌti ñamirẽ aꞌtopʉta tojáníña. Ñamiacã cʉ̃ mʉꞌʉ acaweregʉ nisetisere queoro weecã, añurõsaꞌa. Cʉ̃ mʉꞌʉrẽ nʉmotigʉsami. Cʉ̃ weeticãma, Õꞌacʉ̃ tʉꞌoropʉ “Yʉꞌʉ mʉꞌʉrẽ nʉmotigʉti”, nigʉ̃ti. Niꞌcãrõacãrẽ aꞌtopʉta cãrĩboꞌretõꞌoña.
14Tojo weego ti ñamirẽ Rut Booz dʉꞌpocãrĩ tiropʉ cãrĩco niwõ. Booz aꞌtiro ucũtojacʉ niwĩ: “Numio aꞌto cebada suꞌtiweeropʉ aꞌticã, ne niꞌcʉ̃ masĩticãꞌto”. Tojo weego ape nʉmʉ peꞌere ñamiñaꞌcũrõ boꞌrequeꞌati dʉporo wãꞌcãco niwõ.
15Booz core aꞌtiro nicʉ niwĩ: —Mʉꞌʉ buꞌicjãrõ suꞌtiro sãñarõrẽ tuwee, añurõ sẽeo cʉoya. Co ti caserore tojo cʉonuꞌcũrĩ cura Booz peꞌe veinte kilos cebadare ṍrẽ́sãacʉ niwĩ. Beꞌro core wʉadutigʉ miipeocʉ niwĩ. Co te meꞌrã macãpʉ piꞌaco niwõ.
16Rut co mañecõ tiropʉ etacã, core aꞌtiro sẽrĩtiñaꞌco niwõ: —¿Yʉꞌʉ macʉ̃ nʉmo níꞌco, mʉꞌʉrẽ añurõ waꞌamiatito? Rut core nipeꞌtise Booz añurõ weetamuꞌquere wereco niwõ.
17Apeye quẽꞌrãrẽ werenemoco niwõ: —Aꞌte peje cebada yʉꞌʉre oꞌoami. Yʉꞌʉre aꞌtiro niami: “Mʉꞌʉ mañecõ tiropʉre apeyenojõ moogõ dajaticãꞌña”, niami, ni wereco niwõ.
18Tere tʉꞌogo, Noemí core nico niwõ: —Coꞌteniña yujupʉ. Deꞌro waꞌaro waꞌarosaꞌa. Cʉ̃ niꞌcãcãrẽ tere apotuꞌajanʉꞌcõgʉ̃pʉ, soogʉsami, nico niwõ.
