Rut 3

1

2

3

4

¹Ibagwengi, Noemí, Rutʼga sogded: —Bunagwa, an bega sui-amiergeboed, adi, neguyagi be nued gudii-guegar.

²We-Boozʼye-nugadga omegan-arbamalad-abargi be arbanai-gusadi, a-dule, anmar-gwenadid. Emide Booz, we-mutikidba cebada-omukuleged-negse naoed, cebada-egwanaegar.

³Degisoggu, an bega soged: Be nue obo, be-san-wawadik be sao, be-mor-bur-nued be yoo. Geb cebada-omukuleged-neg-siidse be nao. Degi-inigwele, mer Booz-be-daked be imako. Yoo gobed-obeloged-iduar, degi, masgunned-obeloged-iduar, be-dakega be imakosulid.

⁴Booz-gabsokalir, nue be dako, bia megoe. Degine, geb be asik nao, e-nag-atualed be egao, e-dukuba be megoed. Degine, geb e-sunnad bega sogoed, ibu be imakergeboe.

⁵Rut, Noemí-abin sogded: —Be-anga-ibmar-sogsad, bela an imakoed.

⁶Geb agi Rut, sapurba cebada-omukuleged-neg-siidse nadegusad. E-saka-ega-bela-ibmar-sogsad imaksad.

⁷Booz gobsagua, degi, mas-guchabargua, yeer-itonaded. Degine, geb cebada-bukwad-daksik gabnaded. A-sorba, Rut Booz-maidsik binnasdikii danigusad. Degi, Rut Booz-e-nag-atualed egasad, geb e-nag-dukuba megisad.

⁸Neg-gabigwengusgua, Booz ataas-naded. Aibitegua, ome e-nag-dukusik-mai dakalid.

⁹Geb Booz ese egisded: —¿Be doa? Rut abin-sogded: —Ani, an Rut, be-maiga-gudiidi. Be an-gwenad-walikagwad-gusoggu, be an-bendakergebed. A-ulale, be an-nikued an be-abedo.

¹⁰Booz, Rutʼga sogded: —Bunagwa, Bab-Jehová be-bendakena gadin. Be we-ibmar-imaksadi, be ibmar-iduar-imaksadba bur bule nued be imaksad. Ar be-suiga guega dule-sapingwagwad be amiapi-wilubbinad, dule-mani-ibeddibe, igi mani-suliddibe. Emide, be deyob imaksasulid.

¹¹Degisoggu, bunagwa, mer be dobguo. Be-sogedba an imakoed. Ar dulemar-an-neggweburginmalad bela be-wismalad, be ome-innikigwadid.

¹²Ar an be-gwenad-walikagwad-guendo nabir-be-bendakegar, degi-inigwele, dule-baid anba-bur bule-walikagwad gudibalid.

¹³Emi-mutik be wegi gabgwelo. Neg-oibosar, gwenad-anba-bur-walikagwad be-bendakye-sogele, ar deyob guodo. Ar degisulile, Bab-Jehová-asabin ise-sogar an bega soged, ani, an igar-maidba be-bendakoed. Emisgindi, wegi be gabgwersunno, neg-oibogedse.

¹⁴Rut a-mutiki Booz-nag-duksik gabidsunnad. Geb bolegoedbali, amba negsichi-sichigwadgi, dulemar-ataked-idu, Rut gwisgusad. Ar ade, Booz sogsa gusad: “Dulemar wisguosulid, cebada-omukuleged-negse ome-gwensak-arbid.”

¹⁵Degi, Booz Rutʼga sogded: —Mor-dummad be unge. Rut mor-dummad nue-nallaa gasgua, Booz ega cebada nibir-dulabo-gakambe (50) urbisad. Geb Booz Rut-yargangi cebada-nasiksad. Agi Rut, neggweburse mor-dummadgi dukwaa cebada-sealid.

¹⁶Rut e-saka-negse nonigua, e-saka ese egichialid: —Bunagwa, degite, ¿igi be gude? Rut e-sakaga bela sogsad, igi e-gwenad-walikagwad-Booz ega ibmar imaksa.

¹⁷Geb a-ukinbali, Rut sogdebalid: —Anga cebada nibir-dulabo-gakambe (50) uksabalid. Ar anga sogsad: ‘Be-saka-negse mer ibmar-sedsuli gannar aibiroye.’

¹⁸Geb Noemí, Rutʼga sogded: —Bunagwa, be abitogwelo, igi neg-gudodibe. Ar ade, Booz belagwa gudiosulid, igar-nudakedse indakoed.