Ruti 3

1

2

3

4

¹Eme Naomizi Ruti ʒiŋuc muhuc âzâcnewec: “Joŋao‐mae, no ŋeŋe juju moc bâfua‐garepe juhâmozemec.

²Manakic, Boasi kiŋaŋ narufâc‐ticne jaŋehec jumeŋ e soctofa‐nâhec jukac hâcne. Erâ e miŋecgac ŋafeo gieficko hândâŋ ba wosâc gie baocmu.

³Irec go opâ ruarâ tokic ruac. Erâ ŋaqi qorucge biaŋne hetec hume gieficko huzemec. Erâ nânâ opâ‐ticne nâfâreme honehuc ine fuacnezemec.

⁴Ehuc waha foocmu fofo‐ticne i hone tâcnezemec. Erâ rarâ kike‐ticnao bilaŋke bafaharerâ waha fozemec. Ehame e wiac i me i ecmurâ gazaocmu.”

⁵Eme eki dâŋ ʒiŋuc bâtikiecnewec: “Wiac sasawa mukomec i efârepemu.”

⁶Ruti e iŋuc murâ gieficko hurâ joŋao‐ticnezi âzâcnewec sâc efârewec.

⁷Eme Boasi e nânâ opâ‐ticne nâqiŋnerâ aŋac faio padi guruckekicne irec heririŋko waha fowec. Ehame ŋokac e kamic kamic rarâ kike‐ticnao bilaŋke bafaharerâ waha fowec.

⁸Eme ŋic e ŋafe ʒâʒâŋiŋko ɋârerâ ŋokaczi kike‐ticnao fowec i honerâ fâfârewec.

⁹Ehuc muwec, “Go mo?” Mume ŋokaczi dâŋ ʒiŋuc bâtikiecnewec: “No kiŋaŋ naruge Ruti. Irec ŋaqige bâdâmârerâ kiŋaŋ naruge no rufa‐narec. Go soctofa‐nane jukicte iŋuc enarec.”

¹⁰Eme Boasizi muwec, “Naru‐mae, Wofuŋzi jambuŋguoc. Ʒi jauŋ gie bakomec izi mârâc bameŋ i sirickekac. Go ŋicmotec hapetac me mâririhec jaŋerao mi qohotaekic.

¹¹Irec naru‐mae, go mi hâwicguoc. No wiac irec me irec numu‐naretec sâc garepemu. Nore âgofâc sasawa jaŋe gore ʒiŋuc manaŋgopieŋ: E ŋokac biaŋne.

¹²Jâmbomac, soctofage jukopac, erâ soctofage fuŋfuŋ jâmbâŋ ine ŋic moc jukac.

¹³Ŋafe ʒi sâcne ʒuhuckerâ fohaŋtec hae fureoc. Eme hae fureme ŋic moczi merâfâc raucguzo murâ furi bacguhuc raucguzejec, mi eocmuo ine noni epemu. I Wofuŋzi manaha mukopac. Irec waha fohaŋtec hae fureoc.”

¹⁴Boasi e ŋokac iŋuc âzâcneme waha kikefuŋ‐ticnao foha hae furewec. Erâ furic uupicte jâmbâŋ faharewec. Iŋuc eme ŋic e ʒiŋuc manawec: “Ŋokaczi gieficko warejec i moczi moc mi manajec.”

¹⁵Erâ muwec, “Rurufage i ro badomac.” Eme badomahame padi fiame arec 6 eme ɋawenao hecneme barâ haeo rawec.

¹⁶Ra joŋao‐ticnerao fisime muwec: “Joŋao‐nane, weniŋuc fuakac?” Mume Ruti e ŋiczi wiac sasawa ecnewec irec binaŋ bacne‐fârewec.

¹⁷Ehuc ʒiŋuc muwec: “Padi arec 6 fia‐narehuc ʒiŋuc muhuc nazajec: ‘Joŋaogerao metariŋ mi risiezemec.’”

¹⁸Eme eki ʒiŋuc âzâcnewec: “Joŋao‐mae, wiac weniŋuc jaha fua raocmu i fua taniŋkeocte woŋec juzemec. Ŋic e qâoma mi ehuc miŋecgac jaha bataraocmu.”