1मिनु रूथ आ शिमी नाओमीमी “आं चाइमी, इ कली रिम्शो दुम्चा कली इ खिं पशा बाक्शो तचा दाक्नुङ।
2बोआज इं खाल ङा मुर बाक्ब। गे मेको आ गेय पाइब मीश मुरपुकी नु बाक्ते। मुलाक्दो मेकोमी आ क्योव़ज तुप्तीकेम गेय पाइब।
3मोपतीके गे चिक्शा, तेल ख्रेक्शा, रिम्शो वा फेक्शा, क्योव़ज तुप्तीकेम लावो। बोआजम मजवा मतूङा सम्म मतपांइसो।
4मिनु मेको इप्दीमेनु, आ इप्तीके कोव़शा वोतो। मिनु नोले लशा, आ खोइल गे ङा फेक्शो वा हुक्शा गोलो। मिनु गे मार पचा माल्नेवे, मेकोमी इ कली देंब” देंमाक्त।
5मिनु रूथमी “इन देंशो, नेल्ल पाइनुङ” देंमाक्त।
6मिनु रूथ क्योव़ज तुप्तीके लशा, आ शिमी आ देंशो खोदेंशो पवा बाक्त।
7बोआज जशा, तूशा ग्येरसे बाक्त। मिनु क्योव़ज पुक्तीके आ नोले इप्थ लमाक्त। मिनु रूथ बोआज आ मतुइक्चा ङा पा जाक्शा, आ खोइली गे ङा वा हुक्शा, गोल्माक्त।
8मिनु नाक्दो उइक्थ दुम्मेनु, बोआज सेंसे बाक्त। मिनु आ खोइल गे मीश मुर का गोल्शो तवा बाक्त।
9मिनु बोआजमी “गे सु नवे?” दे हिल्लो पवा बाक्त। मिनु मेकोमी “गो इन वाइलीम रूथ नङ। गे आंइ खाल ङा मुर बाक्नीनी, इन वा फेक्तीनी” देंमाक्त। इजीकीएल १६:८
10मिनु बोआजमी “परमप्रभु यावेमी इ कली आसीक गेवल। ङोंइती पशो क्येङा मुल ङा इ पशो रिम्शो बाक्ब। गे क्येट थीब नु मथीब सुइ ठिटा वोंइश मुर आन नोले मखोदी। रूथ २:११
11गे महिंथु बाक्को। इ माल्शो गो नेल्ल पाइनुङ। गे रिम्शो मीश मुर बाक्नेवे। सहर ङा मुर नेल्लेमी तुइश्शो बाक्नीम।
12गो थमा पा इ खाल ङा मुर बाक्नुङ। तन्न आं क्येङा यो आं नेक्था ङा अर्को मुर का बाक्ब।
13मुलाक्दो एके बाक्को। दीसा सुनी मेको मुरुमी इ नेक्था ङा मुर आ पचा माल्शो गेय पाइब, मपाप्तु हना, परमप्रभु यावे ब्रोंइशा बाक्शो खोदेंशो पा, गो एको गेय पाइनुङ। नां मसोव़म सम्म इपो” देंमाक्त।
14मिनु रूथ नां मसोव़म सम्म इम्माक्त। मिनु रिम्शो पा नां मसोव़थु बोक्माक्त। मिनु बोआजमी “क्योव़ज तुप्तीकेमी मीश मुर का बाक्त, दे सुइम मतुइक्तमेक्ल।
15इ कुप्नी दाइक्तो” देंमाक्त। मिनु रूथमी दाइक्तानु, ६ सेआह क्योव़ज गेशा कुरपदा बाक्त। मिनु रूथ सहर लेम्माक्त। सेआह का ७ लिटर खोदेंशो बाक्ब। मिनु ६ पुक्तीके ४२ लिटर कि १० पाथी खोदेंशो बाक्ब।
16मिनु आ शिमी आ बाक्तीके जाक्दीम्मेनु, आ शिमीमी “आं चाइमी, मार दुम्मे?” दे हिल्लो पवा बाक्त।
17मिनु रूथमी बोआजमी पशो नेल्ल शेंशा “मेकोमी आं कली ‘इ शिमी आ बाक्तीके श्येत्थ मलेतो’ दे आं कली ६ सेआह क्योव़ज गेती” देंमाक्त। सेआह का ७ लिटर खोदेंशो बाक्ब।
18मिनु नाओमीमी “आं चाइमी, एको दोदेंशो दुम्बा, मतुइक्ती सम्म इ थुं नाइश्शा बाक्को। मारदे हना मेकोमी मेको गेय मुलाक्तीन मथुमा सम्म आ थुं यो नाइक्चा मताइब” देंमाक्त।
