1Noemí co marãpʉ Elimelec níꞌcʉ mijĩ Booz wãmetigʉre acaweregʉtico niwõ. Cʉ̃ peje cʉogʉ, añugʉ̃ ninoꞌgʉ̃wioro nicʉ niwĩ.
2Niꞌcã nʉmʉ Rut Noemírẽ aꞌtiro nico niwõ: —Yʉꞌʉre cãpũpʉ na oteꞌcaropʉ waꞌacã weeya. Apetero weegʉ niꞌcʉ̃ te põꞌrãrĩ dʉteri masʉ̃ yʉꞌʉre añurõ wéégʉ, cʉ̃ beꞌro cebada dʉtestedijosere “Mʉꞌʉ seesirutucã añurõsaꞌa”, nibosami. Co mañecõ peꞌe: “Jaʉ, yʉꞌʉ macʉ̃ nʉmo níꞌco, waꞌagosaꞌa”, ni yʉꞌtico niwõ.
3Tojo weego Rut na dʉteropʉ waꞌa, cebada dʉterã beꞌro te põꞌrãrĩrẽ seesirutugo waꞌaco niwõ. Core añurõ waꞌacaro niwʉ̃. To oteꞌcaro Booz, Elimelec ya curuacjʉ̃ yaro nicaro niwʉ̃.
4Co tojo daꞌrari cura Booz, Belẽpʉ níꞌcʉ ejacʉ niwĩ. Cebada daꞌrarãrẽ añuduticʉ niwĩ: —Õꞌacʉ̃ mʉsã meꞌrã niato, nicʉ niwĩ. Na peꞌe quẽꞌrã “Õꞌacʉ̃ mʉꞌʉrẽ añurõ weeato”, ni yʉꞌticãrã niwã.
5Beꞌro Booz, Rure ĩꞌagʉ̃, cʉ̃ yarã daꞌrarã wiogʉre sẽrĩtiñaꞌcʉ niwĩ: —¿Sico nuꞌmio noa acawerego niti? nicʉ niwĩ.
6Daꞌrari masã wiogʉ cʉ̃rẽ yʉꞌticʉ niwĩ: —Co moabita masõ nimo. Ti diꞌtapʉ níꞌco Noemí meꞌrã aꞌtico niamo, nicʉ niwĩ.
7Co yʉꞌʉre, “¿Yʉꞌʉ cebada dʉterã beꞌro na dʉtestedijosere seesirutucã añusari?” ni sẽrĩamo. Co boꞌreacã aꞌtiꞌco daꞌranaꞌiamo. Niꞌcãrõacãpʉta soori uꞌtupʉ cãꞌrõ soogo aꞌtiamo, ni yʉꞌticʉ niwĩ.
8Tere tʉꞌogʉ, Booz Rure aꞌtiro nicʉ niwĩ: —Acawerego, yʉꞌʉ ucũsere añurõ tʉꞌoya. Ãpẽrã na oteꞌque nirõpʉ otese dʉca põꞌrãrĩrẽ seego waꞌaticãꞌña. Yʉꞌʉre daꞌracoꞌterã numia meꞌrã tojayá.
9Noꞌo dʉterã na daꞌrarore ĩꞌagõ, numiarẽ sirutuya. Yʉꞌʉre daꞌracoꞌterã ʉmʉarẽ mʉꞌʉrẽ “Cariboticãꞌña”, nitojapʉ. Mʉꞌʉ acowʉogo, te sĩꞌrĩsepaa dujise tiro waꞌa, na aco waaꞌquere sĩꞌrĩña, nicʉ niwĩ.
10Tere tʉꞌogo, Rut co ẽjõpeosere ĩꞌogõ, paamuꞌrĩqueꞌaco niwõ. Beꞌro Boore sẽrĩtiñaꞌco niwõ: —¿Deꞌro weegʉ yʉꞌʉ aperocjõ nimicã, yʉꞌʉre tocãꞌrõ añurõ weeti?
11Core yʉꞌticʉ niwĩ: —Mʉꞌʉ marãpʉ wẽ́rĩ́ca beꞌro mʉꞌʉ mañecõrẽ añurõ weesetisere tʉꞌopeꞌocãꞌpʉ. Tojo nicã mʉꞌʉ pacʉsʉmʉarẽ, mʉꞌʉ ya diꞌtare duꞌucũu, aꞌto mʉꞌʉ todʉporo masĩtiꞌcãrã tiropʉ, macãrĩ aꞌtico niapʉ.
12Õꞌacʉ̃ mʉꞌʉ tojo weeꞌquere wapayeato. Mʉꞌʉ Õꞌacʉ̃, Israe curuacjãrã ẽjõpeogʉ cʉ̃ coꞌtesere aꞌmagõ aꞌtiapã. Cʉ̃ta mʉꞌʉrẽ añurõ weeato, nicʉ niwĩ.
13Cʉ̃rẽ yʉꞌtico niwõ: —Mʉꞌʉ yʉꞌʉre añurõ weeapʉ. Mʉꞌʉ ucũse yʉꞌʉre wãcũtutuacã weeꞌe. Mʉꞌʉrẽ daꞌracoꞌterã numia weronojõ nitimicã, yʉꞌʉre añurõ maꞌise meꞌrã ucũꞌu.
14Baꞌaritero ejacã, Booz Rure pijicʉ niwĩ: “Aꞌto aꞌtia. Pã́rẽ cãꞌrõ míí, na yosobaꞌasere yosobaꞌaya.” Rut daꞌrari masã tiropʉ ejanujãco niwõ. Booz core cebada peri pʉ̃ꞌoꞌque perire baꞌadutigʉ oꞌocʉ niwĩ. Co tere baꞌa, co baꞌasĩꞌrĩrõ põtẽorõ baꞌaco niwõ. Baꞌase core oꞌoꞌque dʉꞌsacãꞌcaro niwʉ̃.
15Beꞌro co apaturi cebada perire seego waꞌáca beꞌro Booz cʉ̃rẽ daꞌracoꞌteri masãrẽ aꞌtiro duticʉ niwĩ: —Co cebada dotori waꞌteropʉ te põꞌrãrĩrẽ seecã quẽꞌrãrẽ, ne core cãꞌmotaꞌaticãꞌña.
16Mejõ peꞌe apeye noꞌo mʉsã ñeꞌese dotoripʉreta core seedutirã, cũuña. Core ne tuꞌtiticãꞌña, nicʉ niwĩ.
17Tojo weego Rut, Booz ya cãpũpʉ cebadare seenaꞌitõꞌoqueꞌa waꞌaco niwõ. Beꞌro co seeꞌquere suꞌtiweeco niwõ. Te veinte kilo waꞌtero nʉcʉ̃caro niwʉ̃.
18Beꞌro co suꞌtiweeꞌque perire wʉa, macãpʉ dajatojaaco niwõ. Tere co mañecõrẽ ĩꞌoco niwõ. Tojo nicã, co baꞌadʉꞌaꞌquere Noemírẽ oꞌoco niwõ.
19Noemí core sẽrĩtiñaꞌco niwõ: —¿Niꞌcãcãrẽ noꞌopʉ daꞌrati? ¿Noꞌopʉ te pejere ticʉse seeati? Mʉꞌʉrẽ tojo weetamuꞌcʉre añurõ waꞌato, nico niwõ. Rut co mañecõrẽ wereco niwõ: —Yʉꞌʉ Booz wãmetigʉ meꞌrã daꞌrapʉ, nico niwõ.
20Noemí core yʉꞌtico niwõ: —Õꞌacʉ̃ cʉ̃rẽ añurõ weeato. Õꞌacʉ̃ todʉporo wẽrĩꞌcãrãrẽ pajañaꞌcaronojõta niꞌcãrõacã catirã meꞌrã quẽꞌrãrẽ añurõ pajañaꞌa weetamunuꞌcũapĩ. Booz marĩ acaweregʉ waro nimi. Tojo weegʉ marĩrẽ añurõ coꞌtemasĩmi.
21Rut peꞌe apeye werenemoco niwõ: —Cʉ̃ yʉꞌʉre cʉ̃rẽ daꞌracoꞌterã numia meꞌrã daꞌradutiami. Téé cebadare seepeꞌocãpʉ daꞌraduꞌudutiami.
22Co tojo nicã tʉꞌogo, Noemí Rure aꞌtiro yʉꞌtico niwõ: —Cʉ̃rẽ daꞌracoꞌterã numia meꞌrã mʉꞌʉrẽ tojacã añu nitʉꞌsaꞌa. Ãpẽrã ye weseripʉ seego waꞌaticãꞌña. Ãpẽrã mʉꞌʉrẽ caribobosama, nico niwõ.
23Tojo wee Rut, Boore daꞌracoꞌterã numia meꞌrã te põꞌrãrĩrẽ seego waꞌaco niwõ tja. Téé trigo põꞌrãrĩrẽ, tojo nicã cebada põꞌrãrĩrẽ tʉ̃ꞌrẽpeꞌocãpʉ daꞌratʉoco niwõ. Co topʉ daꞌrase nʉmʉrĩrẽ co mañecõ meꞌrã nisetico niwõ.
